- BCASએ ઈન્ડિગોને 1.20 કરોડનો દંડ ફટકારવામાં આવ્યો
- ગોવાથી દિલ્હી જતી ઈન્ડિગોની ફ્લાઈટ મુંબઈ એરપોર્ટ પર થઈ હતી લેન્ડ
- મુસાફરોએ રનવે પાસે જ જમવાનું શરૂ કરતા ઈન્ડિગો પર કાર્યવાહી
એરલાઈન કંપની ઈન્ડિગો માટે છેલ્લા કેટલાક દિવસો ઘણા મુશ્કેલ રહ્યા છે. પેસેન્જરે ફ્લાઈટના કેપ્ટનને થપ્પડ મારવી, ફ્લાઈટ્સ કેટલાંક કલાકો મોડી પડવી અથવા રન-વે પાસે યાત્રીઓ દ્વારા ભોજન કરવું સહિતની ઘણી ઘટનાઓ સામે આવી છે. તેવામાં હવે BCASએ મુંબઈમાં ઓછી કિંમતની એર કેરિયરના મુસાફરોના રનવે પર રાત્રિભોજન મામલે એરલાઈન કંપની પર દંડ ફટકાર્યો છે.
ઈન્ડિગોને 1.20 કરોડનો દંડ ફટકારવામાં આવ્યો
આ ઘટનાની નોંધ લેતા, BCAS એ IndiGo પર 1.20 કરોડ રૂપિયાનો દંડ લગાવ્યો છે. આ સાથે મુંબઈ એરપોર્ટ ઓપરેટર MIAL પર 60 લાખ રૂપિયાનો દંડ પણ લગાવવામાં આવ્યો છે. આ જ ઘટનાને કારણે DGCA એ MIAL પર 30 લાખ રૂપિયાનો દંડ પણ લગાવ્યો છે. આ સિવાય DGCAએ એર ઈન્ડિયા અને સ્પાઈસ જેટ કંપની પર 30-30 લાખ રૂપિયાનો દંડ પણ લગાવ્યો છે.
આ વીડિયો સોશિયલ મીડિયા પર વાયરલ થયો હતો
તમને જણાવી દઈએ કે તાજેતરમાં જ ગોવાથી દિલ્હી આવી રહેલી ઈન્ડિગોની ફ્લાઈટ મુંબઈમાં લેન્ડ થઈ હતી. આ પછી, મુસાફરોને લાંબા સમય સુધી વિમાનમાં રાખવામાં આવ્યા, ત્યારબાદ મુસાફરોએ હંગામો મચાવ્યો અને રનવેની બાજુમાં આરામ કર્યો અને ત્યાં જ રાત્રિભોજન કરવાનું શરૂ કર્યું. આનો એક વીડિયો સોશિયલ મીડિયા પર વાયરલ થયો હતો.
ઈન્ડિગોએ આ ઘટના પર ખેદ વ્યક્ત કર્યો હતો
આ વીડિયો પછી ઈન્ડિગોએ આ અંગે પોતાનો ખુલાસો કર્યો છે. ઈન્ડિગોએ તેના સ્પષ્ટીકરણમાં લખ્યું છે કે, અમે આ અસુવિધા બદલ ખેદ વ્યક્ત કરીએ છીએ અને તમને ખાતરી આપીએ છીએ કે અમારા યાત્રીઓની મુસાફરીની યોજનામાં ખલેલ પહોંચાડવાનો અમારો ઈરાદો બિલકુલ નહોતો. જો કે, કેટલીકવાર, ચોક્કસ ઓપરેશનલ કારણોસર, આવા વિલંબ એરલાઇનના નિયંત્રણની બહાર હોય છે. જેના માટે અમે દિલગીરી વ્યક્ત કરીએ છીએ.
