દૂતાવાસે અમેરિકામાં રહેતા ભારતીય નાગરિકોને ચેતવણી જાહેર કરી છે. દિલ્હી સ્થિત ભારતીય દૂતાવાસે પોતાના કડક નિવેદનમાં કહ્યું છે કે જે લોકો વિઝા પર આવ્યા છે તેઓએ તેમની નિર્ધારિત અવધિથી વધુ સમય રોકાવવું જોઈએ નહીં.
જો કોઈ વિઝા નિયમોનું ઉલ્લંઘન કરે છે અને નિર્ધારિત સમય કરતાં વધુ સમય માટે અમેરિકામાં રહે છે, તો તેને કાનૂની કાર્યવાહીનો સામનો કરવો પડી શકે છે. આમ કરનારા નાગરિકોને આજીવન અમેરિકામાં પ્રવેશવાથી પ્રતિબંધિત કરી શકાય છે. દૂતાવાસે ટ્વિટર પર આ માહિતી આપી છે.
અમેરિકાએ ભારતીયોને આપી ચેતવણી
નવી દિલ્હી સ્થિત ભારતીય દૂતાવાસે પોસ્ટ પર લખ્યું છે કે ‘જો તમે અમેરિકામાં તમારા રોકાણની મુદત કરતાં વધુ સમય રહો છો, તો તમને દેશનિકાલ કરવામાં આવી શકે છે.’ આ સિવાય ભવિષ્યમાં તમને અમેરિકામાં પ્રવેશવાથી કાયમી ધોરણે પ્રતિબંધિત કરવામાં આવી શકે છે. એનો અર્થ એ છે કે જો તમે નિયમોનું ઉલ્લંઘન કરશો, તો તમે ક્યારેય અમેરિકા જઈ શકશો નહીં. આ ચેતવણી એવા બધા ભારતીયો માટે છે જેઓ અલગ અલગ વિઝા પર અમેરિકામાં છે. આમાં ટુરિસ્ટ અને સ્ટુડન્ટ વિઝા તેમજ વર્ક પરમિટનો સમાવેશ થાય છે.
નક્કી થાય છે વિઝાનો સમયગાળો
અમેરિકામાં વિઝા પર રોકાણની એક નિશ્ચિત મર્યાદા છે. આ મર્યાદા I-94 ફોર્મ પર લખેલી છે. આ ફોર્મ અમેરિકામાં પ્રવેશ પર ઉપલબ્ધ છે. જો કોઈ વ્યક્તિ નિર્ધારિત મર્યાદા કરતાં એક દિવસ પણ વધુ રોકાય તો તેને કાનૂની સમસ્યાઓનો સામનો કરવો પડી શકે છે. જો કોઈ વ્યક્તિ વિઝાનો સમયગાળો વધારવા માંગતો હોય તો તેને USCIS (યુનાઈટેડ સ્ટેટ્સ સિટીઝનશિપ એન્ડ ઈમિગ્રેશન સર્વિસ)નો સંપર્ક કરવો જોઈએ. આ સંસ્થા લોકોને અમેરિકામાં તેમના રોકાણને લંબાવવામાં મદદ કરી શકે છે.
આ વર્ષે જાન્યુઆરીમાં ડોનાલ્ડ ટ્રમ્પ અમેરિકાના રાષ્ટ્રપતિ બન્યા બાદ, ઈમિગ્રેશન અને વિઝા સંબંધિત નિયમો કડક કરવામાં આવ્યા છે. ટ્રમ્પ વહીવટીતંત્રે વિઝા અને ઈમિગ્રેશન પર કડક નિયમો લાદ્યા છે. ડોનાલ્ડ ટ્રમ્પે તેમના ચૂંટણી પ્રચારથી જ વિઝા નિયમો અને ઈમિગ્રેશન કડક બનાવવાની વાત કરી હતી. ડોનાલ્ડ ટ્રમ્પે અમેરિકામાંથી ગેરકાયદેસર ઈમિગ્રન્ટ્સને દેશનિકાલ કરવા માટે ઝુંબેશ ચલાવી છે.
Disclaimer: અહીં આપેલી તમામ માહિતી માત્ર જાણકારી માટે છે. સંદેશ ન્યૂઝ તેની પુષ્ટિ કરતું નથી.
