- જાણો શું છે FBI ચીફની ભારત મુલાકાતનો કાર્યક્રમ?
- FBI ચીફની મુલાકાતને લઈને શું હશે ભારતનું વલણ?
- જાણો કયા કયા મુદ્દાઓ ઉઠી શકે છે આ મુલાકાતમાં?
અમેરિકન જાસૂસી સંસ્થા અને સુરક્ષા એંજન્સી ફેડરલ બ્યૂરો ઓફ ઇન્વેસ્ટિગેશનના પ્રમુખ આગામી સપ્તાહે ભારતના પ્રવાસે આવી રહ્યા છે. તેમની આ મુલાકાત તે સમયે થઈ રહી છે જ્યારે ગત દિવસોમાં અમેરિકન વહીવટી તંત્રએ એક ભારતીય નાગરિક અને એક ભારતીય એજન્સીના અધિકારી વિરુદ્ધ ખાલિસ્તાની આતંકી ગુરૂપતવંત સિંહ પન્નુની હત્યાનું ષડયંત્ર કરવાનો આરોપ લગાવ્યો હતો. જો કે, ભારતીય વિદેશ મંત્રાલયે આ મામલે પ્રતિક્રિયા આપતા કહ્યું છે કે આ માહિતી બંને દેશો માટે ચિંતાનો વિષય છે અને અમે જરૂરી પગલાં લેવાનો નિર્ણય કર્યો છે.
એવામાં સવાલ ઉઠી રહ્યા છે કે FBI પ્રમુખ ભારત મુલાકાતનો કાર્યક્રમ શું છે? આ મુલાકાતનો હેતુ શું હોઇ શકે? મુલાકાતને લઈને ભારતનું શું વલણ હોઇ શકે?
જાણો શું છે FBI ચીફની ભારત મુલાકાતનો કાર્યક્રમ?
FBIના ડાયરેક્ટર ક્રિસ્ટોફર એ. રે. આગામી સપ્તાહે ભારતનો પ્રવાસ કરશે. રે 11 અને 12 ડિસેમ્બરના રોજ ભારત આવશે. 2017માં FBIના ડાયરેક્ટર બન્યા બાદ ક્રિસ્ટોફર એ. રેનો આ પહેલો ભારત પ્રવાસ છે. 12 વર્ષમાં પહેલીવાર હશે જ્યારે FBI પ્રમુખ ભારતનો પ્રવાસ કરી રહ્યા છે.
ભારતમાં અમેરિકન રાજદૂત એરિક ગાર્સેટીએ FBI પ્રમુખની પ્રસ્તાવિત ભારત યાત્રાની પુષ્ટિ કરી છે. ગત દિવસોમાં ગાર્સેટીએ એક કાર્યક્રમમાં અમેરિકા-ભારત સંબંધોની મજબૂતી અને બાઈડેન વહીવટી તંત્રના ટોચના અધિકારીઓ તરફથી નવી દિલ્હીને આ મુલાકાત અંગે જાણકારી આપવામાં આવી છે.
શું છે આ મુલાકાતનો હેતુ?
એફબીઆઈના ડિરેક્ટર તેમની ભારત મુલાકાત દરમિયાન નેશનલ ઈન્વેસ્ટિગેશન એજન્સી (NIA)ના વડા દિનકર ગુપ્તા સાથે મુલાકાત કરે તેવી શક્યતા છે. આ ઉપરાંત, ક્રિસ્ટોફર એ. રે ભારતીય ગુપ્તચર એજન્સીઓ અને ગૃહ મંત્રાલયના વરિષ્ઠ અધિકારીઓ સાથે મુલાકાત કરી શકે છે. માહિતી અનુસાર, કેસ અને પુરાવા FBI ડિરેક્ટર સાથે શેર કરવામાં આવશે.
બંને પક્ષો વચ્ચે જે મુદ્દાઓ પર વાતચીત થઈ શકે છે તેમાં ખાલિસ્તાની આતંકવાદ, જમ્મુ-કાશ્મીરમાં પાકિસ્તાન પ્રાયોજિત આતંકવાદ અને ગેંગસ્ટર નેટવર્ક જેવા મુદ્દાઓનો સમાવેશ થાય છે.
આ સિવાય ખાલિસ્તાની આતંકવાદી પન્નુની હત્યાના પ્રયાસનો મામલો FBI દ્વારા ચર્ચામાં સામેલ કરી શકાય છે. વાસ્તવમાં, અમેરિકાની FBI ખાલિસ્તાની આતંકવાદી ગુરપતવંત સિંહ પન્નુની હત્યાના કાવતરાના કેસની તપાસ કરી રહી છે. હકીકતમાં, એક બ્રિટિશ દૈનિક અખબારે એક અહેવાલમાં દાવો કર્યો હતો કે અમેરિકાએ ખાલિસ્તાની આતંકવાદી પન્નુની હત્યાના ષડયંત્રને નિષ્ફળ બનાવ્યું હતું. અખબારની વાત માનીએ તો અમેરિકી સરકારે ભારત પર આ ષડયંત્રમાં સામેલ હોવાનો આરોપ લગાવ્યો હતો. આ સાથે ભારતને ચેતવણી પણ આપી હતી. જો કે, આ ઘટના ક્યારે બની તે અહેવાલમાં ઉલ્લેખ કરવામાં આવ્યો નથી.
