- ગૃહમાં એ સમયે હંગામો મચી ગયો જ્યારે બે લોકો અચાનક પ્રેક્ષક ગેલેરીમાંથી નીચે કૂદી પડ્યા
- ભાજપના સાંસદ સ્વગેન મુર્મુ લોકસભામાં પોતાનો વિચાર રજૂ કરી રહ્યા હતા
- યુવકે પોતાના જૂતામાં સ્પ્રે પ્રકારનું કંઈક છુપાવ્યું હતું
સંસદ પર આતંકવાદી હુમલાની 22મી વરસી પર ગૃહમાં એ સમયે હંગામો મચી ગયો જ્યારે બે લોકો અચાનક પ્રેક્ષક ગેલેરીમાંથી નીચે કૂદી પડ્યા. તે સમયે ભાજપના સાંસદ સ્વગેન મુર્મુ લોકસભામાં પોતાનો વિચાર રજૂ કરી રહ્યા હતા. યુવકે પોતાના જૂતામાં સ્પ્રે પ્રકારનું કંઈક છુપાવ્યું હતું. તેમણે ગૃહની બેન્ચ પર કૂદવાનું શરૂ કર્યું અને આ દરમિયાન ગૃહમાં પીળો ગેસ ફેલાવા લાગ્યો. સમગ્ર ગૃહમાં અરાજકતાનો માહોલ સર્જાયો હતો અને પ્રિસાઇડિંગ ઓફિસરે ગૃહની કાર્યવાહી બપોરે 2 વાગ્યા સુધી સ્થગિત કરી દીધી હતી. આ ઘટના ત્યારે બની જ્યારે લોકસભામાં શૂન્ય કલાક ચાલી રહ્યો હતો. ઘટના અંગે એક સાંસદે કહ્યું કે અમે બધા ગૃહમાં બેઠા હતા. એક યુવક અચાનક લોબીમાંથી નીચે કૂદી પડ્યો. આ દરમિયાન તેણે જૂતામાંથી પાઉચ જેવું કંઈક કાઢ્યું. તેણે તેમાંથી થોડો પીળો ગેસ છોડ્યો. આ પછી સાંસદોએ તેને પકડી લીધો. કેટલાકે તેને માર પણ માર્યો હતો. આ પછી તેને સુરક્ષા કર્મચારીઓને સોંપવામાં આવ્યો હતો.
નીલમ અને અમોલ શિંદે નામની બે વ્યક્તિઓની પણ અટકાયત કરવામાં આવી હતી.
જ્યારે યુવકને ગૃહમાંથી બહાર કાઢવામાં આવ્યો ત્યારે તેના પગરખામાંથી પીળો ધુમાડો નીકળતો રહ્યો. જેના કારણે પીળો ગેસ ચારે બાજુ ફેલાઈ ગયો હતો. તે કેવો પીળો ગેસ હતો, કેટલો ખતરનાક હતો, સુરક્ષાનો ભંગ કરનારાઓનો હેતુ શું હતો, પોલીસ તેની તપાસ કરી રહી છે. ઓડિયન્સ ગેલેરીમાંથી કૂદી પડનાર વ્યક્તિનું નામ સાગર હોવાનું કહેવાય છે.
સંસદની બહાર પ્રદર્શન કરનારાઓ સંભવતઃ એકબીજાના સંપર્કમાં હતા
યોગાનુયોગ એ જ સમયે, સંસદની બહાર પોલીસ દ્વારા નીલમ અને અમોલ શિંદે નામની બે વ્યક્તિઓની પણ અટકાયત કરવામાં આવી હતી. નીલમ હરિયાણાના હિસારની રહેવાસી છે. સૂત્રોચ્ચાર કરતી વખતે બંનેએ સ્મોગ ગનનો ઉપયોગ કર્યો હતો. આમાંથી પીળો ગેસ પણ નીકળ્યો. આ સ્પષ્ટપણે દર્શાવે છે કે જેઓ ગૃહની અંદર દર્શકોની ગેલેરીમાંથી કૂદી પડ્યા હતા અને સંસદની બહાર પ્રદર્શન કરનારાઓ સંભવતઃ એકબીજાના સંપર્કમાં હતા અને આયોજનબદ્ધ રીતે કામ કરી રહ્યા હતા.
નવી સંસદમાં સુરક્ષામાં ખામીનો આ પહેલો કિસ્સો એ જ દિવસે સામે આવ્યો છે જ્યારે 22 વર્ષ પહેલા 13મી ડિસેમ્બર 2021ના રોજ આતંકવાદી હુમલો થયો હતો. બુધવારે સવારે સંસદમાં આતંકવાદી હુમલામાં શહીદ થયેલા સુરક્ષા જવાનોને શ્રદ્ધાંજલિ આપવામાં આવી હતી.
