મુંબઈ ઈન્ડિયન્સે ગુજરાત જાયન્ટ્સને 5 વિકેટે હરાવીને મહિલા પ્રીમિયર લીગમાં પોતાની પહેલી જીત નોંધાવી. મુંબઈની જીતમાં સૌથી મોટો ફાળો નેટ સિવર-બ્રન્ટનો હતો, જેણે બેટિંગમાં અડધી સદી ફટકારીને 55 રન બનાવ્યા, જ્યારે બોલિંગમાં પણ 2 વિકેટ લીધી.
હરલીન દેઓલે બનાવ્યા 32 રન
ગુજરાત જાયન્ટ્સની આખી ટીમ મુંબઈ ઈન્ડિયન્સ સામે માત્ર 120 રન જ બનાવી શકી. હેલી મેથ્યુઝ અને એમેલિયા કેરે મુંબઈ માટે ભારે ધૂમ મચાવી. હેલી મેથ્યુઝે ગુજરાતના 3 બેટ્સમેનોને આઉટ કર્યા. હરલીન દેઓલ ગુજરાત માટે લડતી રહી, તેણે 32 રનની ઈનિંગ રમી, પરંતુ મુંબઈની મજબૂત બોલિંગને કારણે ગુજરાત 120 રન જ બનાવી શકી.
મુંબઈ ઈનિંગની ઘાતક બોલિંગ
આ મેચ વડોદરાના કોટંબી સ્ટેડિયમ ખાતે રમાઈ હતી, જેમાં મુંબઈએ ટોસ જીતીને પ્રથમ બોલિંગ કરવાનો નિર્ણય લીધો હતો. મુંબઈનો નિર્ણય સારો સાબિત થયો કારણ કે ગુજરાત 43 રન પર પહોંચ્યું ત્યાં સુધીમાં તેમની અડધી ટીમ પેવેલિયન પરત ફરી ચૂકી હતી. બેથ મૂની, લૌરા વોલ્વાર્ડ અને એશ્લે ગાર્ડનર જેવા મોટા ખેલાડીઓ મુંબઈની ઘાતક બોલિંગનો શિકાર બન્યા. એક સમયે, ગુજરાતે 79 રનના સ્કોરે 7 વિકેટ ગુમાવી દીધી હતી. ત્યારબાદ હરલીન દેઓલ અને તનુજા કંવરે ઈનિંગ સંભાળી.
હેલી મેથ્યુઝે જીતી પર્પલ કેપ
મુંબઈ ઈન્ડિયન્સની હેલી મેથ્યુઝે આ સિઝનમાં પહેલી વાર પર્પલ કેપ જીતી છે. મેથ્યુઝે WPL 2025 ની પોતાની પહેલી મેચમાં દિલ્હી કેપિટલ્સ સામે 2 વિકેટ લીધી. તેણે ગુજરાત જાયન્ટ્સ સામે 3 વિકેટ લઈને પર્પલ કેપ જીતી લીધી છે. તેણે સિઝનમાં અત્યાર સુધીમાં 5 વિકેટ લીધી છે અને સૌથી વધુ વિકેટ લેવાના મામલે રેણુકા ઠાકુરની બરાબરી કરી છે. પરંતુ અન્ય આંકડાઓના આધારે, મેથ્યુઝ આગળ છે. WPLની પ્રથમ સીઝનની ચેમ્પિયન મુંબઈ ઈન્ડિયન્સ, WPL 2025 માં તેની પહેલી મેચ દિલ્હી કેપિટલ્સ સામે 2 વિકેટથી હારી ગઈ હતી.
