અમેરિકામાં આર્કટિક બ્લાસ્ટને કારણે આગામી દિવસોમાં ગાત્રો થીજવી દેતી ઠંડી પડવાની સંભાવનાને જોતા દેશના આગામી પ્રમુખ ડોનાલ્ડ ટ્રમ્પનો 20 જાન્યુઆરીના રોજ યોજાનારો શપથ ગ્રહણ સમારંભ હવે ઇનડોર આયોજિત કરવામાં આવશે. +
શપથ ગ્રહણ સમારંભના દિવસે ગાત્રો થીજવી દે તેવી ઠંડી પડવાની સંભાવનાને કારણે રિપબ્લિકન્સની ટ્રમ્પના બીજા કાર્યકાળના ભવ્ય પ્રારંભની આશા પર ઠંડું પાણી ફરી વળ્યું છે. ટ્રમ્પે પોતાના ટ્રૂથ સોશિયલ સાઇટ પર લખ્યું હતું કે, હાલ દેશમાં આર્કટિક બ્લાસ્ટની અસર ફેલાઈ છે. તેથી મેં આદેશ આપ્યો છે કે પ્રાર્થના અને અન્ય ભાષણો ઉપરાંત શપથ ગ્રહણ સમારંભના ભાષણને યુનાઇટેડ સ્ટેટ્સ કેપિટલ રોટુંડામાં આયોજિત કરવામાં આવે. જેમ 1985માં રોનાલ્ડ રિગને પણ ભારે ઠંડા હવામાનને કારણે કયુંર્ હતું. અમે આ ઐતિહાસિક કાર્યક્રમના સીધા પ્રસારણ અને રાષ્ટ્રપતિ પરેડની યજમાની માટે સોમવારે કેપિટલ વન એરેનાને ખોલીશું.
1985 બાદ પહેલીવાર બંધ બારણે શપથ
ડોનાલ્ડ ટ્રમ્પ રોટુંડામાં શપથ લેશે તો 1985 બાદ આ બીજો પ્રસંગ રહેશે જ્યારે અમેરિકન પ્રમુખ બંધ બારણે શપથ લેશે. 1985માં રોનાલ્ડ રિગન અંતિમ પ્રમુખ હતા જેમણે ઇમારતની અંદર શપથ લીધા હતા. ત્યારે દિવસનું તામપાન 7 ડિગ્રી પર પહોંચી ગયું હતું અને જોરદાર ઠંડાગાર પવન ફૂંકાઈ રહ્યા હતા જેના કારણે તાપમાન માઇનસ 25 ડિગ્રી જેટલું અનુભવાતંુ હતું. રિગને કેપિટલ રોટુંડાની અંદર શપથ લીધા હતા. તેમની શપથ ગ્રહણ પરેડને રદ કરી દેવાઈ હતી.
