વર્લ્ડ ટેસ્ટ ચેમ્પિયનશિપ ફાઈનલ 2025ના પહેલા દિવસે સાઉથ આફ્રિકાના ફાસ્ટ બોલરે શાનદાર પ્રદર્શન કરતાં ઓસ્ટ્રેલિયાના બેટ્સમેનને સંપૂર્ણ પોતાના દબાવમાં રાખ્યા. મેચ લોર્ડ્સના મેદાન પર રમાઈ રહી છે. જ્યાં પિચમાં સ્વિંગ જોવા મળી રહી હતી અને સાઉથ આફ્રિકાના બોલરે તેનો પૂરો ફાયદો ઉઠાવ્યો.
ટોસ હારીને પહેલા બેટિંગ કરવા આવેલી ઓસ્ટ્રેલિયાની શરુઆત ખૂબ જ ખરાબ રહી હતી. સાઉથ આફ્રિકાના બોલરોની ઘાતક બોલિંગ સામે ઓસ્ટ્રેલિયાની ટીમ 212 રનમાં જ ઓલઆઉટ થઈ ગઈ. પરંતુ સ્ટીવ સ્મિથ અને બ્યૂ વેબસ્ટરની મહત્ત્વની ઈનિંગને કારણે ટીમને સન્માનજનક સ્કોર સુધી પહોંચાડી. પરંતુ આ મેચમાં કાગિસો રબાડાએ પોતાની ઘાતક બોલિંગથી ધૂમ મચાવી.
કાગિસો રબાડાએ લીધી 5 વિકેટ
સાઉથ આફ્રિકાનો ફાસ્ટ બોલર કાગિસો રબાડાએ શાનદાર બોલિંગ કરી અને 5 વિકેટ પોતાને નામ કરી. તેને 15.4 ઓવરમાં 51 રન આપીને આ સિદ્ધિ હાંસલ કરી. કાગિસો રબાડાની ઝડપી બોલિંગની સ્પીડ, લાઈન-લેન્થ અને નિરંતરતાએ ધૂમ મચાવી. લોર્ડ્સમાં હાજર દર્શકોએ તેના પ્રદર્શનના વખાણ કર્યા.
શાનદાર શરુઆત સાથે જ સાઉથ આફ્રિકાએ બનાવ્યું પ્રેશર
કાગિસો રબાડા અને માર્કો યાન્સેનની જોડીએ શરુઆતથી જ ઓસ્ટ્રેલિયન બેટ્સમેનને પોતાનો શિકાર બનાવ્યો હતો. ઓપનર ઉસ્માન ખ્વાજા ખાતું ખોલ્યાં વિના આઉટ થયો, જ્યારે કેમરૂન ગ્રીન માત્ર 4 રન બનાવીને જ આઉટ થયો. મિડિલ ઓર્ડરમાં પણ કોઈ બેટ્સમેન સારી બેટિંગ કરી શક્યો નહીં. માર્નસ લાબુસેન 17 રન બનાવીને અને ટ્રેવિસ હેડ 11 રન બનાવીને આઉટ થયો.
સ્ટીવ સ્મિથ અને વેબસ્ટરની મહત્ત્વપૂર્ણ ઈનિંગ
જ્યારે ઓસ્ટ્રેલિયા ટીમની વિકેટ સતત પડી રહી હતી ત્યારે સ્ટીવ સ્મિથે 66 રનની મહત્ત્વપૂર્ણ ઈનિંગ રમી. તેને 10 ચોગ્ગા ફટકાર્યા. નીચલા ક્રમમાં બ્યૂ વેબસ્ટરે 72 રનની સમજદારીપૂર્વક પોતાની ઈનિંગ રમી અને ટીમનો સ્કોર 200ને પાર પહોંચાડ્યો.
