- નિજ્જરની હત્યા કાંડ મુદ્દે ભારત અને કેનેડા વચ્ચે વિવાદ
- ભારતીય-કેનેડિયન માટે ઈન્ટરપોલ રેડ નોટિસની કરી માંગ
- 80 કિલોગ્રામ ડ્રગ્સમાં 60 વર્ષીય રાજ કુમાર મેહમીને સજા ફટકારી
ખાલિસ્તાની આતંકવાદી હરદીપ સિંહ નિજ્જરની હત્યાના કારણે ભારત અને કેનેડા વચ્ચેના સંબંધો ખૂબ જ ખરાબ થઈ ગયા છે. દરમિયાન, કેનેડિયન કાયદાના અમલીકરણે એક ભારતીય-કેનેડિયન માટે ઈન્ટરપોલ રેડ નોટિસની માંગ કરી છે જેને ડ્રગની હેરફેર માટે સજા થઈ છે અને તે ભારત ભાગી ગયો છે.
RCMPએ 13 ડિસેમ્બરના રોજ જારી કરેલા એક રિપોર્ટમાં જણાવ્યું હતું કે સરે શહેરના 60 વર્ષીય રાજ કુમાર મેહમીને સજા ફટકારવામાં આવી છે. 80 કિલોગ્રામ કોકેઈનની દાણચોરીમાં દોષી સાબિત થયા બાદ તેને 15 વર્ષની જેલની સજા ફટકારવામાં આવી હતી. પરંતુ સજાથી બચવા તે ભારત ભાગી ગયો હતો. પોલીસના જણાવ્યા અનુસાર તે અમેરિકાથી પ્રતિબંધિત સામગ્રી લાવવાનો પ્રયાસ કરી રહ્યો હતો.
માદક પદાર્થના જથ્થા સાથે ઝડપાયો હતો આરોપી
કેનેડા બોર્ડર સર્વિસીસ એજન્સી (CBSA)એ સેમી-ટ્રેલર ટ્રકની અંદર છુપાયેલ કોકેઈનની 80 સીલબંધ ઈંટો રિકવર કર્યા પછી મેહમીની શરૂઆતમાં બ્રિટિશ કોલંબિયા RCMP દ્વારા 6 નવેમ્બર, 2017ના રોજ ધરપકડ કરવામાં આવી હતી. મેહમીના ટ્રકમાંથી મળી આવેલ ડ્રગ્સની અંદાજિત શેરી કિંમત 3.2 મિલિયન કેનેડિયન ડોલર હતી.
15 વર્ષની જેલની સજા
મેહમીની દાણચોરીના આરોપમાં ધરપકડ કરવામાં આવી હતી. ગયા વર્ષે 6 સપ્ટેમ્બરે બ્રિટિશ કોલંબિયા સુપ્રીમ કોર્ટના જજે તેને દોષિત જાહેર કર્યો હતો. 16 નવેમ્બરના રોજ, બ્રિટિશ કોલંબિયાની સરે પ્રાંતીય અદાલતના ન્યાયાધીશે તેમને, તેમની ગેરહાજરીમાં, કુલ 15 વર્ષની જેલની સજા ફટકારી હતી. કેનેડિયન પોલીસના જણાવ્યા અનુસાર, મેહમી 11 ઓક્ટોબર, 2022ના રોજ વેનકુવરથી ટેકઓફ કરીને ભારત ભાગી ગયો હતો અને બીજા દિવસે નવી દિલ્હી પહોંચ્યો હતો.
આ કારણે પોલીસે આપી હતી ચેતવણી
પોલીસે જણાવાયું હતું કે, મેહમી માટે કેનેડા-વ્યાપી ધરપકડ વોરંટ જારી કરવામાં આવ્યું છે જ્યારે મેહમીને શોધવા અને અસ્થાયી રૂપે ધરપકડ કરવા માટે ઇન્ટરપોલ રેડ નોટિસની વિનંતી કરવામાં આવી છે. પોલીસે મેહમીને અંદાજે 6 ફૂટ ઊંચો અને 200 પાઉન્ડ વજનનો ગણાવ્યો હતો અને લોકોને તેની નજીક ન આવવા અને તેમની સ્થાનિક પોલીસ એજન્સીનો સંપર્ક કરવા વિનંતી કરી હતી.
