વજન કાંટાની ચિઠ્ઠીમાં ખેલ પાડી ગોંડલના ભંગાર વેપારી સાથે 28.69 લાખની છેતરપિંડી
ખાલી ગાડીનું ઓછું વજન બતાવી વધુ રકમ પડાવવાનો આરોપ; બારીયા બંધુઓ સામે ગોંડલ તાલુકા પોલીસમાં ગુનો
અગ્ર ગુજરાત, રાજકોટ
ગોંડલ તાલુકામાં ભંગારના વેપારમાં વિશ્વાસઘાતની ગંભીર ઘટના સામે આવી છે. ખાલી વાહનના વજનમાં હેરફેર કરી વજન કાંટાની ચિઠ્ઠીમાં ઓછું વજન દર્શાવીને અંદાજે રૂ.28.69 લાખની છેતરપિંડી કરાઈ હોવાનું ફરિયાદમાં ખુલ્યું છે. આ મામલે ગોંડલ તાલુકા પોલીસએ બે આરોપીઓ સામે ગુનો નોંધ્યો છે.
ફરિયાદી ધર્મેશકુમાર ચંદુલાલ ચાંગેલા (ઉ.વ. 43) જામવાડી ગામના ખાડીયા વિસ્તારમાં છેલ્લા પંદર વર્ષથી “જય પેટ ઇન્ટરનેશનલ” નામે પ્લાસ્ટિક સ્ક્રેપનો વ્યવસાય કરે છે. ફરિયાદ મુજબ, વંથલી તાલુકાના કોયલી ગામના વતની હિતેષ ગોવિંદ બારીયા અને ઉપલેટાના અમીત બારીયાએ જેતપુર ખાતે ભંગારનો ડેલો હોવાનો વિશ્વાસ આપીને વેપાર શરૂ કર્યો હતો. શરૂઆતમાં નિયમિત વ્યવહાર થતાં શંકા ઊભી થઈ નહોતી.
સમય જતાં આરોપીઓ વારંવાર પ્લાસ્ટિક સ્ક્રેપ ભરેલી ગાડીઓ લાવતા રહ્યા અને વજન માટે વે-બ્રિજ પર લઈ જતા. મે-2025 બાદ વજન કાંટામાં ફેરફાર થયો હોવાની શંકા મજબૂત બનતી ગઈ. ઓક્ટોબર-2025માં એક જ વાહનના અલગ-અલગ દિવસોના ખાલી વજનની ચિઠ્ઠીઓમાં મોટો તફાવત દેખાતા તપાસ કરવામાં આવી. એક દિવસ ખાલી ગાડીનું વજન 1020 કિ.ગ્રા. દર્શાવાયું હતું, જ્યારે બીજા દિવસે તે જ ગાડીનું ખાલી વજન 1330 કિ.ગ્રા. નીકળ્યું—જે કાયદેસર કરતાં અસંગત હતું. વધુ ચકાસણીમાં ખુલ્યું કે અગાઉના વ્યવહારોમાં પણ ખાલી વાહનનું વજન દર વખતે અંદાજે 250થી 300 કિ.ગ્રા. ઓછું બતાવવામાં આવતું હતું, જેના આધારે પૂર્ણ વજન મુજબની રકમ વસૂલાતી રહી. પૂછપરછ દરમિયાન આરોપીઓએ છેલ્લા કેટલાક મહીનાઓથી વજન ચિઠ્ઠીમાં હેરફેર કરી વધુ રૂપિયા લીધા હોવાનો સ્વીકાર કર્યો હોવાનું ફરિયાદમાં જણાવાયું છે.
આ રીતે વિશ્વાસમાં લઈ વ્યવસાય દરમિયાન કુલ રૂ.28,64,585 જેટલી રકમની છેતરપિંડી થઈ હોવાનું બહાર આવ્યું છે. પોલીસે બંને આરોપીઓ સામે છેતરપિંડી સહિતની કલમો હેઠળ ગુનો નોંધી વધુ તપાસ શરૂ કરી છે.
