- સાઉથ આફ્રિકા અને ન્યુઝીલેન્ડ વચ્ચે 2 મેચની ટેસ્ટ સિરીઝ
- ન્યુઝીલેન્ડ સાઉથ આફ્રિકાને પ્રથમ મેચમાં 281 રને હરાવ્યું
- વર્લ્ડ ટેસ્ટ ચેમ્પિયનશિપ પોઈન્ટ ટેબલમાં ન્યુઝીલેન્ડ ટોપ પર
સાઉથ આફ્રિકા હાલમાં બે ટેસ્ટ મેચની સિરીઝ માટે ન્યુઝીલેન્ડના પ્રવાસે છે. જ્યાં પ્રથમ ટેસ્ટમાં ન્યૂઝીલેન્ડે સાઉથ આફ્રિકાને 281 રનના વિશાળ અંતરથી હરાવ્યું હતું. આ જીત સાથે ન્યૂઝીલેન્ડે એક મોટી છલાંગ લગાવી છે અને વર્લ્ડ ટેસ્ટ ચેમ્પિયનશિપ 2023-25 પોઈન્ટ ટેબલમાં પ્રથમ સ્થાને પહોંચી ગયું છે. જ્યારે ન્યુઝીલેન્ડની જીત બાદ ભારતને ટોપ-2માંથી બહાર થવું પડ્યું હતું. હકીકતમાં, સાઉથ આફ્રિકાના ન્યૂઝીલેન્ડ પ્રવાસની પ્રથમ ટેસ્ટ મેચ માઉન્ટ મૌંગાનુઇ સ્ટેડિયમમાં રમાઈ હતી.
આ મેચમાં ન્યૂઝીલેન્ડે સાઉથ આફ્રિકાને જીતવા માટે 529 રનનો ટાર્ગેટ આપ્યો હતો, પરંતુ સાઉથ આફ્રિકાની ટીમ ચોથી ઈનિંગમાં માત્ર 247 રનમાં જ ઓલઆઉટ થઈ ગઈ હતી. આ મોટી જીત બાદ ન્યૂઝીલેન્ડને વર્લ્ડ ટેસ્ટ ચેમ્પિયનશિપ 2023-25ના પોઈન્ટ ટેબલમાં મોટો ફાયદો થયો છે.
ન્યુઝીલેન્ડ ટોપ પર પહોંચી ગયું
સાઉથ આફ્રિકાને 281 રને હરાવીને ન્યૂઝીલેન્ડ વર્લ્ડ ટેસ્ટ ચેમ્પિયનશિપ 2023-25 પોઈન્ટ ટેબલમાં ટોચ પર પહોંચી ગયું છે. જ્યારે ભારત અને ઓસ્ટ્રેલિયાએ એક-એક સ્થાન ગુમાવ્યું છે. ન્યુઝીલેન્ડ હાલમાં પોઈન્ટ ટેબલમાં 66.66 પોઈન્ટની ટકાવારી સાથે પ્રથમ સ્થાને છે. ઓસ્ટ્રેલિયા 55 પોઈન્ટ ટકાવારી સાથે બીજા સ્થાને છે. ઓસ્ટ્રેલિયાએ અત્યાર સુધી 10 મેચ રમી છે, જેમાં તેણે 6માં જીત મેળવી છે. જ્યારે ભારત 6માંથી 3 મેચ જીતીને 52.77 પોઈન્ટ ટકાવારી સાથે ત્રીજા સ્થાને પહોંચી ગયું છે.
આફ્રિકાના દિગ્ગજ ખેલાડીઓ ટેસ્ટમાંથી બહાર
ન્યુઝીલેન્ડના પ્રવાસે ગયેલી સાઉથ આફ્રિકાની ટીમના લગભગ તમામ ખેલાડીઓ બિનઅનુભવી છે. તેના સ્ટાર બેટ્સમેન હાલમાં સાઉથ આફ્રિકામાં રમાઈ રહેલી SA T20 લીગમાં ભાગ લઈ રહ્યા છે. જેના કારણે સાઉથ આફ્રિકાએ આ ટીમને ન્યૂઝીલેન્ડના મુશ્કેલ પ્રવાસ માટે મોકલવી પડી હતી. જ્યારે સાઉથ આફ્રિકાએ આ ટીમની જાહેરાત કરી હતી. તે સમયે પસંદગીકારોને ઘણી ટીકાઓનો સામનો કરવો પડ્યો હતો. બાદમાં એક અધિકારીએ કહ્યું હતું કે જો અમે અમારા તમામ સ્ટાર ખેલાડીઓને ન્યૂઝીલેન્ડ પ્રવાસ પર મોકલીશું તો SA T20 લીગ જોવા કોણ આવશે. જે બાદ તેણે પોતાની ટીમને ન્યૂઝીલેન્ડના પ્રવાસે મોકલવી પડી હતી.
ભારત પાસે ત્રીજી ટેસ્ટમાં ટોચ પર આવવાની તક
ભારત અને ઈંગ્લેન્ડ વચ્ચે સિરીઝની ત્રીજી ટેસ્ટ મેચ રાજકોટ સ્ટેડિયમમાં રમાશે. જો ભારત ત્રીજી ટેસ્ટ મેચ જીતશે તો તે વર્લ્ડ ટેસ્ટ ચેમ્પિયનશિપ 2023-25 પોઈન્ટ ટેબલમાં ટોપ 2માં સ્થાન મેળવી લેશે. અને આ દરમિયાન ઓસ્ટ્રેલિયાએ તેનું બીજું સ્થાન ગુમાવવું પડશે. જો ભારતની પ્રથમ બે મેચની વાત કરીએ તો પ્રથમ ટેસ્ટ ઈંગ્લેન્ડના નામે રહી હતી. ત્યાર બાદ ભારતે બીજી ટેસ્ટમાં શાનદાર વાપસી કરીને સિરીઝ 1-1થી બરાબર કરી લીધી હતી.
