14 ડિસેમ્બર, 2025ના રોજ બોન્ડી બીચ પર યહૂદી સમુદાયની હનુક્કાહ ઉજવણી દરમિયાન થયેલા આતંકવાદી હુમલાએ ઓસ્ટ્રેલિયન સમાજ માટે ચોંકાવનારી ઘટના છે. પિતા-પુત્ર એવા બે આતંકવાદીઓએ અંધાધૂંધ ગોળીબાર કર્યો હતો. આ હિંસા વચ્ચે પણ માનવતાની એક દીપક ઝળહળી રુવેન મોરિસન.
એક પગલું લોકોનો બચાવ્યો જીવ
વાયરલ થયેલા વીડિયોમાં રુવેન આતંકવાદીઓથી ભાગતા દેખાતા નથી પરંતુ તેઓ હાથમાં ઈંટ લઈને એક આતંકવાદી તરફ દોડે છે. હથિયાર ન મળતાં તેમણે ઈંટ ફેંકીને હુમલાખોરનું ધ્યાન ભટકાવવાનો પ્રયાસ કર્યો, જેથી ભીડને ભાગવા માટે થોડો સમય મળી શકે. આ ક્ષણિક લાગતું પગલું હકીકતમાં આતંક સામે ખૂબ જ મોટું પગલું ગણવામાં આવ્યું છે.
શહીદ થયેલા રુવેનની દિકરીનું નિવેદન
આ હુમલામાં રુવેન ગોળી વાગતાં શહીદ થયા. તેમની પુત્રી શીના ગુટનિકે વીડિયોમાં દેખાતી વ્યક્તિ પોતાના પિતા હોવાનું ઓળખ્યું. તેમણે કહ્યું, “મને મળેલી માહિતી મુજબ, ગોળીબાર શરૂ થતા જ મારા પિતા કૂદી પડ્યા. તેઓ આતંકવાદીઓ પર બૂમો પાડી રહ્યા હતા, ઈંટ ફેંકી રહ્યા હતા અને પોતાના સમુદાયનું રક્ષણ કરી રહ્યા હતા. પછી તેમને ગોળી મારી દેવામાં આવી.” શીનાએ વધુમાં કહ્યું, “જો તેઓ આ દુનિયા છોડીને જ ગયા, તો એ લડતા લડતા ગયા અને એક આતંકવાદી સામે ઊભા રહીને સામનો કર્યો. તેમના માટે આનાથી સારો કોઈ રસ્તો ન હોઈ શકે. તેઓ જેને સૌથી વધુ પ્રેમ કરતા હતા, તેમને બચાવતા રહ્યા.”
ફૂટેજમાં સ્પસ્ટ દેખાઇ છે કે તેઓ ડર્યા નહીં
સ્ટ્રીટ કેમેરાના ફૂટેજ પણ બતાવે છે કે રુવેનએ હાર માની નહી અને ડર્યા પણ નહીં. તેમણે પોતાનો જીવ જોખમમાં મૂકી હુમલાખોરને રોકવાનો પ્રયાસ કર્યો, જેથી અન્ય લોકો છુપાઈ શકે અથવા ભાગી શકે.શ્રદ્ધાંજલિ આપતાં લોકોએ લખ્યું, “જ્યારે તેમણે આતંકવાદીઓને અટકાવ્યા, ત્યારે ઘણા લોકો બચી શક્યા. તેઓ ફક્ત ‘હુમલામાં માર્યા ગયા’ નહોતા તેમણે સાચા અર્થમાં અન્ય લોકો માટે શહીદ થયા છે.”
પત્ની અને પુત્રી સાથે રહેતા
રુવેન મોરિસન ચાબાડ સમુદાયના સભ્ય હતા. સોવિયેત યુનિયનથી સ્થળાંતર કરીને તેઓ સિડની આવ્યા હતા અને અહીં પોતાની યહૂદી ઓળખને વધુ મજબૂત બનાવી. તેઓ સિડની અને મેલબોર્ન વચ્ચે સમય વિતાવતા, પત્ની અને પુત્રી સાથે રહેતા. તેમને ઓળખનારા લોકો કહે છે કે તેઓ અત્યંત દયાળુ, ઉદાર અને હાસ્યભાવથી ભરપૂર વ્યક્તિ હતા.
હુમલામાં કુલ 15 લોકોના મોત
આ હુમલામાં કુલ 15 લોકોના મોત થયા, જેમાં 10 વર્ષની બાળકી પણ સામેલ છે. બે હુમલાખોરોમાંથી 54 વર્ષીય સાજિદ અકરમનું ઘટનાસ્થળે જ મોત થયું, જ્યારે 24 વર્ષીય નાવેદ અકરમ ગંભીર રીતે ઘાયલ હાલતમાં હોસ્પિટલમાં દાખલ છે અને તેના પર આતંકવાદ સંબંધિત આરોપો લાગવાની શક્યતા છે. રુવેન મોરિસનની બહાદુરી આજે માત્ર એક ઘટના નથી—તે માનવતા, હિંમત અને આતંક સામે અડગ પ્રતિકારનું જીવતું પ્રતીક બની ગઈ છે.
આ પણ વાંચો : World : ભારત અને જોર્ડન વચ્ચે 5 કરારો પર હસ્તાક્ષર, PM મોદી આજે ઇથોપિયા માટે રવાના
