શું પાકિસ્તાન સેમિફાઈનલની રેસમાંથી થશે બહાર? જુઓ સમીકરણો

વર્લ્ડ કપ 2023માં ટોપ-4 ટીમો આખરે નક્કી થઈ ગઈ છે. ગુરુવારે (9 નવેમ્બર) રાત્રે શ્રીલંકા સામે ન્યૂઝીલેન્ડની જીત સાથે, સેમિફાઇનલની સ્થિતિ લગભગ સ્પષ્ટ થઈ ગઈ હતી. અગાઉ, 40 મેચોમાં, માત્ર ત્રણ ટીમો અંતિમ ચાર માટે ટિકિટ સુરક્ષિત કરવામાં સફળ રહી હતી. 41મી મેચના પરિણામ બાદ ચોથા સ્થાનનો નિર્ણય ન્યૂઝીલેન્ડે કર્યો હતો.

હવે પાકિસ્તાન અને અફઘાનિસ્તાન માટે ટોપ-4માં આવવું અશક્ય છે. કારણ કે જો આ બંને ટીમો ચોથા સ્થાને પહોંચવા માંગે છે, તો તેમને તેમની છેલ્લી મેચ અનુક્રમે 287 અને 438 રનથી જીતવી પડશે, જે અશક્ય છે. એકંદરે, પાકિસ્તાન અને અફઘાનિસ્તાન સેમિફાઇનલમાં ખૂબ જ નજીકથી ચૂકી જાશે તેવું લાગી રહ્યું છે.

વર્લ્ડ કપ સેમિફાઇનલ ઉપરાંત ચેમ્પિયન્સ ટ્રોફી 2025ની ક્વોલિફિકેશન માટેની રેસ પણ હતી. આ રેસ એ ટીમો વચ્ચે હતી જે પહેલાથી જ સેમીફાઈનલની રેસમાંથી બહાર થઈ ગઈ હતી. અત્યારે આ રેસમાં ઈંગ્લેન્ડ અને બાંગ્લાદેશ આગળ હોય તેવું લાગી રહ્યું છે. તમને જણાવી દઈએ કે પોઈન્ટ ટેબલની ટોચની 8 ટીમો જ ચેમ્પિયન્સ ટ્રોફી 2025 માટે ક્વોલિફાઈ કરી શકશે.

ટીમ	મેચ	જીત	હાર	પોઈન્ટ	નેટ રનરેટ
ભારત	8	8	0	16	+2.456
સાઉથ આફ્રિકા	8	6	2	12	+1.376
ઓસ્ટ્રેલિયા	8	6	2	12	+0.861
ન્યૂઝીલેન્ડ	9	5	4	10	+0.743
પાકિસ્તાન	8	4	4	8	+0.036
અફઘાનિસ્તાન	8	4	4	8	-0.338
ઈંગ્લેન્ડ	8	2	6	4	-0.885
બાંગ્લાદેશ	8	2	6	4	-1.142
શ્રીલંકા	9	2	7	4	-1.419
નેધરલેન્ડ	8	2	6	4	-1.635

પોઈન્ટ ટેબલની સ્થિતિ

જો વાત કરીએ વર્લ્ડ કપ 2023ના પોઈન્ટ ટેબલની તો ભારત અત્યાર સુઘીની તમામ મેચો જીતી છે. તે સાથે જ 16 પોઈન્ટ અને +2.456 નેટ રનરેટ સાથે ટોપ પર છે. જ્યારે સાઉથ આફ્રિકા અને ઓસ્ટ્રેલિયા 12 પોઈન્ટ સાથે અનુક્રમે +1.376 અને +0.861 નેટ રનરેટ સાથે બીજા અને ત્રીજા નંબ પર છે. તો ન્યૂઝીલેન્ડ 10 પોઈન્ટ અને +0.743 નેટ રનરેટ સાથે ચોથા સ્થાન પર છે. આ સાથે જ પાકિસ્તાન અને અફઘાનિસ્તાન 8 પોઈન્ટ સાથે અનુક્રમે +0.036 અને -0.338 નેટ રનરેટ સાથે 5 અને 6 સ્થાને છે. ત્યારે ઈંગ્લેન્ડ, બાંગ્લાદેશ, શ્રીલંકા અને નેધરલેન્ડ 4 પોઈન્ટ સાથે અનુક્રમે 7,8,9 અને 10 ક્રમે છે. તેમજ આ ચારેય ટીમો ટુર્નામેન્ટમાંથી બહાર થઈ ગઈ છે.