અમેરિકાનાં વિઝા મેળવવામાં ભારતીયોએ વર્ષ 2024માં સતત બીજા વર્ષે તમામ રેકોર્ડ તોડયા છે. સતત બીજા વર્ષે 10 લાખથી વધુ ભારતીયોને વિઝા આપવામાં આવ્યા છે. આ ઉપરાંત અમેરિકામાં રહીને જૉબ કરતા ભારતીય પ્રોફેશનલ્સનાં H-1B વિઝા રિન્યુ કરવાનો પાયલોટ પ્રોજેક્ટ પૂરો થયો છે.
2024માં અમેરિકામાં અભ્યાસ કરતા ભારતીય વિદ્યાર્થીઓની સંખ્યા 3,31,000ને પાર થઈ છે. ભારતમાં કાર્યરત અમેરિકાની એમ્બેસીએ જણાવ્યું હતું કે 2024માં સતત બીજા વર્ષે 10 લાખથી વધુ નોન ઈમિગ્રન્ટસને વિઝા આપવામાં આવ્યા હતા. જેમાં રેકોર્ડ બ્રેક સંખ્યામાં પર્યટક વિઝા સામેલ છે. આ આંકડો ભારતમાંથી અમેરિકા જવાનો ક્રેઝ વધી રહ્યો હોવાનો નિર્દેશ કરે છે. ખાસ કરીને પર્યટન, વેપાર અને શિક્ષણ માટે ભારતીયો અમેરિકા જવા માંગતા હોય છે. ધાર્મિક પ્રવાસ માટે પણ અમેરિકા જનારા વધ્યા છે. વિશ્વના અન્ય દેશોની સરખામણીમાં અમેરિકા વધુ સમૃદ્ધ હોવાથી ત્યાં જવા લાઈન લાગે છે.
7H-1B વિઝા રિન્યુઅલનો પાયલોટ પ્રોજેક્ટ પૂરો થયો
વિદેશ વિભાગ દ્વારા આ વર્ષે અમેરિકામાં H-1B વિઝા રિન્યુઅલનો પાયલોટ પ્રોજેક્ટ પૂરો કરવામાં આવ્યો છે. જેમાં ભારતનાં વિશેષ કેટેગરીમાં આવતા H-1B વિઝાધારકોનાં વિઝા અમેરિકામાં જ રિન્યુ કરાવી શકાય છે. ભારતમાં અમેરિકાનાં મિશન દ્વારા હજારો નોન ઈમિગ્રન્ટસ વિઝા આપવામાં આવ્યા છે. તેનો ઉદ્દેશ ખાસ કરીને પરિવારોને ફરી મળવા તેમજ કુશળ કર્મચારી અમેરિકામાં હરીફરી શકે તેનો છે.
ભારત અમેરિકામાં સૌથી વધુ વિદ્યાર્થી મોકલનાર દેશ
ભારતે 2008-09 પછી 2024માં પહેલીવાર સૌથી વધુ વિદ્યાર્થીઓને અભ્યાસ માટે અમેરિકા મોકલ્યા છે. આમ તે અમેરિકામાં સૌથી વધુ વિદ્યાર્થીઓ મોકલનારો દેશ બન્યો છે. આ વર્ષે અમેરિકામાં અભ્યાસ કરતા ભારતીયોની સંખ્યા 3,31,000થી વધારે છે. ભારતનાં સ્નાતક વિદ્યાર્થીઓની સંખ્યામાં 19 ટકાનો વધારો થયો છે. જે લગભગ 2 લાખ વિદ્યાર્થીઓ પર પહોંચી છે.
24,000થી વધુ પાસપોર્ટ આપવામાં આવ્યા
અમેરિકાના મિશન દ્વારા ભારતમાં રહેતા તેમજ ભારતમાં પ્રવાસ માટે આવનારા અમેરિકન નાગરિકોને 24,000થી વધારે પાસપોર્ટ આપવામાં આવ્યા છે. અમેરિકાએ 2024માં સ્માર્ટ ટ્રાવેલર એનરોલમેન્ટ પ્રોગ્રામ (STEP) ની નવી આવૃતિ શરૂ કરી છે. જેમાં ઈમરજન્સીમાં અમેરિકાનાં નાગરિકોનો સંપર્ક કરવા કે સુરક્ષાને લગતા એલર્ટ મોકલવામાં આવે છે.
