ક્રિકેટની દુનિયામાં એક વિચિત્ર ઘટના જોવા મળી જ્યારે એક કેપ્ટન ટોસ માટે યોગ્ય સમયે ન આવવાને કારણે ફાઈનલ મેચ રદ્દ કરવામાં આવી. આ મામલો વેસ્ટ ઈન્ડિઝથી સામે આવ્યો છે. અહીં ઘરેલુ ODI ટૂર્નામેન્ટની ફાઈનલ મેચમાં જમૈકા સ્કોર્પિયન્સ ટીમનો કેપ્ટન જોન કેમ્પબેલ ટોસ માટે સમયસર ફિલ્ડ પર પહોંચી શક્યો ન હતો. આ પછી મેચ રેફરીએ મેચ રદ્દ કરવાનો નિર્ણય લીધો હતો.
ચાર મેચ માટે લાદવામાં આવ્યો પ્રતિબંધ
ક્રિકેટ વેસ્ટ ઈન્ડિઝે જોન કેમ્પબેલની આ ક્રિયાને અનુશાસનહીન ગણાવી છે. આ પછી બોર્ડે તેના પર ચાર મેચનો પ્રતિબંધ લગાવી દીધો છે. સાથે જ જોન કેમ્પબેલે પોતાની ભૂલ સ્વીકારી છે અને માફી માંગી છે.
જોન કેમ્પબેલે પોતાના નિવેદનમાં કહી આ વાત
જોન કેમ્પબેલે તેની ક્રિયા બદલ માફી માંગી અને કહ્યું, “હું ફાઇનલમાં વિક્ષેપ પાડવા બદલ માફી માંગુ છું. મને ખબર છે કે મારા પગલાને મેચ અધિકારીઓના નિર્ણયના વિરોધ તરીકે જોવામાં આવી શકે છે. પરંતુ એ મારો ઈરાદો ન હતો. મારી આ ક્રિયાને તેમના અધિકારોને ક્ષીણ કરવા અથવા આ રમતને બદનામ કરવા તરીકે જોવી જોઈએ નહીં.
તેને વધુમાં કહ્યું કે “હું આ રમતનું સન્માન કરું છું. હું અધિકારીઓના નિર્ણયનું મહત્વ સમજું છું. વરસાદના કારણે અમ્પાયરે મેચને 20-20 ઓવરની કરી દીધી હતી. બંને કેપ્ટન અમ્પાયરના આ નિર્ણયથી ખુશ ન હતા. ફાઈનલ મેચ રદ્દ થવાને કારણે 2024-25 માટે કોઈ વિજેતા કે ઉપવિજેતા નથી.
ક્રિકેટરનો આવો છે રેકોર્ડ
જોન કેમ્પબેલે વેસ્ટ ઈન્ડિઝ માટે 26.11ની એવરેજથી 888 રન બનાવ્યા છે. આ દરમિયાન તેણે ત્રણ અર્ધસદી ફટકારી હતી. આ સિવાય તેને વનડેમાં 49.60ની એવરેજથી 248 રન બનાવ્યા છે, જેમાં એક સદી પણ સામેલ છે.
