બાંધકામની માહિતી આપતું બોર્ડ મૂકવું ફરજિયાત છે, લંબાઇ, પહોળાઇ, ઊંચાઇ બોર્ડમાં લખવી પડશે અને પ્રોજેક્ટ સ્પેસિફિકેશન અંગે માહિતી જણાવવી પડશે, એમેનિટીઝ, રેરા નંબર, રેરા કલેક્શનની માહિતી લખવી અને લોન અને બેંક વિગતોની માહિતી પણ લખવી પડશે, પ્લોટ, ફ્લેટ, બિલ્ડિંગ, કોમર્શિયલ સાઇટ માટે ફરજિયાત.
બિલ્ડર્સ અને ગ્રાહકો વચ્ચે ઉદભવતા પ્રશ્નો ટાળવા નિર્ણય
અત્યારે રાજ્યમાં મકાન-દુકાન ખરીદવા ઈચ્છનાર ગ્રાહકને રિયલ એસ્ટેટ પ્રોજેક્ટની સાઈટ ખાતે લાગેલા બોર્ડ ઉપરથી સામાન્ય રીતે પ્રોજેક્ટનો રેરા રજિસ્ટ્રેશન નંબર, રેરાની વેબસાઈટ જેવી જ માહિતી મળે છે. ગ્રાહકને પ્રોજેક્ટને લગતી સ્પષ્ટ માહિતી આ બોર્ડ ઉપરથી મળતી નથી. જો ગ્રાહકને તેને જોઈતી માહિતી જોઈતી હોય તો કયૂઆર કોડના ઉપયોગથી રેરાની વેબસાઈટ ઉપર જવું પડે છે. હવે બધા નાગરિકો પાસે કમ્પ્યુટર જ્ઞાન હોતું નથી.
હોર્ડિંગ-બોર્ડ-બેનર મૂકી તેમાં પ્રોજેક્ટના બાંધકામને લગતી વિગતો મૂકવી
તેથી ગુજરાત રિયલ એસ્ટેટ રેગ્યુલેટરી ઑથોરિટી રેરાએ આવતીકાલ પહેલી ડિસેમ્બરથી પ્લોટ-ફ્લેટ-બિલ્ડિંગ-રહેણાંક કે કમર્શિયલ કોઈપણ સાઈટ ખાતે નિયત સાઈઝનું હોર્ડિંગ-બોર્ડ-બેનર મૂકી તેમાં પ્રોજેક્ટના બાંધકામને લગતી વિગતો, પ્રોજેક્ટના સ્પેસિફિકેશન્સ, એમેનિટીઝની વિગત, રેરા રજિસ્ટ્રેશન નંબર, રેરા કલેક્શન બેન્ક એકાઉન્ટની વિગતો, પ્રોજેક્ટ માટે લોનની વિગતો વગેરે બાબતો ફરજિયાત દર્શાવવી પડશે. બોર્ડ-બેનર-હોર્ડિંગ-ડિજિટલ ડીસ્પ્લે વગેરેની સાઈઝમાં લઘુત્તમ પહોળાઈ ૧.૨૦ મીટર તથા લઘુત્તમ ઊંચાઈ ૨ મીટર રાખવી પડશે. પ્રોજેક્ટના મુખ્ય પ્રવેશ પાસે અથવા મુખ્ય રસ્તા ઉપરથી જોઈ શકાય એ રીતે જમીનથી દોઢ થી બે મીટર ઊંચાઈએ આવું બોર્ડ-હોર્ડિંગ-બેનર મૂકવું પડશે. બોર્ડ-બેનર વોટરપ્રૂફ મટિરિયલના હોવા જોઈશે.
બોર્ડનું બેકગ્રાઉન્ડ સફેદ અથવા પીળા રંગનું હોવું જોઈએ
અને એમાં અક્ષરની ફોન્ટ સાઈઝ ૨.૫૦ સે.મી અને અક્ષરો લાલ કે નિયત રંગના જ રાખવા પડશે. રેરા રજિસ્ટ્રેશન નંબર તથા પ્રોજેક્ટના રેરા કલેકશન બેન્ક એકાઉન્ટની વિગતો લાલ રંગથી દર્શાવવી પડશે. કયૂઆર કોડ લઘુત્તમ ૧૫ સે.મી બાય ૧૫ સે.મીનો અને તે મોબાઈલથી આસાનીથી સ્કેન થાય તે રીતે દર્શાવવો પડશે. પ્રોજેક્ટના પ્રમોટરે આટલું કર્યા બાદ તમામ ત્રિમાસિક પ્રગતિ અહેવાલ અપલોડ કરતી વખતે આ બોર્ડ-હોર્ડિંગ-બેનર પણ અપલોડ કરવું પડશે. આ ફોટો જીઓટેગ્ડ ફોટો હોવો ફરજિયાત છે અને આ ફોટામાં પ્રોજેક્ટના અક્ષાંશ-રેખાંશ દર્શાવવા પડશે. રેરાએ તેના આદેશમાં જણાવ્યું છે કે, આ હુકમનું પાલન નહીં કરનારા પ્રમોટર-ભાગીદારોને રેરા કાયદાની જોગવાઈ મુજબ દંડ-સજા થશે અને રેરાના હુકમના અર્થઘટન સંદર્ભે ઑથોરિટીનો નિર્ણય ફાઈનલ ગણાશે. જે પ્રોજેક્ટનું કમ્પ્લાયન્સ-વેરીફિકેશન થઈ ચૂક્યું છે, તેમાં બોર્ડ-હોર્ડિંગ-બેનર-ડિજિટલ ડીસ્પ્લે પ્રસિદ્ધ કરવાની જરૂર રહેતી નથી.
આ પણ વાંચો : Ahmedabad News : અમદાવાદમાં હિટ એન્ડ રનમાં યુવકનું મોત, વૈષ્ણોદેવી સર્કલ નજીક બની ઘટના