તો બીજી બાજુ, આ કેસમાં એક કથિત આરોપી વિરુદ્ધ ન્યૂયોર્ક ડિસ્ટ્રિક્ટ કોર્ટમાં સીલબંધ કેસ દાખલ કરવામાં આવ્યો છે. આરોપી કોણ છે તે સીલબંધ કવર ખૂલ્યા બાદ જ ખબર પડશે. હાલમાં, યુએસ જસ્ટિસ ડિપાર્ટમેન્ટ ચર્ચા કરી રહ્યું છે કે શું આ સીલબંધ પરબિડીયું હવે ખોલવું જોઈએ અને આરોપો જાહેર કરવા જોઈએ કે પછી ખાલિસ્તાની આતંકવાદી હરદીપ સિંહ નિજ્જરની હત્યાની તપાસ પૂર્ણ થયા બાદ તેને ખોલવામાં આવશે. અખબારના અહેવાલ મુજબ, અમેરિકાએ ભારતને રાજદ્વારી ચેતવણી આપી હતી.
આ ઉપરાંત એક અમેરિકન અખબારે ગયા અઠવાડિયે એક અહેવાલમાં દાવો કર્યો હતો કે પન્નુની અમેરિકન ધરતી પર હત્યા કરવાની યોજના ઘડી રહ્યા હોવાની જાણ થયા બાદ બાઈડેન પ્રશાસને સીઆઈએ ડાયરેક્ટર વિલિયમ જે. બર્ન્સ અને નેશનલ ઈન્ટેલિજન્સ ડિરેક્ટર એવરિલ હેન્સને અનુક્રમે ઓગસ્ટ અને ઓક્ટોબરમાં ભારત મોકલવામાં આવ્યા હતા. તેમનો હેતુ આ બાબતની તપાસ કરવા માટે ભારત સરકાર પર દબાણ લાવવાનો અને જવાબદારોને આગળ લાવવાની માંગ કરવાનો હતો.
મુલાકાતને લઈને ભારતનું શું હશે વલણ?
અગાઉ, પન્નુના કેસમાં ભારતે કહ્યું હતું કે તે સુરક્ષા બાબતો પર યુએસ પાસેથી મળેલી માહિતીને ગંભીરતાથી લે છે, કારણ કે તે તેની પોતાની રાષ્ટ્રીય સુરક્ષા ચિંતાઓને પણ અસર કરે છે. વિદેશ મંત્રાલયના પ્રવક્તા અરિંદમ બાગચીએ કહ્યું હતું કે ભારત-યુએસ સુરક્ષા સહયોગ પર તાજેતરની ચર્ચાઓ દરમિયાન, યુએસ પક્ષે સંગઠિત ગુનેગારો, બંદૂક ચલાવનારાઓ, આતંકવાદીઓ અને અન્યો વચ્ચેના જોડાણથી સંબંધિત કેટલીક માહિતી શેર કરી હતી.
તેમણે કહ્યું કે આ માહિતી બંને દેશો માટે ચિંતાનો વિષય છે અને તેઓએ જરૂરી પગલાં લેવાનો નિર્ણય કર્યો છે. અરિંદમ બાગચીએ કહ્યું હતું કે ભારત આવી માહિતીને ગંભીરતાથી લે છે, કારણ કે તે આપણા પોતાના રાષ્ટ્રીય સુરક્ષા હિતોને પણ અસર કરે છે.
આ દરમિયાન એવી માહિતી પણ સામે આવી છે કે FBI ચીફની ભારત મુલાકાત દરમિયાન NIA તેમની સાથે પન્નુનો મુદ્દો ઉઠાવશે. તેમની ભારત મુલાકાત દરમિયાન રે દિલ્હીમાં CBI અને NIA બંનેના અધિકારીઓને મળશે. આ પહેલા વિદેશ મંત્રાલયે માહિતી આપી હતી કે આતંકવાદી પન્નુ દ્વારા દેશની સંસદ પર હુમલાની ધમકીનો મુદ્દો યુએસ અને કેનેડાના અધિકારીઓ સાથે ઉઠાવવામાં આવ્યો છે. પન્નુ નેશનલ ઈન્વેસ્ટિગેશન એજન્સી દ્વારા જાહેર કરાયેલ આતંકવાદી છે. તાજેતરમાં જ જાહેર થયેલા એક વીડિયોમાં તેણે 13 ડિસેમ્બર કે તે પહેલા સંસદ પર હુમલો કરવાની ધમકી આપી હતી.
