માઉન્ટેન બાઇકિંગના એક ભયાનક અકસ્માતે જીવનની દિશા બદલી નાખી હોવા છતાં, સપનાઓને ફરી જીવનાર એક મહિલા હવે અવકાશની સીમા પાર કરવા જઈ રહી છે. અબજોપતિ જેફ બેઝોસની એરોસ્પેસ કંપની બ્લુ ઓરિજિન ઇતિહાસ રચવા જઈ રહી છે, કારણ કે તે પહેલીવાર વ્હીલચેર યુઝરને અવકાશમાં મોકલશે. આ ઐતિહાસિક યાત્રામાં જર્મન એરોસ્પેસ અને મેકાટ્રોનિક્સ એન્જિનિયર માઇકેલા ‘મિચી’ બેન્થૌસ NS-37 મિશનમાં સવાર થશે અને દુનિયાભરમાં લાખો લોકોને પ્રેરણા આપશે.
100 કિલોમીટર ઉપર આવેલી કર્મન લાઇનને પાર
બ્લુ ઓરિજિનનું NS-37 મિશન પૃથ્વીથી આશરે 62 માઇલ એટલે કે 100 કિલોમીટર ઉપર આવેલી કર્મન લાઇનને પાર કરશે, જેને આંતરરાષ્ટ્રીય સ્તરે બાહ્ય અવકાશની સીમા તરીકે માન્યતા આપવામાં આવી છે. સમગ્ર ઉડાનનો સમય લગભગ 10થી 12 મિનિટનો રહેશે, જેમાં ક્રૂ સભ્યોને થોડા સમય માટે માઇક્રોગ્રેવિટીનો અનુભવ થશે. ત્યારબાદ કેપ્સ્યુલ સુરક્ષિત રીતે પૃથ્વી પર પરત ફરશે. આ મિશન બ્લુ ઓરિજિનની 16મી માનવ અવકાશ ઉડાન છે. અત્યાર સુધીમાં કંપનીએ 86 લોકોને અવકાશની સીમા પાર કરાવી છે, જેમાંથી 80 લોકો માટે આ પહેલી અવકાશ યાત્રા રહી છે.
મિચી બેન્થૌસ સાથે કોણ જશે?
આ મિશનમાં મિચી બેન્થૌસ સાથે એન્જિનિયર હેન્સ કોએનિગ્સમેન, ઉદ્યોગસાહસિક નીલ મિલ્ચ, રોકાણકારો જોય હાઇડ અને એડોનિસ પોરોલિસ તેમજ જેસન સ્ટેન્સેલ પણ સામેલ રહેશે. આ તમામ સભ્યો સાથે મળીને આ મિશન માનવ અવકાશ યાત્રામાં એક મહત્વપૂર્ણ પળ કરશે. માઇકેલા ‘મિચી’ બેન્થૌસ જર્મનીની પ્રતિભાશાળી એરોસ્પેસ અને મેકાટ્રોનિક્સ એન્જિનિયર છે. તેમણે મેકાટ્રોનિક્સ, રોબોટિક્સ અને ઓટોમેશન એન્જિનિયરિંગમાં સ્નાતક અભ્યાસ પૂર્ણ કર્યો હતો અને ત્યારબાદ મ્યુનિકની ટેકનિકલ યુનિવર્સિટીમાંથી માસ્ટર ડિગ્રી મેળવી. 2016થી તેઓ વિવિધ સંશોધન કેન્દ્રોમાં કાર્યરત રહ્યા છે અને 2024માં યુરોપિયન સ્પેસ એજન્સીમાં યંગ ગ્રેજ્યુએટ ટ્રેની તરીકે જોડાયા હતા.
2018માં થયો હતો અકસ્માત
2018માં થયેલા એક માઉન્ટેન બાઇકિંગ અકસ્માતે તેમના જીવનમાં મોટો વળાંક લાવ્યો. આ અકસ્માત દરમિયાન તેમની કરોડરજ્જુને ગંભીર ઇજા પહોંચી, જેના કારણે તેઓ ચાલી શકતા નથી અને ત્યારથી વ્હીલચેરનો ઉપયોગ કરે છે. તેમ છતાં, આ ઇજાએ તેમને રોકી શકી નથી. અવકાશ પ્રત્યેનો તેમનો જુસ્સો વધુ મજબૂત બનતો ગયો. ડિસેમ્બર 2022માં મિચીએ હ્યુસ્ટનથી ઉડાન ભરતી પેરાબોલિક શૂન્ય-ગુરુત્વાકર્ષણ ફ્લાઇટમાં ભાગ લીધો હતો, જ્યાં તેમણે માઇક્રોગ્રેવિટીનો પ્રાયોગિક અનુભવ મેળવ્યો. ત્યારબાદ તેમને એસ્ટ્રો એક્સેસ એમ્બેસેડર તરીકે પસંદ કરવામાં આવ્યા અને તેઓ બીજી ઝીરો-ગ્રેવિટી ફ્લાઇટ ક્રૂનો પણ ભાગ બન્યા.
એનાલોગ અવકાશયાત્રી મિશનમાં ભાગ
એપ્રિલ 2024માં તેમણે પોલેન્ડના લુનેરેસ રિસર્ચ સ્ટેશન ખાતે આયોજિત એનાલોગ અવકાશયાત્રી મિશનમાં ભાગ લીધો, જ્યાં આંતરરાષ્ટ્રીય ટીમ સાથે બે અઠવાડિયા સુધી આઇસોલેશન કવાયત દરમિયાન મિશન કમાન્ડર તરીકે સેવા આપી. લુનારેસ વિશ્વનું પ્રથમ વ્હીલચેર-સુલભ એનાલોગ અવકાશ નિવાસસ્થાન તરીકે ઓળખાય છે. વ્યાવસાયિક જીવન ઉપરાંત મિચી રમતગમતમાં પણ અત્યંત સક્રિય છે. તેઓ વ્હીલચેર ટેનિસ રમે છે અને પોતાની શારીરિક મર્યાદાને શક્તિમાં ફેરવીને આગળ વધવાનું ઉત્તમ ઉદાહરણ રજૂ કરે છે. NS-37 મિશન માત્ર એક અવકાશ યાત્રા નથી, પરંતુ તે સાબિત કરે છે કે જો દ્રઢ ઇચ્છાશક્તિ અને અડગ આત્મવિશ્વાસ હોય, તો કોઈ પણ અડચણ સપનાઓને અવકાશ સુધી પહોંચતા અટકાવી શકતી
