વિરાટ કોહલી નહીં રમે બાકીની મેચ, સામે આવ્યું મોટુ કારણ

• વિરાટ કોહલી ઈંગ્લેન્ડ સામેની ટેસ્ટ સીરીઝમાંથી બહાર 
• વિરાટ કોહલીના નિર્ણયનું સંપૂર્ણ સન્માન અને સમર્થન કરીએ છીએ:BCCI
• અંગત કારણોસર વિરાટ કોહલી ઈંગ્લેન્ડ સામેની સીરીઝ નહીં રમી શકે

ભારતીય ટીમનો સ્ટાર બેટ્સમેન વિરાટ કોહલી ઈંગ્લેન્ડ સામેની ટેસ્ટ સીરીઝમાંથી બહાર થઈ ગયો છે. BCCIએ ભારતીય ટીમની જાહેરાત કરી છે. જેમાં વિરાટ કોહલી આખી સીરીઝમાંથી બહાર છે. જો કે વિરાટ કોહલી ના રમવાનું કારણ હજુ સ્પષ્ટ થયું નથી. ઇંગ્લેન્ડ સામેની પ્રથમ બે મેચ પહેલા જ વિરાટ કોહલીએ પોતાનું નામ પાછું ખેંચી લીધું હતું. ત્યાર બાદ માનવામાં આવી રહ્યું હતું કે વિરાટ ત્રીજી ટેસ્ટ મેચમાંથી વાપસી કરી શકે છે.

વિરાટ આખી સીરીઝમાંથી બહાર હતો

વિરાટ કોહલીની ગેરહાજરીનું કારણ હજુ સ્પષ્ટ થયું નથી. જોકે, BCCIએ વિરાટ કોહલીને લઈને કહ્યું છે કે અંગત કારણોસર વિરાટ કોહલી ઈંગ્લેન્ડ સામેની સમગ્ર સીરીઝ માટે પસંદગી માટે ઉપલબ્ધ રહેશે નહીં. BCCI વિરાટ કોહલીના નિર્ણયનું સંપૂર્ણ સન્માન અને સમર્થન કરે છે. આવી સ્થિતિમાં વિરાટ કોહલીના ફેન્સને મોટો આંચકો લાગ્યો છે. વિરાટ કોહલીના ચાહકો તેમના મનપસંદ ખેલાડીને ઈંગ્લેન્ડ સામે રમતા જોવા માંગતા હતા પરંતુ ચાહકોની આ આશાને જોરદાર ફટકો પડ્યો છે.

કોહલી પણ પ્રથમ બે મેચમાંથી બહાર 

આ પહેલીવાર નથી જ્યારે વિરાટ કોહલીએ પોતાને પસંદગી માટે ઉપલબ્ધ ન કરાવ્યો હોય. આ પહેલા વિરાટ કોહલીએ હૈદરાબાદ ટેસ્ટ પહેલા જ પ્રથમ બે ટેસ્ટમાંથી પોતાનું નામ પાછું ખેંચી લીધું હતું. આ પહેલા વિરાટ કોહલી પણ અંગત કારણોસર અફઘાનિસ્તાન સામે રમાયેલી T20 સીરીઝની પ્રથમ મેચમાંથી બહાર થઈ ગયો હતો. હવે જોવાનું એ રહે છે કે વિરાટ કોહલી આંતરરાષ્ટ્રીય ક્રિકેટમાં ક્યારે વાપસી કરે છે.

પિતા બનવા જઈ રહ્યો છે વિરાટ 

મીડિયા રિપોર્ટ્સનું માનીએ તો વિરાટ કોહલી પિતા બનવા જઈ રહ્યો છે. જોકે, વિરાટ કે તેના પરિવાર તરફથી આવું કોઈ નિવેદન આવ્યું નથી. પરંતુ વિરાટ કોહલીના નજીકના મિત્ર ગણાતા દક્ષિણ આફ્રિકાના પૂર્વ બેટ્સમેન એબી ડી વિલિયર્સે એક ઈન્ટરવ્યુ દરમિયાન કહ્યું હતું કે વિરાટ કોહલી પિતા બનવા જઈ રહ્યો છે. જેના કારણે તે ઈંગ્લેન્ડ સામે ટેસ્ટ સીરીઝ રમી રહ્યો નથી. જો કે હજુ સુધી આ અંગે કંઈ સ્પષ્ટ કરવામાં આવ્યું નથી.