ICC વર્લ્ડ ટેસ્ટ ચેમ્પિયનશિપ 2025ની ફાઈનલ મેચ આ વખતે ઓસ્ટ્રેલિયા અને દક્ષિણ આફ્રિકા વચ્ચે રમાશે. આ મેચ 11 જૂનથી ઈંગ્લેન્ડના લોર્ડ્સમાં રમાશે. ઓસ્ટ્રેલિયા બીજી વખત આ ટાઈટલ જીતવા માગશે.
ફાઈનલ મેચ પહેલા ઓસ્ટ્રેલિયાના કેપ્ટન પેટ કમિન્સે એક મોટા ફેરફારની વાત કરી છે. WTC ફાઈનલના સ્થળ અંગે પેટ કમિન્સનું મોટું નિવેદન સામે આવ્યું છે.
પેટ કમિંસે ફેરફારને લઈને કહી આ વાત
રિપોર્ટ મુજબ ઓસ્ટ્રેલિયા ટીમના કેપ્ટન પેટ કમિન્સે WTC ફાઈનલના સ્થળ વિશે કહ્યું કે “જે ટીમ પાછલા ચક્રની વિજેતા છે તેને આગામી સિઝનની ફાઈનલનું આયોજન કરવાની જવાબદારી મળવી જોઈએ. પરંતુ એ પણ સારું છે કે દરેક ચક્રની ફાઈનલ લોર્ડ્સમાં યોજાય છે, તે ખૂબ જ સારું મેદાન છે અને એવું લાગે છે કે તે જ સ્થળે રમવું એક સરળ કાર્ય છે.”
અત્યાર સુધી વર્લ્ડ ટેસ્ટ ચેમ્પિયનશિપની 2 ફાઈનલ રમાઈ ચૂકી છે અને બંને ફાઈનલ લોર્ડ્સમાં જ રમાઈ છે. પહેલી સિઝનની ફાઈનલમાં ન્યુઝીલેન્ડે ટીમ ઈન્ડિયાને હરાવીને ટાઈટલ પોતાને નામ કર્યું હતું. જ્યારે બીજી સિઝનની ફાઈનલમાં ટીમ ઈન્ડિયાને ઓસ્ટ્રેલિયાએ હરાવ્યું હતું.
ટેસ્ટ ટીમમાં બંને ટીમના આંકડા
ટેસ્ટ ફોર્મેટમાં અત્યાર સુધીમાં ઓસ્ટ્રેલિયા અને દક્ષિણ આફ્રિકા વચ્ચે 123 મેચ રમાઈ છે. ઓસ્ટ્રેલિયાએ આમાંથી 54 મેચ જીતી છે, જ્યારે દક્ષિણ આફ્રિકાએ ફક્ત 26 મેચ જીતી છે. આ સિવાય 21 મેચ ડ્રો થઈ છે. પરંતુ છેલ્લા 10 વર્ષથી દક્ષિણ આફ્રિકાનું ઓસ્ટ્રેલિયા પર પલડું ભારે છે. 2015થી, બંને ટીમો વચ્ચે 10 ટેસ્ટ મેચ રમાઈ છે, જેમાંથી દક્ષિણ આફ્રિકાએ 5 મેચ જીતી છે અને ઓસ્ટ્રેલિયાએ 4 મેચ જીતી છે.
ટેમ્બા બાવુમાની કેપ્ટનશીપમાં સાઉથ આફ્રિકા સતત સારું પ્રદર્શન કરી રહ્યું છે. ટેમ્બા બાવુમાની કેપ્ટનશીપમાં દક્ષિણ આફ્રિકા અત્યાર સુધી એક પણ ટેસ્ટ મેચ હાર્યું નથી, તેથી હવે દક્ષિણ આફ્રિકાની નજર પ્રથમ વિશ્વ ટેસ્ટ ચેમ્પિયનશીપના ટાઈટલ પર રહેશે.
