- ઉત્તર કોરિયાની મુલાકાતે પહોંચ્યા રશિયાના રાષ્ટ્રપતિ પુતિન
- બંને દેશો અમેરિકન પ્રતિબંધો હટાવવા માટે થશે એક!
- કિમ રેડ કાર્પેટ પર પુતિનની રાહ જોતા જોવા મળ્યા
રશિયાના રાષ્ટ્રપતિ વ્લાદિમીર પુતિન બુધવારે વહેલી સવારે ઉત્તર કોરિયા પહોંચ્યા, જ્યાં કોરિયાના તાનાશાહ કિમ જોંગ ઉને તેમનું ખૂબ જ ઉત્સાહથી સ્વાગત કર્યું. એરપોર્ટ પર રિસીવ કર્યા બાદ કિમ ત્યાંથી પુતિન સાથે એ જ કારમાં બેસીને રવાના થયા હતા. પુતિને સમગ્ર વિશ્વને ખાસ કરીને પશ્ચિમી દેશોની ઉંઘ ઉડાડતા કહ્યું કે બંને દેશો અમેરિકન પ્રતિબંધો હટાવવા માટે એકબીજાને સહયોગ કરવા માંગે છે.
ઉત્તર કોરિયાના નેતા કિમ જોંગ ઉને પ્યોંગયાંગ એરપોર્ટ પર પુતિન સાથે મુલાકાત કરી હતી. ઉત્તર કોરિયાની સત્તાવાર એક ન્યૂઝ એજન્સીએ જણાવ્યું કે તેઓએ હાથ મિલાવ્યા અને ગળે લગાવ્યા અને ત્યારબાદ કિમ પુતિન સાથે કારમાં બેસીને તેમને પ્યોંગયાંગના કુમસુસન સ્ટેટ ગેસ્ટ હાઉસ તરફ લઈ ગયા. એજન્સીએ તેમની બેઠકને એક ઐતિહાસિક ઘટના ગણાવી જે બંને દેશોની મિત્રતા અને એકતાની ‘અજેયતા અને ટકાઉપણા’ને દર્શાવે છે.
https://x.com/upholdreality/status/1803140296777056696
24 વર્ષમાં પ્રથમ વખત કોરિયાની મુલાકાતે પુતિન
ઉત્તર કોરિયા એક એવો દેશ છે જે વિશ્વના અન્ય ભાગોથી અલગ છે, જ્યાં પુતિન 24 વર્ષમાં પ્રથમ વખત મુલાકાતે આવ્યા છે. વિદેશી નેતાઓ અહીં ભાગ્યે જ જોવા મળે છે. આવી સ્થિતિમાં, પુતિનની કોરિયા મુલાકાત કોરિયા માટે જ એક મોટી ઘટના હતી, જેના માટે જોરશોરથી તૈયારીઓ કરવામાં આવી હતી.
પુતિનના સ્વાગત માટે જોરશોરથી કરાઈ તૈયારી
એક વીડિયો સામે આવ્યો છે જેમાં એરપોર્ટ પર વિશાળ રેડ કાર્પેટ પાથરવામાં આવી રહી છે. કિમ રેડ કાર્પેટ પર પુતિનની રાહ જોતા જોવા મળી રહ્યા છે. જેવા જ પુતિન પોતાના વિમાનની સીડીઓથી નીચે આવે છે, કિમ આગળ વધીને તેમની સાથે હાથ મિલાવે છે અને પછી બંને નેતાઓ ખૂબ જ જોશથી ભેટતા જોવા મળે છે. બંને નેતાઓ થોડીવાર વાતચીત કરે છે અને પુતિન ફરી એકવાર કિમને ગળે લગાવે છે, ત્યારબાદ કિમ તેમને ચાલવા માટે ઈશારો કરે છે.
