પવનચક્કીમાંથી કોપર વાયર ચોરી કરતી ગેંગનો પર્દાફાસ : મુખ્ય સૂત્રધાર ઝડપાયો

પવનચક્કીમાંથી કોપર વાયર ચોરી કરતી ગેંગનો પર્દાફાસ : મુખ્ય સૂત્રધાર ઝડપાયો

મોજશોખ માટે ગેંગ બનાવી ચોરી કરનાર ચોટીલાના શખ્સ પાસેથી કોપર વાયર અને મોબાઈલ સહિતનો મુદ્દામાલ જપ્ત, અન્ય આરોપીઓ ફરાર

અગ્ર ગુજરાત, રાજકોટ

રાજકોટ જિલ્લાના ભાડલા નજીક બરવાળા સીમ વિસ્તારમાં પવનચક્કીમાંથી થયેલી કોપર વાયર ચોરીનો ભેદ રૂરલ એલસીબી પોલીસે ઉકેલી ગેંગના મુખ્ય સૂત્રધારને ઝડપી પાડ્યો છે. પોલીસે આરોપી પાસેથી ચોરાયેલ કોપર વાયર અને અન્ય સામાન મળી કુલ આશરે રૂ. 1.44 લાખનો મુદામાલ કબજે કર્યો છે, જ્યારે ગેંગના અન્ય સભ્યો હાલ ફરાર છે.
પોલીસ દ્વારા મળતી માહિતી મુજબ, આશરે બે મહિના પહેલા ભાડલા-બરવાળા વિસ્તારમાં આવેલી પવનચક્કીમાંથી અજાણ્યા તસ્કરો દ્વારા કોપર વાયર ચોરી કરવામાં આવ્યો હતો. આ બનાવ બાદ પોલીસ તપાસમાં લાગી હતી.
જિલ્લા પોલીસ વડા વિજયસિંહ ગુર્જરના માર્ગદર્શન હેઠળ નાસતા ફરતા આરોપીઓને પકડી પાડવા માટે રૂરલ એલસીબી પીઆઈ વી.વી. ઓડેદરાની આગેવાનીમાં ટીમ પેટ્રોલિંગમાં હતી. દરમિયાન મળેલી ચોક્કસ બાતમીના આધારે ચોટીલાના ગુંદાગામમાં રહેતા દિલીપ છગન સોલંકીને ઝડપી પાડવામાં આવ્યો હતો.
પોલીસે તેની પાસે થી અંદાજે 34 કિલો જેટલો કોપર વાયર, જેની કિંમત રૂ. 34 હજાર જેટલી થાય છે, તેમજ બે મોબાઈલ ફોન મળી કુલ રૂ. 1.44 લાખનો મુદામાલ કબજે કર્યો હતો. પૂછપરછ દરમિયાન દિલીપે ચોરીનો ગુનો કબૂલ કર્યો હતો.
તપાસમાં સામે આવ્યું છે કે દિલીપ સોલંકીએ મોજશોખ પૂરાં કરવા માટે ગુંદાગામ અને આસપાસના વિસ્તારોના શખ્સો સાથે ગેંગ બનાવી હતી. આ ગેંગમાં અજીત વિહા ગાબુ (તાજપર), રગો ઉર્ફે ગુજ્જર ભોળા પલાળિયા અને રણજીત વશરામ સાઢમિયા (બંને ગુંદાગામ, ચોટીલા) સહિતના શખ્સો સંડોવાયેલા હોવાનું ખુલ્યું છે.
પોલીસે જણાવ્યું છે કે, આ ગેંગ દ્વારા અગાઉ પણ ચોરીના બનાવોને અંજામ આપવામાં આવ્યો હોવાની શક્યતા છે. હાલ ફરાર આરોપીઓને ઝડપી પાડવા માટે શોધખોળ તેજ કરવામાં આવી છે.
ઉલ્લેખનીય છે કે પકડાયેલ દિલીપ સોલંકી સામે રાજકોટ શહેર અને સુરેન્દ્રનગર જિલ્લામાં મળી કુલ આઠ જેટલા ગુનાઓ નોંધાયેલા છે, જેના આધારે તે ચોરી સહિતના ગુનાઓમાં કુખ્યાત ગણાય છે.
આ સમગ્ર કામગીરી રૂરલ એલસીબી ટીમ દ્વારા ઝડપી અને સુનિયોજિત રીતે પાર પાડવામાં આવી છે. પોલીસે વધુ તપાસ હાથ ધરી ગેંગના અન્ય સભ્યોને ઝડપવાની દિશામાં કાર્યવાહી શરૂ કરી છે.