સાઉથ આફ્રિકા અને ઓસ્ટ્રેલિયાએ વર્લ્ડ ટેસ્ટ ચેમ્પિયનશિપ 2025 ની ફાઈનલમાં જગ્યા બનાવી લીધી છે. જૂનમાં બંને ટીમો વચ્ચે ટાઈટલ જંગ રમાશે.
સાઉથ આફ્રિકાએ શાનદાર પ્રદર્શન કર્યું અને ટેસ્ટ સિરીઝમાં બાંગ્લાદેશ અને પાકિસ્તાનને હરાવીને ફાઈનલમાં પ્રવેશ કર્યો, જ્યારે ઓસ્ટ્રેલિયાએ ભારતને હરાવીને ટાઈટલ મેચમાં સ્થાન મેળવ્યું. પરંતુ ફાઈનલના 2 મહિના પહેલા સાઉથ આફ્રિકાને મોટો ઝટકો લાગ્યો છે. સાઉથ આફ્રિકાનો કેપ્ટન ઈજાગ્રસ્ત થયો છે.
સાઉથ આફ્રિકાને લાગ્યો મોટો ઝટકો
સાઉથ આફ્રિકાના કેપ્ટન ટેમ્બા બાવુમા વર્લ્ડ ટેસ્ટ ચેમ્પિયનશિપ ફાઈનલ 2025 પહેલા ઈજાગ્રસ્ત થયો છે. મીડિયા રિપોર્ટ મુજબ ટેમ્બા બાવુમા ક્રિકેટ સાઉથ આફ્રિકાની ડે સિરીઝ ડિવિઝન-1 ની ફાઈનલમાં ભાગ લેવાનો હતો, પરંતુ હવે ઈજાને કારણે તે આ મેચમાં ભાગ લઈ શકશે નહીં. તે ફાઈનલ મેચ માટે કેપ ટાઉન લાયન્સ ટીમમાં જોડાવાનો હતો.
પરંતુ કોણીની ઈજાને કારણે તે આ મેચમાં ભાગ લઈ શકશે નહીં. પરંતુ હજુ સુધી એ વાતની પુષ્ટિ થઈ નથી કે ટેમ્બા બાવુમાની ઈજા કેટલી ગંભીર છે? પરંતુ સ્ટાર ખેલાડીની ઈજાથી ટીમનું ટેન્શન વધી ગયું છે.
ટેમ્બા બાવુમા આફ્રિકા માટે છે મહત્વપૂર્ણ ખેલાડી
ટેમ્બા બાવુમા અત્યાર સુધી ત્રણેય ફોર્મેટમાં આફ્રિકાનું પ્રતિનિધિત્વ કરી ચૂક્યો છે. તેને અત્યાર સુધી રમાયેલી 63 ટેસ્ટ મેચોમાં 37.95 ની એવરેજથી 3606 રન બનાવ્યા છે. ટેસ્ટમાં તેના નામે 4 સદી અને 24 અડધી સદી પણ છે.
આ સિવાય તેને 48 ODI મેચોમાં 43.97 ની એવરેજથી 1847 રન બનાવ્યા છે, જેમાં 5 સદી અને 7 અડધી સદીનો સમાવેશ થાય છે. 36 T20 મેચોમાં તેને 21.61ની એવરેજથી 670 રન બનાવ્યા છે. તેના તાજેતરના પ્રદર્શન વિશે વાત કરીએ તો, તેને 2 ટેસ્ટ મેચની 3 ઈનિંગ્સમાં 31, 40 અને 106 રન બનાવ્યા છે.
