વિમેન્સ પ્રીમિયર લીગમાં દિલ્હી કેપિટલ્સની યુપી વોરિયર્સ સામે શાનદાર જીત થઈ છે. દિલ્હીએ યુપીને સાત વિકેટથી હરાવ્યું છે. 167 રનનો લક્ષ્યાંક 3 વિકેટ ગુમાવીને પ્રાપ્ત થયો. આ સિઝનમાં દિલ્હીની બીજી જીત છે. આ સિઝનમાં યુપીનો આ સતત બીજો પરાજય છે.
દિલ્હી કેપિટલ્સે બતાવી પોતાની તાકાત
167 રનના લક્ષ્યાંકનો પીછો કરવા ઉતરેલી દિલ્હી કેપિટલ્સે શાનદાર શરૂઆત કરી. શેફાલી વર્મા અને મેગ લેનિંગે પ્રથમ વિકેટ માટે 65 રન જોડ્યા. શેફાલી વર્મા 16 બોલમાં 26 રન બનાવીને આઉટ થઈ ગઈ. તેને દીપ્તિ શર્માએ આઉટ કરી. આ પછી, જેમિમા રોડ્રિગ્સ બેટિંગ કરવા આવી અને ખાતું ખોલાવ્યા વિના આઉટ થઈ ગઈ.
આ પછી મેગ લેનિંગે શાનદાર ફિફ્ટી ફટકારી. મેગ લેનિંગે 49 બોલમાં 69 રન બનાવ્યા. પોતાની ઈનિંગ દરમિયાન તેને 12 ચોગ્ગા ફટકાર્યા. મેગ લેનિંગના આઉટ થયા પછી, એનાબેલ સધરલેન્ડ અને મેરિઝાન કાપે ઈનિંગની કમાન સંભાળી. બંનેએ 48 રનની ભાગીદારી કરી અને ટીમને વિજય અપાવ્યો. સધરલેન્ડે 41 અને મેરિઝેન કાપે 29 રન બનાવ્યા.
કિરણ નવગિરે ફટકારી અડધી સદી
આ પહેલા કિરણ નવગિરેના વિસ્ફોટક ફિફ્ટીના આધારે, યુપી વોરિયર્સે દિલ્હી કેપિટલ્સ સામે 20 ઓવરમાં સાત વિકેટે 166 રન બનાવ્યા હતા. યુપી ટીમ માટે નવગિરેએ 27 બોલમાં 51 રન બનાવ્યા જ્યારે દિનેશ વૃંદાએ 15 બોલમાં 16 રન બનાવ્યા. બંનેએ 66 રનની ભાગીદારી કરીને યુપીને વિસ્ફોટક શરૂઆત અપાવી.
યુપી ટીમે 52 રનની અંદર છેલ્લી પાંચ વિકેટ ગુમાવી દીધી. શ્વેતા સહરાવત (33 બોલમાં 37) અને ગ્રેસ હેરિસ (12) એ પાંચમી વિકેટ માટે 36 રન ઉમેર્યા. દિલ્હી તરફથી એનાબેલ સધરલેન્ડે ચાર ઓવરમાં 26 રન આપીને બે વિકેટ ઝડપી.
