વર્લ્ડ ટેસ્ટ ચેમ્પિયનશિપ 2019માં શરૂ થઈ ત્યારથી એવી માંગ થઈ રહી હતી, કે આવનારા ભવિષ્યમાં વર્લ્ડ ટેસ્ટ ચેમ્પિયનશિપની ફાઇનલ અન્ય દેશોમાં પણ યોજાવી જોઈએ. અત્યાર સુધી માત્ર ઇંગ્લેન્ડ ફાઇનલ મેચોનું આયોજન કરતું આવ્યું છે. ક્રિકેટ પ્રેમીઓને આશ હતી, કે ભારતને WTC ફાઇનલના આયોજનની તક મળશે, પરંતુ હાલ એ તમામ આશાઓ પર પાણી ફરી વળ્યું હોય એવું લાગી રહ્યું છે.
ભારતીય ચાહકોની આશાઓ પર પાણી
ભારતીય ક્રિકેટ રસિકોને આશ હતી કે IPLની જેમ વર્લ્ડ ટેસ્ટ ચેમ્પિયનશિપનું પણ ભવ્ય આયોજન ભારતને કરવા મળશે. BCCI ના ભૂતપૂર્વ સચિવ જય શાહ આંતરરાષ્ટ્રીય ક્રિકેટ પરિષદ ICCના અધ્યક્ષ બન્યા પછી, એવી આશા હતી, કે આગામી ફાઇનલ અથવા તે પછી યોજાનારી અન્ય WTCની ફાઇનલ ભારતમાં યોજાઇ શકે છે. પરંતુ મીડિયા રિપોર્ટ અનુસાર એવું લાગે છે, કે ભારતીય ચાહકોની આશાઓ પર પાણી ફરી વળ્યું છે. મીડિયા રિપોર્ટ મુજબ WTCની આવનારી ફાઇનલ મેચ પણ ઇંગ્લેન્ડમાં રમાશે.
આગામી 3 ફાઇનલ ઇંગ્લેન્ડમાં
મીડિયા રિપોર્ટ અનુસાર આવનારા ભવિષ્યમાં ભારતીય ચાહકોની WTCની ફાઇનલ મેચ ભારતમાં યોજાય એ સપનું હમણાં પૂરું નહીં થઈ શકે. આગામી 3 ફાઇનલ પણ ઇંગ્લેન્ડમાં જ યોજાશે. અત્યાર સુધી ટુર્નામેન્ટની બધી ફાઇનલ આ ઇંગ્લેન્ડમાં જ યોજાઈ છે. ICCએ 2019માં વર્લ્ડ ટેસ્ટ ચેમ્પિયનશિપની શરૂઆત કરી હતી અને તેની પહેલી ફાઇનલ 2021માં રમાઈ હતી. આ ટાઇટલ મેચ ઇંગ્લેન્ડના સાઉથમ્પ્ટનમાં યોજાઈ હતી. હાલ ત્રીજી આવૃત્તિની ફાઇનલ પણ લંડનના લોર્ડ્સમાં ખાતે રમાઈ રહી છે.
BCCI એ લાંબો સમય રાહ જોવી પડશે
મીડિયા રિપોર્ટ અનુસાર દાવો કરવામાં આવ્યો છે, કે BCCIએ આગામી 3 ફાઇનલ મેચ માંથી એક ભારતમાં યોજવામાં આવે તેવી માંગ કરી હતી, પરંતુ ભારતની આ આયોજનની માંગને નકારી કાઢવામાં આવી છે. આ સમાચાર ભારતીય ચાહકો માટે ખૂબજ માઠા સાબિત થઈ શકે છે. આનાથી સ્પષ્ટ થાય છે, કે ભારતમાં WTC ફાઇનલનું આયોજન કરવા માટે BCCI ને ઓછામાં ઓછા 2033 સુધી રાહ જોવી પડશે.
