- ઈફ્કોમાંથી સંઘાણીને હટાવવા ‘મેન્ડેટ’નો ખેલ કર્યાની ભાજપમાં ચર્ચા
- ભાજપના સહકાર સેલના સંયોજકે ખેતી બેંકમાંથી રૂ.100 કરોડ ઉલેચી પ્રાઈવેટ APMCમાં નાંખ્યા
- સૌરાષ્ટ્ર ઝોનમાં રહેલા 95 પૈકી 85 મત તેમને મળ્યા છે
ઈફ્કોની ચૂંટણીમાં ભાજપના સહકાર સેલના સંયોજક બિપીન પટેલ- ગોતાને અમદાવાદમાંથી પણ મત મળ્યા નથી. કારણ આ નેતા સહકારી કરતા ‘વેપારી’ વધુ છે ! ભાજપનો મેન્ડેટ છતાંયે ભાજપ સમર્થિત મતદારોએ તેમને ભૂંડી રીતે હરાવ્યાની ચર્ચા વચ્ચે હવે સહકાર સેલના સંયોજક રહેતા કરેલા કારનામા જાહેર થઈ રહ્યા છે. અમદાવાદ APMCની ચૂંટણી વર્ષ 2017થી સ્થગિત હોવાનો ફાયદો ઉઠાવી, ભાજપના હોદ્દાની વગ વાપરીને તેમણે ગુજરાતમાં નાના ખેડૂતોની બેંક- ખેતી બેંકમાંથી રૂ.100 કરોડ મેળવ્યા છે. જેનો ઉપયોગ જેતલપુરમાં પોતાની માલિકીના ખાનગી માર્કેટયાર્ડના વેપાર માટે કર્યાનુ બહાર આવ્યુ છે.
સામાન્યતઃ જ્યાં નાના અને સીમાંત ખેડૂતો વાર્ષિક ધિરાણ રૂ.300 કરોડ આસપાસ હોય છે ત્યાં 100 કરોડની લોનની મંજૂર કરાવવા ભાજપ પ્રદેશ સહકાર સેલ સંયોજકનો હોદ્દા અને વગનો બિપીન પટેલે બેફામ ઉપયોગ કર્યાની ચર્ચા સહકારી ક્ષેત્રે છે. આ રૂપિયાથી અમદાવાદના ખેડૂતો માટેના સહકારી માર્કેટયાર્ડની સામે પોતાની માલિકીની ખાનગી APMC ખોલીને વેપાર કર્યાનું કહેવાય છે. ગુજકોમાસોલમાં ઉપાધ્યક્ષ રહેતા થોડા સમય પહેલા બિપીન પટેલે અધ્યક્ષ દિલીપ સંઘાણીની સામે અવિશ્વાસની પ્રસ્તાવ લાવવા પણ કારસો રચ્યો હતો. જો કે, તેમા સફળતા ન મળી, અને રાષ્ટ્રીય સ્તરની સહકારી સંસ્થા ઈફ્કોની દેશવ્યાપી ચૂંટણીમાં પ્રદેશમાં કોઈ પરંપરા કે નિયમ ન હોવા છતાંય પોતાના નામનો જ મેન્ડેટ લખાવ્યો હતો. ઈફ્કોમાં ડિરેક્ટરપદે ભાજપના ધારાસભ્ય જયેશ રાદડિયાએ ઉમેદવારી ફોર્મ ભર્યા પછી બિપીન પટેલે આ ખેલ કર્યો હતો. તેની પાછળ ઈફ્કોમાંથી દિલીપ સંઘાણીને ચેરમેનપદેથી હટાવવાનો ઈરાદો હોવાનું જાણકારોમાં ચર્ચા છે. સંઘાણી ગુજકોમાસોલના પ્રતિનિધી તરીકે ઈફ્કોના ડાયરેક્ટર છે, જ્યારે રાદડિયાને ગુજરાત એકમની મંડળીઓના પ્રતિનિધી માટે એક બેઠકની ચૂંટણીમાં હતા. આ પરિસ્થિતિમાં ભાજપના મેન્ડેટને નામે બિપીન પટેલની જોહુકમી જરાય ચાલી નથી. ગણતરીમાં 180માંથી 113 મત રાદડિયાને મળ્યા છે. રાદડીયાના સમર્થકોના કહેવા મુજબ સૌરાષ્ટ્ર ઝોનમાં રહેલા 95 પૈકી 85 મત તેમને મળ્યા છે. એથી બાકીના 23 મતો અમદાવાદ સહિત ઉત્તર અને મધ્ય ગુજરાતમાંથી મળ્યા છે.
ભાજપના પટેલે કોંગ્રેસી ઠુમર સાથે ઈલુઈલુ કર્યું
સહકારી ક્ષેત્રમાં ભાજપ- કોંગ્રેસના આગેવાનો ઈલુઈલુ કરી, ભાઈ- ભત્રીજાવાદ અને ભ્રષ્ટ્રચાર આચરતા હોવાથી મેન્ડેટ પ્રક્રિયાને અનુસરવામાં આવ્યાનું પ્રદેશ ભાજપ પ્રમુખ સી.આર.પાટીલ વારંવાર કહી ચૂક્યા છે. પરંતુ, ભાજપ સહકાર સેલના સંયોજક બિપીન પટેલ પણ કોંગ્રેસીઓની સાથે ઈલુઈલુ કરતા હોવાની ચર્ચા છે. અમરેલીના પૂર્વ સાંસદ વિરજી ઠુમરે ખેતી કે કૃષિ વિષયક પ્રવૃતિ નહી પણ બાંધકામ ક્ષેત્રના પ્રોજેક્ટ માટે રૂ.10 કરોડની લોનની ખેરાત થઈ છે. જેના માટે ભાજપના સહકાર સેલના સંયોજક બિપીન પટેલે જ ભલામણ કર્યાની ચર્ચા છે. આમ, સહકારી ક્ષેત્રની ઓથ હેઠળ છેવટે તો વેપાર જ ચાલી રહ્યાનું ચિત્ર સ્પષ્ટ થઈ રહ્યુ છે.
