- હોસ્પિટલને 2023-24માં દર્દી દીઠ 91,517ના ખર્ચની સામે 1,57,083 આવક થઈ
- 2022-23માં એક દર્દી દીઠ 91,383 ખર્ચ થયો હતો, જેની સામે 1,00,543 આવક થઇ હતી
- ખર્ચ કરતા આવક વધુ હોવા છતાં કેટલાક ડૉક્ટરોના નેગેટિવ વર્તનથી દર્દીઓમાં ભારે નારાજગી, તંત્રની ચુપકીદી
સરદાર વલ્લભભાઇ પટેલ (SVP) હોસ્પિટલમાં વર્ષ 2023-24માં એક દર્દી દીઠ 91,517 ખર્ચ થયો છે. જેની સામે દર્દી દીઠ 1,57,083 આવક થઇ છે. આ વર્ષમાં કુલ 13,0106 દર્દીઓ સામે 119.94 કરોડનો ખર્ચ થયો છે. જેની સામે એક દર્દી દીઠ વર્ષ 2022-23માં 91,383 ખર્ચ થયો હતો.
જેની સામે 1,00,543 આવક થઇ હોવાનો આરટીઆઇમાં હોસ્પિટલ દ્વારા જવાબ અુપાયો છે. ખર્ચની સામે આવક વધુ હોવા છતાં કેટલાક ડોકટરોના નેગેટિવ વર્તનને લઇને દર્દીઓ અને તેઓના પરિવાજનોમાં ભારે નારાજગી રહે છે. આમ છતાં તંત્ર ચૂપકિદી સેવી રહ્યું છે.હોસ્પિટલ દ્વારા આરટીઆઇમાં અપાયેલા જવાબમાં જણાવાયું છેકે, વર્ષ 2021-22માં કુલ 12,278 દર્દીઓ પાછળ કુલ 160.11 કરોડનો ખર્ચ થયો છે. એટલેકે, એક દર્દી પાછળ 1,28,318 ખર્ચ થયો છે અને 2,18,144 આવક થઇ છે. જેની સામે દર્દી દીઠ વર્ષ 2022-23માં ખર્ચ અને આવકમાં ઘટાડો થયો છે. જ્યારે વર્ષ 2023-24માં ખર્ચ વધ્યો છે અને આવક પણ વધી છે. માત્ર 2020-21 માં કુલ 11,451 દર્દીઓની સામે 182.50 કરોડ ખર્ચ થયો હતો અને 241.35 કરોડની આવક થઇ હતી. એટલેકે આ વર્ષમાં એક દર્દી દીઠ 1,59,375 ખર્ચની સામે 2,10,772 આવક થઇ હતી. વર્ષ 2019-20માં 18,764 દર્દીઓ સામે 146.06 કરોડનો ખર્ચ અને 68.17 કરોડ આવક થતાં માત્ર આજ વર્ષમાં આવકમાં ઘટડો જોવા મળી રહ્યો છે.
SVP હોસ્પિટલમાં દર્દી દીઠ ખર્ચની સામે વધુ આવક છતાં દર્દીઓને નાના-મોટી હાલાકી પડતી હોવાની ફરિયાદો ઉઠે છે. કેટલીકવાર ડોકટરો જવાબ આપતાં નથી. ગરીબ દર્દીઓ નાણાં ચૂકવતાં હોવા છતાં સંતોષકારક જવાબ નહીં મળતા ઉચ્ચકક્ષાએ ફરિયાદ પણ કરે છે. પરંતુ મ્યુનિ. કોર્પોરેશનના અધિકારીઓ ફરિયાદો પર પૂરતુ ધ્યાન આપતાં નથી. જેના લીધે ડોકટરોને મોકળુ મેદાન મળી ગયો હોવાનો દર્દીઓએ રોષ વ્યક્ત કર્યો હતો.
