અમેરિકાના રાષ્ટ્રપતિ ડોનાલ્ડ ટ્રમ્પે વિઝા અને પ્રવેશ નિયમોને વધુ કડક બનાવતાં મંગળવારે એક નવું ઘોષણાપત્ર જાહેર કર્યું છે. આ નિર્ણય હેઠળ વધુ 7 દેશોના નાગરિકોને અમેરિકામાં પ્રવેશવા પર પ્રતિબંધ મૂકવામાં આવ્યો છે. આ સાથે ટ્રમ્પ વહીવટીતંત્ર દ્વારા હવે કુલ 30થી વધુ દેશોના નાગરિકો પર સંપૂર્ણ અથવા આંશિક પ્રવેશ પ્રતિબંધ લાગુ કરવામાં આવ્યો છે. વહીવટીતંત્રનું કહેવું છે કે આ પગલું રાષ્ટ્રીય સુરક્ષા, નબળી સ્ક્રીનિંગ વ્યવસ્થા અને વિઝા ઓવરસ્ટે જેવી સમસ્યાઓને ધ્યાનમાં રાખીને લેવામાં આવ્યું છે.
આ 7 દેશો પર પ્રતિબંધ
નવા આદેશ અનુસાર બુર્કિના ફાસો, માલી, નાઇજર, દક્ષિણ સુદાન અને સીરિયા સહિત સાત દેશોના નાગરિકો માટે અમેરિકામાં પ્રવેશ સંપૂર્ણપણે સસ્પેન્ડ કરવામાં આવ્યો છે. આ વિસ્તૃત પ્રતિબંધ 1 જાન્યુઆરીથી અમલમાં આવશે. આ સાથે પેલેસ્ટિનિયન ઓથોરિટી દ્વારા જારી કરાયેલા મુસાફરી દસ્તાવેજો ધરાવતા લોકો પર પણ સંપૂર્ણ પ્રતિબંધ લાદવામાં આવ્યો છે. વહીવટીતંત્રનું માનવું છે કે ચાલુ સંઘર્ષ અને આતંકવાદી જૂથોની હાજરીને કારણે આવા પ્રવાસીઓની યોગ્ય તપાસ શક્ય નથી. લાઓસ અને સિએરા લિયોન, જે અગાઉ આંશિક પ્રતિબંધ હેઠળ હતા, તેમને પણ હવે સંપૂર્ણ પ્રતિબંધિત દેશોની યાદીમાં સામેલ કરવામાં આવ્યા છે.
અગાઉ લાગેલા પ્રતિબંધો
વ્હાઇટ હાઉસની ફેક્ટ શીટ મુજબ આ નવી જાહેરાત અગાઉ લાગુ કરાયેલા મુસાફરી પ્રતિબંધોનું વિસ્તરણ છે. તેમાં કેટલાક દેશોના નાગરિકો માટે સંપૂર્ણ પ્રતિબંધો જાળવી રાખવામાં આવ્યા છે, જ્યારે કેટલાક પર આંશિક મર્યાદાઓ લાદવામાં આવી છે. સાથે જ, કેટલાક મુસાફરી દસ્તાવેજો માટે નિયમો વધુ કડક બનાવવામાં આવ્યા છે અને કેટલીક ફેમિલી વિઝા સંબંધિત છૂટછાટોને પણ મર્યાદિત કરવામાં આવી છે.
આ દેશોમાં પહેલેથી જ પ્રતિબંધ
આ પહેલાંથી જ પ્રતિબંધિત દેશોમાં અફઘાનિસ્તાન, બર્મા, ચાડ, રિપબ્લિક ઓફ કોંગો, ઇક્વેટોરિયલ ગિની, એરિટ્રિયા, હૈતી, ઈરાન, લિબિયા, સોમાલિયા, સુદાન અને યમનનો સમાવેશ થાય છે. આ દેશોના નાગરિકો માટે સંપૂર્ણ પ્રવેશ પ્રતિબંધ યથાવત રહેશે. વહીવટીતંત્રનું કહેવું છે કે આ દેશોમાં આતંકવાદી પ્રવૃત્તિ, આંતરિક અસ્થિરતા અને વિશ્વસનીય દસ્તાવેજોની અછત જેવા ગંભીર મુદ્દાઓ છે.
