- ભારતીય વિદ્યાર્થીને વીકએન્ડમાં જીમમાં ચાકુ મારીને ઘાયલ કરવામાં આવ્યો
- વરુણ રાજના નિધનના સમાચાર અમે ભારે હૃદય સાથે શેર કરીએ છીએ:વાલપરાઈસો યુનિવર્સિટી
- અમારા કેમ્પસ સમુદાયે અમારા પોતાના એક સભ્યને ગુમાવ્યો
અમેરિકાના ઈન્ડિયાના રાજ્યમાં છરીના હુમલામાં ઘાયલ થયેલા ભારતીય વિદ્યાર્થી પી વરુણ રાજનું અવસાન થયું છે. આ માહિતી વાલપરાઈસો યુનિવર્સિટી દ્વારા આપવામાં આવી છે. તેલંગાણાના ખમ્મમના રહેવાસી વરુણને વીકએન્ડમાં જીમમાં ચાકુ મારીને ઘાયલ કરવામાં આવ્યો હતો ત્યારબાદ તેની હાલત નાજુક રહી હતી. પી વરુણ રાજને છેલ્લા ઘણા દિવસોથી લાઈફ સપોર્ટ સિસ્ટમ પર રાખવામાં આવ્યા હતા. વાલપરાઈસો યુનિવર્સિટીમાં કમ્પ્યુટર સાયન્સના વિદ્યાર્થી વરુણ પર 29 ઓક્ટોબરે જિમમાં જોર્ડન એન્ડ્રેડે છરી વડે માથા પર હુમલો કર્યો હતો. આ કેસની તપાસ ચાલી રહી છે.
શિકાગો નજીક વાલ્પરાઈસોમાં આવેલી ખાનગી યુનિવર્સિટીએ બુધવારે એક નિવેદન જારી કરીને કહ્યું હતું કે,વરુણ રાજના નિધનના સમાચાર અમે ભારે હૃદય સાથે શેર કરીએ છીએ. અમારા કેમ્પસ સમુદાયે અમારા પોતાના એક સભ્યને ગુમાવ્યો છે. આ દુઃખદ સમયે અમે સંવેદના અને પ્રાર્થના વરુણના પરિવાર અને મિત્રો સાથે છીએ. યુનિવર્સિટીએ કહ્યું છે કે વરુણનો પરિવાર મુશ્કેલ સમયમાંથી પસાર થઈ રહ્યો છે તેઓ સતત તેમની સાથે સંપર્કમાં છે અને તમામ શક્ય મદદ કરશે.
વરુણનો અભ્યાસ આવતા વર્ષે પૂરો થવાનો હતો
યુનિવર્સિટીએ 16 નવેમ્બરે વરુણને શ્રદ્ધાંજલિ આપવાનું આયોજન કર્યું છે. યુનિવર્સિટીએ જણાવ્યું હતું કે વરુણ કોમ્પ્યુટર સાયન્સમાં એમએસ કરી રહ્યો હતો. તે ઓગસ્ટ 2022માં અમેરિકા આવ્યો હતો. તેનો કોર્સ આવતા વર્ષે પૂરો થવાનો હતો. વરુણના પિતરાઈ ભાઈ અનિલ બાલેબોયને ABC7 શિકાગોને જણાવ્યું હતું કે આ ઘટના પછી તેની સ્થિતિમાં સુધારો થયો નથી. તેના શરીરના માત્ર એક ભાગમાં હલનચલન હતી. ફોર્ટ વેઈનની હોસ્પિટલમાં તેની સારવાર ચાલી રહી હતી.
‘વરુણ ઘણા સપનાઓ સાથે યુએસમાં ભણવા આવ્યો’
વરુણના ભાઈ અનિલ બાલેબોયને જણાવ્યું હતું કે તે લગભગ દોઢ વર્ષ પહેલા સારું શિક્ષણ મેળવવાની આશામાં ઇન્ડિયાના આવ્યો હતો. પરિવારની સ્થિતિનો ઉલ્લેખ કરતા તેમણે કહ્યું હતું કે તેમના માટે આ ખૂબ જ મુશ્કેલ છે કારણ કે કોઈ પણ માતા-પિતા તેમના બાળકની આવી સ્થિતિની અપેક્ષા નહીં રાખે. વરુણ પોતાના પરિવારને આર્થિક અને ભાવનાત્મક રીતે ટેકો આપવાના સપના સાથે અભ્યાસ માટે અમેરિકા આવ્યો હતો. વરુણ પર હુમલા બાદ પોલીસે હુમલાખોરની ધરપકડ કરી હતી. તેના પર ઘાતક હથિયાર વડે હુમલો અને હત્યાના પ્રયાસનો આરોપ છે.
