- પ્રથમ વખત ધારાસભ્ય ભજનલાલ શર્મા વિધાયક દળના નેતા તરીકે ચૂંટાયા છે
- ભજનલાલ પાસે 34 વર્ષનો રાજકીય અનુભવ છે
- ચહેરો નિર્વિવાદ રહ્યો છે અને પાર્ટીને લગતા કાર્યક્રમોમાં ઉત્સાહપૂર્વક ભાગ લીધો છે
છત્તીસગઢ અને મધ્યપ્રદેશની જેમ રાજસ્થાનમાં પણ ભારતીય જનતા પાર્ટીએ ચોંકાવનારો નિર્ણય લીધો છે. અહીં પ્રથમ વખત ધારાસભ્ય ભજનલાલ શર્મા (54 વર્ષ) વિધાયક દળના નેતા તરીકે ચૂંટાયા છે. તેઓ જયપુરની સાંગાનેર બેઠક પરથી ચૂંટણી જીત્યા હતા. શર્મા અત્યાર સુધી રાજસ્થાનમાં ભાજપના મહાસચિવ રહી ચૂક્યા છે. ભજનલાલ પાસે 34 વર્ષનો રાજકીય અનુભવ છે. અત્યાર સુધી તેમણે સંસ્થામાં જ કામ કર્યું છે. ચહેરો નિર્વિવાદ રહ્યો છે અને પાર્ટીને લગતા કાર્યક્રમોમાં ઉત્સાહપૂર્વક ભાગ લીધો છે.
રાષ્ટ્રીય સ્વયંસેવક સંઘમાં જોડાયા અને સામાજિક કાર્યોમાં જોડાવા લાગ્યા
ભજનલાલ શર્માએ પોતાની કારકિર્દી વિદ્યાર્થી રાજકારણથી શરૂ કરી હતી. બાદમાં તેઓ રાષ્ટ્રીય સ્વયંસેવક સંઘમાં જોડાયા અને સામાજિક કાર્યોમાં જોડાવા લાગ્યા. શર્માએ 1992માં અયોધ્યામાં રામ મંદિરના આંદોલનમાં પણ સક્રિય ભાગ લીધો હતો. 1992માં તેમને જેલમાં હેવું પડ્યું હતું. તેઓ 27 વર્ષની વયે તેમના ગામ અટારીના સરપંચ પણ રહી ચૂક્યા છે.
‘સરપંચથી શરૂઆત, હવે ભજનલાલ શર્મા બનશે CM’
છેલ્લા ત્રણ દાયકાઓમાં, શર્માએ ભારતીય જનતા યુવા મોરચા (BJYM) અને પાર્ટી સંગઠનમાં વિવિધ હોદ્દાઓ સંભાળ્યા છે. તેમણે તેમનો પ્રારંભિક અભ્યાસ ભરતપુર જિલ્લાના અટારી ગામ અને નાદબાઈ શહેરમાં કર્યો હતો. બાદમાં તેઓ અખિલ ભારતીય વિદ્યાર્થી પરિષદ (ABVP)માં જોડાયા. તેમણે નાબડી અને ભરતપુરમાં સામાજિક મુદ્દાઓ પણ ઉઠાવ્યા. બાદમાં શર્મા ભાજપની યુવા પાંખ બીજેવાયએમમાં જોડાયા હતા. તેઓ ત્રણ વખત બીજેવાયએમના જિલ્લા અધ્યક્ષ હતા. તેઓ ભરતપુરમાં ભાજપના જિલ્લા સચિવ અને જિલ્લા અધ્યક્ષ પણ રહી ચૂક્યા છે. બાદમાં તેઓ પ્રદેશ ઉપાધ્યક્ષ બન્યા અને હવે ફરીથી મહામંત્રીની જવાબદારી સંભાળી.
‘શર્મા શાહના નજીકના ગણાય છે’
શર્મા ચાર વખત સંગઠન મહાસચિવ રહી ચૂક્યા છે. આ વખતે તેમણે પોતાના ગૃહ જિલ્લા ભરતપુરથી ટિકિટ માંગી હતી. પરંતુ, પાર્ટીએ અનામત બેઠક સાંગાનેર પરથી ઉમેદવાર ઉતાર્યા. અગાઉ, 2018ની ચૂંટણીમાં પણ શર્માએ ટિકિટ માંગી હતી, પરંતુ પાર્ટીએ અન્ય ઉમેદવાર પર વિશ્વાસ વ્યક્ત કર્યો હતો. આ પહેલા પણ શર્માએ ભાજપ સામે બળવો કરીને ચૂંટણી લડી હતી. જોકે, તેમને હારનો સામનો કરવો પડ્યો હતો. શર્માને અમિત શાહની નજીક ગણવામાં આવે છે. હાલ રાજસ્થાનમાં પહેલીવાર ધારાસભ્યને મુખ્યમંત્રી બનાવવાની ઘણી ચર્ચાઓ ચાલી રહી છે. ભજનલાલ શર્માએ પોલિટિકલ સાયન્સમાં માસ્ટર ડિગ્રી મેળવી. તેઓ કૃષિ પુરવઠાના વ્યવસાય સાથે સંકળાયેલા છે.