આદેશ પાછળનું કારણ
નવા આદેશ પાછળનું એક મોટું કારણ 26 નવેમ્બરે વોશિંગ્ટન ડીસીમાં થયેલી ગોળીબારની ઘટના હોવાનું જણાવવામાં આવ્યું છે, જેમાં બે નેશનલ ગાર્ડ સભ્યોને ગોળી વાગી હતી. આ ઘટનામાં શંકાસ્પદ વ્યક્તિ અફઘાન નાગરિક હતો, જે અગાઉ CIA સાથે જોડાયેલી એક યુનિટ માટે કામ કરી ચૂક્યો હતો અને 2021 બાદ અમેરિકા આવ્યો હતો. આ કેસને આધારે ટ્રમ્પ વહીવટીતંત્રે કડક ઇમિગ્રેશન નિયંત્રણોની જરૂરિયાત પર ભાર મૂક્યો છે.
આ દેશોને નવી રીતે આંશિક પ્રતિબંધો
આદેશ હેઠળ કેટલાક દેશો માટે આંશિક પ્રતિબંધો પણ લાગુ કરવામાં આવ્યા છે. બુરુન્ડી, ક્યુબા, ટોગો અને વેનેઝુએલાના નાગરિકો માટે આંશિક પ્રતિબંધો યથાવત રાખવામાં આવ્યા છે, જ્યારે અંગોલા, એન્ટિગુઆ અને બાર્બુડા, બેનિન, કોટ ડી’આઇવોર, ડોમિનિકા, ગેબોન, ગામ્બિયા, માલાવી, મૌરિટાનિયા, નાઇજીરીયા, સેનેગલ, તાંઝાનિયા, ટોંગા, ઝામ્બિયા અને ઝિમ્બાબ્વે જેવા દેશોને નવી રીતે આંશિક પ્રતિબંધોની યાદીમાં સામેલ કરવામાં આવ્યા છે.
આ એક માત્ર દેશને રાહત
આ નવા નિર્ણયમાં તુર્કમેનિસ્તાન એકમાત્ર એવો દેશ છે જેને થોડી રાહત આપવામાં આવી છે. તુર્કમેન નાગરિકો માટે નોન-ઇમિગ્રન્ટ વિઝા પર લાગેલા નિયંત્રણો હટાવવામાં આવ્યા છે. સીરિયા અંગે વહીવટીતંત્રે જણાવ્યું છે કે લાંબા સમયથી ચાલતી નાગરિક અશાંતિને કારણે ત્યાં પાસપોર્ટ અને નાગરિક દસ્તાવેજો જારી કરવા માટે પૂરતી કેન્દ્રિય સત્તા ઉપલબ્ધ નથી. બુર્કિના ફાસો અને માલી જેવા દેશોને સક્રિય આતંકવાદી ખતરાના કારણે બ્લેકલિસ્ટ કરવામાં આવ્યા છે, જ્યારે કેટલાક અન્ય દેશોમાં ઊંચા વિઝા ઓવરસ્ટે દરો મુખ્ય કારણ બન્યા છે.
કડક નિર્ણય
વ્હાઇટ હાઉસે આ આદેશનું સમર્થન કરતાં કહ્યું છે કે જે દેશોમાંથી આવતા લોકોની યોગ્ય અને વિશ્વસનીય તપાસ શક્ય નથી, તેવા દેશોના નાગરિકોના પ્રવેશને રોકવો રાષ્ટ્રીય સુરક્ષા માટે જરૂરી છે. ઘણા દેશોમાં ભ્રષ્ટાચાર, અવિશ્વસનીય દસ્તાવેજો અને કાયદા અમલ માટે જરૂરી માહિતી શેરિંગનો અભાવ હોવાને કારણે આ કડક નિર્ણય લેવામાં આવ્યો હોવાનું જણાવવામાં આવ્યું છે.
આ પ્રતિબંધ તમામ પર નહીં પડે લાગુ
તેમ છતાં, આ પ્રતિબંધ તમામ પર લાગુ પડશે નહીં. કાયદેસર કાયમી રહેવાસીઓ, વર્તમાન વિઝા ધરાવતા લોકો, રાજદ્વારીઓ, રમતવીરો અને જેમનો પ્રવેશ અમેરિકાના રાષ્ટ્રીય હિતોને સેવા આપે છે, તેમને આ પ્રતિબંધમાંથી મુક્તિ આપવામાં આવશે. વહીવટીતંત્રે માનવતાવાદી આધાર પર કેસ-બાય-કેસ છૂટછાટ પણ રાખી છે, પરંતુ કુટુંબ આધારિત ઇમિગ્રેશન વિઝાના વિકલ્પોને મર્યાદિત કરવામાં આવ્યા છે. વ્હાઇટ હાઉસનું કહેવું છે કે આ તમામ પગલાં અમેરિકાની રાષ્ટ્રીય સુરક્ષાને મજબૂત બનાવવા માટે જરૂરી છે.
આ પણ વાંચો : PM Modi Ethiopia Visit: PM મોદીને 2016થી 2025માં 28 ઉચ્ચ નાગરિક સન્માન મળ્યા
