હાલ દક્ષિણ આફ્રિકા પાસે 26 વર્ષ જૂનો હિસાબ ચૂકવવાનો એક સુવર્ણ અવસર આવ્યો છે. WTC ફાઇનલમાં જો દક્ષિણ આફ્રિકા બાજી મારી જાય છે, તો આવું થતાં જ દક્ષિણ આફ્રિકાને બેવડો ફાયદો થશે. ઓસ્ટ્રેલિયા સામે બદલો લેવાની સાથે-સાથે ICC ટ્રોફી જીતવાનો ટીમનો વનવાસ પણ પૂરો થશે. ઓસ્ટ્રેલિયા અને દક્ષિણ આફ્રિકા વચ્ચેની આ મેચમાં ફરક માત્ર એટલો છે કે આ વખતે વિજયનો રથ 26 વર્ષ પહેલાની જેમ ઓસ્ટ્રેલિયા તરફ નથી જઈ રહ્યો.
એક કેચ ચુકાયો અને મેચ હાથમાંથી સરી
દક્ષિણ આફ્રિકા અને ઓસ્ટ્રેલિયા વચ્ચે રમાઈ રહેલી મેચમાં હાલ દક્ષિણ આફ્રિકાનું પલડું વધારે ભારે દેખાઈ રહ્યું છે. રસપ્રદ વાત એ છે કે, આજથી 26 વર્ષ પહેલા ક્રિકેટ જગતમાં 13 જૂન 2025ના દિવસ જેવી એક ઘટના ઘટી હતી, જેનાથી મેચનું પરિણામ આખું બદલાઈ ગયું હતું. ગઇકાલના દિવસે એક એવી ઘટના બની હતી, જે 13 જૂન 1999ના રોજ બનેલી એક ઘટનાની યાદ તાજી કરી દે છે. સ્ટીવ વો સાથે બનેલી એક ઘટના જેમાં એક કેચ ચુકાઈ ગયો અને મેચ હાથમાંથી સરી ગઈ હતી.
26 વર્ષ જુની યાદો તાજા થઈ
તારીખ 13 જૂન 1999 ના રોજ ICC ODI વર્લ્ડ કપમાં ઓસ્ટ્રેલિયા અને દક્ષિણ આફ્રિકા વચ્ચે એક મેચ રમાઈ હતી. તે મેચમાં, વિશ્વ ક્રિકેટના મહાન ફિલ્ડરોમાંનો એક, દક્ષિણ આફ્રિકાનો હર્શેલ ગિબ્સ તત્કાલીન ઓસ્ટ્રેલિયન કેપ્ટન સ્ટીવ વોનો એક કેચ ચૂકી ગયો હતો. પરિણામ એ આવ્યું કે તે મેચમાં, સ્ટીવ વો તે તકનો લાભ લઈને એવી શાનદાર સદી ફટકારી ગયો કે ટીમનો ભવ્ય વિજય થઈ ગયો. ગઇકાલે એવીજ રીતે 13 જૂન 2025ના રોજ ટેમ્બા બાવુમાનો કેચ ચૂકી ચુકાઈ ગયો. અને હવે લાગી રહ્યું છે કે ઇતિહાસ ફરીવાર એનો રંગ જમાવશે.
કેપ્ટન પાસે આવી સુવર્ણ તક
26 વર્ષ પછી, એટલે કે 13 જૂન 2025ના રોજ, WTC ફાઇનલમાં લોર્ડ્સના મેદાન પર આવી જ ઘટના બનતી જોવા મળી. આ વખતે, ઓસ્ટ્રેલિયાના શ્રેષ્ઠ ફિલ્ડરોમાંના એક, સ્ટીવ સ્મિથ, દક્ષિણ આફ્રિકાના વર્તમાન ટેસ્ટ કેપ્ટન ટેમ્બા બાવુમાનો કેચ ચૂકી ગયો. તેનો ફાયદો ઉઠાવીને, બાવુમા WTC ફાઇનલના ત્રીજા દિવસના અંત સુધી 65 રન પર અણનમ રહ્યો હતો. દક્ષિણ આફ્રિકાને હવે મેચ જીતવા માટે 69 રનની જરૂર છે. આનો અર્થ એ થયો કે કેપ્ટન બાવુમા પાસે દક્ષિણ આફ્રિકાને મેચ જીતવવા માટે એક સુવર્ણ તક રહેલી છે.
