- વર્લ્ડકપ 2023 રોમાંચક મોળ પર આવ્યો
- 3 ટીમોએ સેમીફાઈનલમાં કરી લીધી છે એન્ટ્રી
- વિરાટ કોહલી સૌથી વધુ ક્રીઝ પર રહ્યો
વિરાટ કોહલીએ વર્લ્ડકપ 2023માં શાનદાર બેટિંગ કરીને ઘણા રેકોર્ડ પોતાના નામે કર્યા છે. કોહલીએ વનડે ફોર્મેટમાં સૌથી વધુ આંતરરાષ્ટ્રીય સદી ફટકારવા મામલે સચિન તેંડુલકરની બરાબરી કરી છે. આ સાથે કોહલીના નામે વધુ એક ખાસ રેકોર્ડ નોંધાયો છે. તે આ વર્લ્ડકપમાં બેટિંગ માટે સૌથી લાંબો સમય ક્રીઝ પર વિતાવનારો બેટ્સમેન બન્યો છે. ક્રીઝ પર વધુ સમય રહેવા મામલે કોહલીની બરાબરીમાં કોઈ ખેલાડી નથી.
ક્રીઝ પર રહેવા મામલે રોહિત બીજા નંબરે
મીડિયા રિપોર્ટ અનુસાર, વિરાટે આ વર્લ્ડકપમાં અત્યાર સુધી બેટિંગ માટે લગભગ 14 કલાક અને 39 મિનિટ ક્રીઝ પર વિતાવી છે. આ બાબતમાં બાકીના ભારતીય ખેલાડીઓ ઘણા પાછળ છે. રોહિત શર્મા બીજા નંબર પર છે. રોહિતે 8 કલાક અને 23 મિનિટ વિતાવી છે, જ્યારે કેએલ રાહુલ ત્રીજા નંબર પર છે. રાહુલે 7 કલાક અને 20 મિનિટ અને શ્રેયસ અય્યર ચોથા અને શુભમન ગિલ પાંચમા ક્રમે છે. અય્યરે 6 કલાક અને 29 મિનિટ વિતાવી છે, જ્યારે ગિલે 5 કલાક અને 52 મિનિટ વિતાવી છે.
કોહલીએ વર્લ્ડકપ 2023માં 2 સદી ફટકારી
વર્લ્ડકપ 2023માં કોહલીના પ્રદર્શનની વાત કરવામાં આવે તો, તે ઘણું સારું રહ્યું છે. કોહલીએ વર્લ્ડકપમાં 2 સદી અને 4 ફિફ્ટી ફટાકારી છે. કોહલીએ સાઉથ આફ્રિકા સામે 101 રનની અણનમ ઈનિંગ રમી હતી, જ્યારે બાંગ્લાદેશ વિરુદ્ધ અણનમ 103 રન બનાવ્યા હતા. કોહલીએ ન્યૂઝીલેન્ડ સામે 95 રન, શ્રીલંકા સામે 88 રન, ઓસ્ટ્રેલિયા સામે 85 રન અને અફઘાનિસ્તાન સામે અણનમ 55 રન બનાવ્યા હતા.
ટીમ ઈન્ડિયાની સેમીફાઈનલમાં એન્ટ્રી
ઉલ્લેખનીય છે કે, ટીમ ઈન્ડિયા સેમીફાઈનલમાં પહોંચી ગઈ છે. ઓસ્ટ્રેલિયા અને સાઉથ આફ્રિકાએ પણ સેમીફાઇનલમાં જગ્યા બનાવી છે. વર્લ્ડકપ 2023ની પ્રથમ સેમીફાઇનલ 15 નવેમ્બરે અને બીજી સેમીફાઇનલ 16 નવેમ્બરે રમાશે, જ્યારે ફાઈનલ મેચ 19 નવેમ્બરે અમદાવાદમાં રમવામાં આવશે.
