9 ડિસેમ્બરે કેન્દ્રીય મંત્રી રામ મોહન નાયડુએ સંસદમાં સ્પષ્ટપણે જણાવ્યું હતું કે પરિસ્થિતિ સુધરી રહી છે. જવાબદારો સામે કાર્યવાહી કરવામાં આવશે, અને અસરગ્રસ્તોને રિફંડ આપવામાં આવી રહ્યું છે. આ દાવા છતાં એવું લાગે છે કે પરિસ્થિતિ હજુ સુધી સુધરી નથી. બુધવારે એટલે કે આજે 10 ડિસેમ્બર, 2025ના રોજ 300 થી વધુ ફ્લાઇટ્સ રદ કરવામાં આવી છે. જ્યારે 9 ડિસેમ્બરના રોજ 400 થી વધુ ફ્લાઇટ્સ રદ કરવામાં આવી હતી.
મુસાફરોને થશે સમસ્યા
એરલાઇન હજુ પણ ડિરેક્ટોરેટ જનરલ ઓફ સિવિલ એવિએશન (DGCA) અને ઉડ્ડયન મંત્રાલયની નજીકની દેખરેખ હેઠળ કામગીરી સ્થિર કરવાનો પ્રયાસ કરી રહી છે. જો કે સરકારે પહેલાથી જ એરલાઇનને પરિસ્થિતિ સામાન્ય ન થાય ત્યાં સુધી તેના ફ્લાઇટ શેડ્યૂલમાં 10% ઘટાડો કરવાનો આદેશ આપ્યો છે. પરિણામે પ્રી-બુક કરેલી ફ્લાઇટ્સ ધરાવતા મુસાફરોને આગામી કેટલાક મહિનાઓ માટે વિક્ષેપો, અથવા દરરોજ સેંકડો ફ્લાઇટ્સનો સામનો કરવો પડશે.
ફ્લાઇટનું સ્ટેટસ ચેક કરીને જ ઘરેથી નીકળો
મુસાફરોને એડવાઇઝરી જાહેર કરવામાં આવી છે. જેમાં તેઓને એરપોર્ટ પર પહોંચતા પહેલા તેમની ફ્લાઇટનું સ્ટેટસ ચેક કરવા વિનંતી કરવામાં આવી છે. કારણ કે સમયપત્રકમાં છેલ્લી ઘડીએ ફેરફાર શક્ય છે. સમાચાર એજન્સી પીટીઆઈ અનુસાર નાગરિક ઉડ્ડયન મંત્રાલયે મંગળવારે (9 ડિસેમ્બર, 2025) જણાવ્યું હતું કે ઇન્ડિગોને તેના ફ્લાઇટ શેડ્યૂલમાં 10 ટકાનો ઘટાડો કરવાનો આદેશ આપવામાં આવ્યો છે. આનાથી મુશ્કેલીમાં મુકાયેલી એરલાઇનને તેના ઓપરેશન્સને સ્થિર કરવામાં મદદ મળશે.
4000થી વધારે ફ્લાઇટ થઇ છે રદ
નવા ફ્લાઇટ સેવા નિયમોના બીજા તબક્કાના અમલીકરણ પછી ઇન્ડિગોના ઓપરેશનમાં ભારે વિક્ષેપ પડ્યો છે. 4,000 થી વધુ ફ્લાઇટ્સ રદ કરવામાં આવી હતી અને સેંકડો વિલંબ થયો હતો. નાગરિક ઉડ્ડયન મંત્રી કે. રામમોહન નાયડુએ એક નિવેદનમાં જણાવ્યું હતું કે ઇન્ડિગોના મુખ્ય કાર્યકારી અધિકારી (સીઈઓ) પીટર એલ્બર્સને પરિસ્થિતિ વિશે માહિતી આપવા માટે મંત્રાલયમાં બોલાવવામાં આવ્યા હતા. તેમણે કહ્યું કે એલ્બર્સે પુષ્ટિ આપી છે કે અસરગ્રસ્ત ફ્લાઇટ્સ માટે 100 ટકા રિફંડ 6 ડિસેમ્બર સુધીમાં પૂર્ણ થઈ ગયું છે.
આ પણ વાંચો- Indigo Crisis: સરકારે ફ્લાઇટ્સમાં 10 ટકાનો ઘટાડો કર્યો…Indigoને થશે આ મોટું નુકસાન
