- રણપ્રદેશ એવા દુબઈમાં મૂશળધાર વરસાદ
- ભારે વરસાદને લીધે ફલાઈટ, મેટ્રો, બસ સેવા પ્રભાવિત
- ભારે વરસાદને કારણે ઘણાં લોકો લાપતા પણ છે
આખા વિશ્વમાં રણપ્રદેશ તરથી જાણીતા એવા સંયુક્ત આરબ અમીરાત અને દુબઈમાં વરસાદે કેર મચાવ્યો છે. સોમવારની મોડીરાતથી મંગળવાર સવાર સુધી UAEના ઘણા ભાગોમાં ભારે વરસાદ ચાલુ રહ્યો હતો, ત્યારબાદ સ્થિતિ ગંભીર જોવા મળી હતી. રાજધાની દુબઈમાં ભારે વરસાદ બાદ પૂર જેવી સ્થિતિ સર્જાઈ હતી. દુબઈની શેરીઓ, ઘરો અને મૉલમાં પાણી ભરાઈ ગયા હતા. ભારે વરસાદ વચ્ચે સત્તાવાળાઓએ ચેતવણી જાહેર કરી છે. રાષ્ટ્રીય હવામાન કેન્દ્રે દેશના ઘણા વિસ્તારોમાં રેડ એલર્ટ જાહેર કર્યું છે અને લોકોને ‘સતર્ક’ રહેવાની અપીલ કરી છે. બુધવારે સાંજે 6 વાગ્યા સુધી એલર્ટ જારી કરવામાં આવ્યું છે.
વરસાદી કેર યથાવત્
દુબઈ ઉપરાંત ઓમાનમાં પણ ભારે વરસાદે તબાહી મચાવી છે. અહીં વરસાદના કારણે 18 લોકોનાં મોત થયા છે. આ સિવાય અબુ ધાબી અને અલ આઈન જેવા શહેરોમાં ભારે વરસાદ બાદ પૂર જેવી સ્થિતિ સર્જાઈ છે. ઘણા મોટા રાજમાર્ગો અને એરપોર્ટ પર પાણી ભરાઈ ગયા છે, જેના કારણે હવાઈ અવરજવર પર ખરાબ અસર પડી છે. ભારે વરસાદને કારણે ઘણા લોકો લાપતા પણ છે.
લોકોને સલાઈ અપાઈ
મળતી માહિતી અનુસાર, રાષ્ટ્રીય હવામાન કેન્દ્રએ બુધવાર સુધી દુબઈ, અબુ ધાબી અને શારજાહ સહિત ઘણા વિસ્તારોમાં ભારે વરસાદની આગાહી કરી છે. રાષ્ટ્રીય હવામાન કેન્દ્રમાં કામ કરતા અહેમદ હબીબે જણાવ્યું હતું કે, “દુબઈ, અબુ ધાબી, શારજાહ અને અમીરાતના અન્ય સ્થળોએ માત્ર ભારે વરસાદ જ નહીં પરંતુ કરા પડવાની પણ સંભાવના છે.” લોકોને પૂરગ્રસ્ત વિસ્તારોથી દૂર, સુરક્ષિત અને ઊંચા સ્થળોએ તેમના વાહનો પાર્ક કરવાની સલાહ આપવામાં આવી છે. વરસાદના કારણે લોકોને મસ્જિદને બદલે ઘરે જ નમાઝ અદા કરવા કહેવામાં આવ્યું છે. અધિકારીઓએ જરૂરી હોય ત્યારે જ ઘરની બહાર જવાની સલાહ આપી છે.
અત્ર તત્ર પાણી, વરસાદી પાણીથી હાલાકી
ભારે વરસાદ અને વાવાઝોડાને લીધે દુબઈ ઈન્ટરનેશનલ એરપોર્ટ પાણીમાં ગરકાવ થઈ ગયું હતું. જેથી 50થી વધુ ફલાઈટ રદ્દ કરવામાં આવી છે. દુબઈ એરપોર્ટના પ્રવક્તાએ જણા્યું કે ભીષણ તોફાનને લીધે સમસ્યા સર્જાઈ છે. પરંતુ હવે રિકવરી મોડ છે. જેથી વરસાદને લીધે દુબઈ મેટ્રોની રેડલાઈન સેવાને અસર થઈ છે. ઘણા મેટ્રો સ્ટેશન પર પાણી ભરાયા છે. દુબઈથી અબુ ધાબી, શારજાહ અને અજમાનની બસ સેવા બંધ કરાઈ છે. સ્થિતિ એવી સર્જાઈ છે કે શોપિંગ સેન્ટર, દુઈબ મૉલ અને એમિરેટસમાં વરસાદી પાણી ભરાઈ ગયા છે.
ભારે વરસાદને લીધે શાળા-કૉલેજ બંધ
ઉલ્લેખનીય છે કે, સંયુક્ત આરબ અમીરાત એક રણપ્રદેશ હોવાથી વરસાદ એક અસામાન્ય ઘટના છે. જેથી વરસાદને લીધે અહીં યુએઈમાં શાળા-કૉલેજ બંધ છે. કરાની સાથે તોફાની વરસાદની આગાહી કરવામાં આવી છે. સંયુક્ત આરબ અમીર સિવાય કેટલાક વિસ્તારમાં આગામી 24 કલાકમાં 80 મિલિમીટરથી વધુ વરસાદ એટલે કે ત્રણ ઈંચથી વધુ નોંધાયો છે.. વાર્ષિક સરેરાશ કરતાં વધુ છે.
