ખોટા કેસમાં ફસાવની ધમકી આપતી નકલી વિજિલન્સની ટીમ ઝડપાઈ

• બુટલેગરને ખોટા કેસમાં ફસાવી દેવાની ધમકી આપતા
  
• ખોટા કેસમાં ફસાવી દેવાની ધમકી આપી પૈસા પડાવતા
  
• પોલીસે 4 શખ્સોને ઝડપી વધુ તપાસ હાથ ધરી
  

રાજ્યમાં નકલી પોલીસ નકલી IAS IPS અધિકારી બાદ હવે નકલી વિજિલન્સની ટીમ જ ઝડપાઈ છે. જેમાં પંચમહાલના મોરવા હડફ અને ગોધરા તાલુકામાં ગાંધીનગર વિજિલન્સ સ્કોર્ડમાં ફરજ બજાવતાં હોવાની ખોટી ઓળખાણ આપી નાણાં ખંખેરતી ટોળકીના ચાર ભેજાબાજોને મોરવા હડફ પોલીસે ઝડપી લીધા છે.

રાજ્યમાં નકલીની ભરમાર ચાલી રહી છે. નકલી ટોલનાકુ, નકલી કચેરી, નકલી અધિકારીઓ બાદ હવે નકલી વિજિલન્સ સ્કોર્ડનું રેકેટ સામે આવ્યું છે. મોરવા હડફ પંથકમાં તમે અને તમારા પતિ વિદેશી દારૂનું વેચાણ કરો છો એવી ધમકી આપી નાણાં ખંખેરતી ટોળકીના ચાર ભેજાબાજોને એક વ્યક્તિની સતર્કતાને લઈ પોલીસે ઝડપી લીધા છે.

જેમાં એક કારમાં આવેલા ચાર ભેજાબાજો સંતરોડમાં એક મહિલાના ઘરે ગયા હતા અને તમે દારૂ વેચો છો ધમકી આપી દંડા બતાવી ભયનો માહોલ ઉભો કર્યો હતો. દરમિયાન દુકાન કે મકાન માંથી દારૂ નહિ મળી આવતાં ભેજાબાજો એ ગાડી માંથી દારૂ સાથેનો થેલો લાવી તારા ઘર માંથી મળ્યો છે એવો કેસ કરીશું અને કેસ ના કરવો હોય તો એક લાખ રૂપિયા આપો નહિ તો બીજા મોટા દારૂ ના કેસમાં ફસાવી દઈશું એવું જણાવી બળજબરી પૂર્વક ચાલીશ હજાર પડાવી લીધા હતા.

જોકે દરમિયાન રાજુભાઇ પટેલ નામના એક વ્યક્તિ એ આવી ઓળખકાર્ડની માંગણી કરી હતી દરમિયાન ઘર્ષણ કરતાં ઉક્ત વ્યક્તિઓ શંકાસ્પદ હોવાનું જણાતાં પોલીસનો સંપર્ક કરવામાં આવ્યો હતો. જે પછી પોલીસે ચાર ભેજાબાજોને ઝડપી પાડ્યા છે. ઝડપાયેલા ચાર ઈસમો પાસેથી પોલીસે પચાસ હજાર રોકડ રકમ, છ મોબાઈલ ફોન અને એક કાર કબ્જે લીધી છે. ઝડપાયેલા ભેજાબાજોએ વિવિધ સ્થળે જઈ તમે દારૂનો વ્યવસાય કરો છો એવી ધમકી આપી નાણાં પડાવતાં હતા.