- ઈઝરાયેલનાં સંરક્ષણ દળો હમાસનો બોલાવશે ખાત્મો
- નાગરિકો પર થયેલા અત્યાચારોનો બદલો લેવામાં આવશે
- આતંકીઓએ વિદેશી નાગરિકોને પણ નિશાન બનાવ્યા
પેલેસ્ટાઈનનાં આતંકવાદી જૂથ હમાસને કડક શબ્દોમાં ચેતવણી આપતા ઇઝરાયેલના સંરક્ષણ પ્રધાન યોવ ગેલન્ટે જણાવ્યું હતું કે “2023 એ 1943 નથી”. જર્મનીમાં નાઝી શાસન હેઠળ યહૂદીઓના અત્યાચારના પરોક્ષ સંદર્ભમાં તેમણે ઉમેર્યું હતું કે આજના યહૂદી લોકો “વિવિધ ક્ષમતાઓ” ધરાવે છે.
કોઈ ભૂલ ન કરશો
યોવ ગેલન્ટે તેમની ટિપ્પણીઓ બ્રસેલ્સમાં આયોજિત એક બેઠકમાં 31 નાટો સમકક્ષો માટે બ્રીફિંગ દરમિયાન આપી હતી. તેમણે કહ્યું હતું કે “અમને જોરદાર ફટકો પડ્યો છે. તેમ છતાં કોઈ ભૂલ કરશો નહીં, 2023 એ 1943 નથી. અમે એ જ યહૂદીઓ છીએ, પરંતુ અમારી પાસે જુદી જુદી ક્ષમતાઓ છે. ઇઝરાયેલ મજબૂત દેશ છે.
ઈઝરાયેલી નાગરિકો પર થયેલા અત્યાચારોની આપી માહિતી
ગેલન્ટે તેમને હમાસના આતંકવાદીઓ દ્વારા બાળકો, મહિલાઓ, પુરૂષો અને વૃદ્ધો પર કરવામાં આવતા અત્યાચારો વિશે પણ માહિતી આપી હતી. તેમણે વધુમાં ભારપૂર્વક જણાવ્યું હતું કે ઇઝરાયેલી સંરક્ષણ દળો હમાસનો ખાત્મો બોલાવશે.
વૈશ્વિક સમર્થનની પ્રંશસા
ઑક્ટોબર 7ના રોજ હમાસે ઈઝરાયેલ પર હુમલો શરૂ કર્યા પછી ઇઝરાયેલને મળેલા વૈશ્વિક સમર્થન માટે સંરક્ષણ પ્રધાને પ્રશંસા વ્યક્ત કરી હતી. ઇઝરાયેલના રાષ્ટ્રપતિએ તેમને ઇઝરાયેલના નાગરિકો અને સૈનિકો તેમજ વિદેશી નાગરિકો સામેના કેટલાક હુમલાઓનો અનસેન્સર્ડ વિડિયો પણ બતાવ્યો હતો.
હમાસ એક ક્રૂર સંગઠન
“હમાસ એ ગાઝાનું ‘ISIS’ છે, તે એક ક્રૂર સંગઠન છે જેને ઈરાન દ્વારા ભંડોળ પૂરું પાડવામાં આવે છે. “ગાઝાનું ‘ISIS’ અમારી સરહદો પર અસ્તિત્વમાં રહેશે નહીં. આઈડીએફ હમાસને નષ્ટ કરશે. અમારા બાળકોના લોહીથી તેમના હાથ રંગાયેલા છે. અમે હમાસનાં બધા જ આતંકીઓનો ખાત્મો બોલાવીશું.
