ભારતીય ક્રિકેટ ટીમ હાલમાં ઓસ્ટ્રેલિયાના પ્રવાસે છે, જ્યાં તે બોર્ડર-ગાવસ્કર ટ્રોફી માટે પાંચ મેચોની સિરીઝ રમી રહી છે. પ્રથમ બે ટેસ્ટ મેચો બાદ સિરીઝ 1-1થી બરાબર છે અને ભારતીય ટીમના સ્ટાર બોલર જસપ્રિત બુમરાહે આ મેચોમાં શાનદાર પ્રદર્શન કર્યું છે. બુમરાહે અત્યાર સુધી 12 વિકેટ લીધી છે જે ભારતીય ટીમ માટે સૌથી વધુ છે. જો કે, બુમરાહની આ શાનદાર બોલિંગ છતાં, વેસ્ટ ઈન્ડિઝના મહાન ફાસ્ટ બોલર એન્ડી રોબર્ટ્સે જસપ્રિત બુમરાહને નહીં પરંતુ કોઈ અન્યને ભારતના શ્રેષ્ઠ બોલર તરીકે પસંદ કર્યો છે.
મોહમ્મદ શમીને ગણાવ્યો ભારતનો સર્વશ્રેષ્ઠ બોલર
એન્ડી રોબર્ટ્સે એક ઈન્ટરવ્યુમાં કહ્યું કે મોહમ્મદ શમી છેલ્લા કેટલાક સમયથી ભારતનો સર્વશ્રેષ્ઠ બોલર રહ્યો છે. જો કે શમી પાસે બુમરાહ જેટલી વિકેટ નથી, પરંતુ તેની બોલિંગમાં સાતત્ય અને વૈવિધ્ય બેજોડ છે. શમીને ‘ફુલ પેકેજ’ ગણાવતા રોબર્ટ્સે કહ્યું કે બહુ ઓછા બોલરો શમી જેટલા સ્વિંગ અને સીમ કરી શકે છે. શમીનું બોલિંગ નિયંત્રણ પણ બુમરાહની બરાબર છે. રોબર્ટ્સે એમ પણ કહ્યું કે મોહમ્મદ શમીને ત્રીજી ટેસ્ટ મેચ માટે ભારતીય ટીમમાં સામેલ કરવો જોઈએ, કારણ કે તે હાલમાં ભારતનો સર્વશ્રેષ્ઠ બોલર છે.
મોહમ્મદ શમીની શ્રેષ્ઠ ગેમ
મોહમ્મદ શમીની બોલિંગની ખાસિયત તેને ઘણા બોલરોથી અલગ બનાવે છે. શમી માત્ર તેના બોલને સ્વિંગ અને સીમ કરતો નથી, પરંતુ તેની પાસે ખૂબ જ સારું નિયંત્રણ પણ છે. આ જ કારણ છે કે તેને પોતાની લાઇન અને લેન્થ પર સતત મહેનત કરવી પડે છે, જેના કારણે તે વિરોધી બેટ્સમેનો માટે ખતરો બની જાય છે. બુમરાહની બોલિંગમાં એક અલગ પ્રકારની આક્રમકતા અને ગતિ છે, તો શમીની રમતમાં શિસ્ત છે, જે તેને સંપૂર્ણ બોલર બનાવે છે.
શું ત્રીજી ટેસ્ટ મેચમાં વાપસી કરશે શમી?
હવે તમામની નજર ત્રીજી ટેસ્ટ માટે મોહમ્મદ શમીને ભારતીય ટીમમાં સ્થાન મળશે કે નહીં તેના પર છે. એક રિપોર્ટ અનુસાર, BCCIએ શમીને ઓસ્ટ્રેલિયા મોકલવાની તમામ તૈયારીઓ પૂર્ણ કરી લીધી છે, જેમાં તેની વિઝા પ્રક્રિયા પણ પૂરી થઈ ગઈ છે. હાલમાં, BCCI અને પસંદગી સમિતિ શમીની ફિટનેસ ક્લિયરન્સની રાહ જોઈ રહી છે. શમી તાજેતરમાં ફિટનેસ ટેસ્ટ આપવા બેંગલુરુ ગયો હતો અને તેણે રણજી ટ્રોફી અને સૈયદ મુશ્તાક અલી ટી-20 ટુર્નામેન્ટમાં પણ સારું પ્રદર્શન કર્યું હતું.
રિપોર્ટ્સ અનુસાર, BCCIના એક અધિકારીએ કહ્યું, ‘અમે શમીના ફિટનેસ રિપોર્ટની રાહ જોઈ રહ્યા છીએ. તેણે તાજેતરમાં બેંગલુરુમાં ફિટનેસ ટેસ્ટ આપ્યો હતો અને રણજી ટ્રોફીમાં પણ સારું પ્રદર્શન કર્યું હતું. તેની કીટ તૈયાર છે, હવે અમે NCAની મંજૂરીની રાહ જોઈ રહ્યા છીએ.
