12 એપ્રિલે સોશિયલ મેસેજિંગ એપ WhatsAppના હજારો યુઝર્સને મોટી સમસ્યાના સામનો કરવાનો વારો આવ્યો છે. વોટસએપ પર યુઝર્સને મેસેજ મોકલવામાં અને સ્ટેટસ અપલોડ કરવામાં મોટી સમસ્યાઓનો સામનો કરવો પડ્યો અને તેને લઈને તેમને ફરિયાદ પણ કરી છે. ડાઉનડિટેક્ટર વેબસાઈટ મુજબ શનિવારે સાંજે 5:22 વાગ્યા સુધીમાં WhatsApp વિરુદ્ધ ઓછામાં ઓછી 597 ફરિયાદો નોંધાઈ છે.
85 ટકા યુઝર્સે કરી ફરિયાદ
ડાઉનડિટેક્ટર અનુસાર, આ ફરિયાદોમાંથી 85 ટકા ફરિયાદો મેસેજ ના મોકલી શકવા સંબંધિત હતી. એટલું જ નહીં, 12 ટકા લોકોને એપમાં સમસ્યાઓનો સામનો કરવો પડ્યો અને 3 ટકા લોકોને લોગિન દરમિયાન સમસ્યાઓનો સામનો કરવો પડ્યો. ઘણા યુઝર્સે સોશિયલ મીડિયા પ્લેટફોર્મ X પર વોટ્સએપ ડાઉન હોવાની ફરિયાદ પણ કરી છે. એક યુઝરે આ વિશે પોસ્ટ કરી અને પૂછ્યું કે શું વોટ્સએપ ડાઉન છે, કારણ કે હું સ્ટેટસ મૂકવાનો પ્રયાસ કરી રહ્યો છું પણ તે અપલોડ થઈ રહ્યું નથી. યુઝરે તેની સાથે એક સ્ક્રીનશોટ પણ શેર કર્યો, જેમાં ‘અપલોડ પેન્ડિંગ’ સ્ટેટસ સ્પષ્ટપણે દેખાય છે.
મેટા તરફથી આ અંગે કોઈ પ્રતિક્રિયા આપવામાં આવી નથી
બીજા એક યુઝરે X પર પોસ્ટ કરીને લખ્યું, શું આ ફક્ત મારી સાથે જ થઈ રહ્યું છે કે પછી તમને પણ WhatsApp પર સ્ટેટસ મૂકવામાં સમસ્યા આવી રહી છે. જ્યારે બીજા એક યુઝરે લખ્યું, શું વોટ્સએપ ડાઉન છે? મને સંદેશા મોકલવામાં મુશ્કેલી પડી રહી છે. શું તમારી સાથે પણ આવું થઈ રહ્યું છે? વોટ્સએપ ડાઉન હોવાની ફરિયાદની વાત કરીએ તો, ઘણા લોકોને લોગ ઇન કરવામાં પણ સમસ્યાઓનો સામનો કરવો પડ્યો છે. જોકે, વોટ્સએપ ડાઉન હોવાની ફરિયાદો પર મેટા દ્વારા કોઈ નિવેદન જાહેર કરવામાં આવ્યું નથી. ઇન્સ્ટાગ્રામ અને ફેસબુક અંગે પણ યુઝર્સ દ્વારા આવી જ કેટલીક ફરિયાદો કરવામાં આવી છે. નોંધનીય છે કે આ ત્રણેય સોશિયલ મીડિયા પ્લેટફોર્મ મેટાની માલિકીના છે.
