ભાવનગરમાં મહિલા પોલીસ કર્મચારી પર દુષ્કર્મ, ખેડામાં કોન્સ્ટેબલે યુવતીનો દેહ અભડાવ્યો

 ભાવનગરમાં મહિલા પોલીસ કર્મચારી પર દુષ્કર્મ, ખેડામાં કોન્સ્ટેબલે યુવતીનો દેહ અભડાવ્યો

 સોશ્યલ મીડિયામાં સંપર્ક થયા બાદ મહિલા કર્મીને ધમકી આપી વારંવાર દુષ્કર્મ : પતિના અણબનાવની અરજી કરવા જતા પરિણીતાની લાજ લૂંટતો કોન્સ્ટેબલ

અગ્ર ગુજરાત, ભાવનગર

રાજયના પોલીસ વિભાગના બે અલગ-અલગ કિસ્સા સામે આવ્યો છે. જેમાં ભાવનગરમાં મહિલા પોલીસ કર્મચારી પર દુષ્કર્મની ઘટના બની છે તો ખેડામાં પોલીસ કોન્સ્ટેબલે યુવતીનો દેહ અભડાવ્યાનો ચકચારી કિસ્સો સામે આવ્યો છે.

ભાવનગર શહેરમાં સોશિયલ મીડિયાના માધ્યમથી સંપર્કમાં આવેલી એક મહિલાને ધાકધમકી આપી દુષ્કર્મ આચરવામાં આવ્યું હોવાની ઘટના સામે આવી છે, જેમાં ભોગ બનનાર મહિલા પોલીસ કર્મચારી હોવાનું જાણવા મળ્યું છે.

ઘટનાની મળતી પ્રાથમિક માહિતી અનુસાર, પીડિત મહિલા પોલીસ કર્મચારી અને આરોપી યુવકનો સોશિયલ મીડિયા દ્વારા સંપર્ક થયો હતો. સંપર્કમાં આવ્યા બાદ બંને વચ્ચે વાતચીત શરૂ થઈ હતી. જોકે, આ મિત્રતાનો ગેરફાયદો ઉઠાવી આરોપીએ મહિલા પોલીસકર્મીને ધાકધમકી આપીને તેની સાથે દુષ્કર્મ આચર્યું હતું. આરોપીએ પીડિતાને ગંભીર પરિણામો ભોગવવાની ધાકધમકી આપી અનેકવાર આ કૃત્ય આચર્યું હોવાનું ફરિયાદમાં ઉલ્લેખ કરાયો છે.

20 જાન્યુઆરીની મોડી રાત્રે ગંગાજળિયા પોલીસ સ્ટેશનમાં ફરિયાદ નોંધાયા બાદ પોલીસ વિભાગ એક્શનમાં આવ્યો છે. આ સમગ્ર કેસની તપાસ ભાવનગર સિટી Dy.SP આર. આર. સિંઘલને સોંપવામાં આવી છે. પોલીસે આરોપીની ધરપકડ કરવા માટે ચક્રો ગતિમાન કર્યા છે. આરોપી સિહોરનો રહેવાસી હોવાનું જાણવા મળી રહ્યું છે.

ખેડા જિલ્લામાં આવેલા મહેમદાવાદમાં પોલીસ કોન્સ્ટેબલ દ્વારા એક મહિલાનું શોષણ કરવામાં આવ્યું હતું. આરોપી કોન્સ્ટેબલ પ્રવિણસિંહ ચૌહાણ સામે આ મહિલાએ પોલીસ મથકે ફરિયાદ નોંધાવી છે. હાલ પ્રવિણસિંહ ચૌહાણ નડિયાદ પોલીસમાં ફરજ બજાવે છે.લગ્નની લાલચ આપી મહિલાનું શારીરિક શોષણ કર્યાનો આક્ષેપ પીડિતા દ્વારા લગાવવામાં આવ્યો છે.

મહિલાએ જણાવ્યું હતું કે, પરિણીતના 10 વર્ષના લગ્ન જીવનમાં પતિના ત્રાસથી અરજી કરવા વારંવાર પોલીસ સ્ટેશન જતી હતી. આરોપી કોન્સ્ટેબલ પ્રવિણસિંહ ચૌહાણ સાથે પોલીસ સ્ટેશનમાં તેના પતિ સાથેના અણબનાવની અરજી આપવા સમયે મુલાકાત થઈ હતી. જે બાદ તેઓ વચ્ચે મિત્રતા બંધાઈ હતી. જે બાદ મહિલાને પ્રેમજાળમાં ફસાવી સતત શોષણ કર્યું હતું.

આરોપી કોન્સ્ટેબલ પ્રવિણસિંહ ચૌહાણે શારીરિક સંબંધ બાંધ્યા બાદ લગ્નનો ખોટો વાયદો કર્યો હતો. આ વચ્ચે મહિલા ગર્ભવતી થતા આરોપી કોન્સ્ટેબલ પ્રવિણસિંહ ચૌહાણ દ્વારા ગર્ભપાત કરાવવા દબાણ કરવામાં આવ્યું હતું. આરોપી કોન્સ્ટેબલ પ્રવિણસિંહ ચૌહાણ વિરૂદ્ધ જિલ્લા પોલીસ વડાને લેખિતમાં ફરિયાદ પીડિતા દ્વારા કરવામાં આવી છે.

વારંવાર શારીરિક સંબંધ બાંધવાથી મહિલા ગર્ભવતી થઈ હતી. જે કારણે આરોપી કોન્સ્ટેબલ પ્રવિણસિંહ ચૌહાણે ગર્ભપાત કરાવવા પીડિતાને દબાણ કર્યું હતું. ગત 13 જાન્યુઆરીના રોજ પણ મહિલાને 3 દિવસ સુધી ગોંધી રાખી બળજબરી પૂર્વક શારીરિક સંબંધ બાંધ્યો હોવાનો આક્ષેપ પણ પીડિતા દ્વારા કરવામાં આવી રહ્યો છે.

મહિલાના જણાવ્યા અનુસાર, લગ્નની લાલચ આપ્યા બાદ હવે આરોપી કોન્સ્ટેબલ પ્રવિણસિંહ ચૌહાણે સંબંધ તોડી નાંખ્યા છે. આરોપી કોન્સ્ટેબલ પ્રવિણસિંહ ચૌહાણે પીડિતાને કહ્યુ કે, હું તને 10 લાખ રૂપિયા આપુ અથવા તો તું મરી જા. આમ કહી આરોપી કોન્સ્ટેબલ પ્રવિણસિંહ ચૌહાણે મહિલાનો સંપૂર્ણ સંપર્ક તોડી નાંખતા હારી થાકી મહિલાએ જિલ્લા પોલીસ વડા સમક્ષ લેખિત ફરિયાદ કરી ન્યાયની માગ કરી છે.