પરિવાર સાથે ન્હાવા ગયેલો 22 વર્ષીય યુવાન ઊંડા પાણીમાં ગરકાવ થતા બચાવના પ્રયાસો નિષ્ફળ રહ્યા, પરિવાર શોકમગ્ન
અગ્ર ગુજરાત, રાજકોટ
રાજકોટ નજીક પડધરી તાલુકાના રામપરા વિસ્તારમાં આવેલ નદીમાં ડૂબી જવાથી એક યુવાનનું કરુણ મોત નીપજતાં પરિવારમાં શોકનો માહોલ છવાઈ ગયો છે.
મળતી વિગતો મુજબ, રાજકોટના 53 વરિયા ક્વાર્ટરમાં રહેતો 22 વર્ષીય યુવાન લાલજી ભરતભાઈ ભોજવીયા રવિવારના રોજ કામની રજા હોવાને કારણે પડધરી રામપરા ખાતે પોતાના પરિવારજનો અને પાડોશીઓ સાથે મોજમજા માટે નદી પર ન્હાવા ગયો હતો. બપોરે અંદાજે 3:30 વાગ્યે ન્હાતા ન્હાતા તે અચાનક ઊંડા પાણીમાં ચાલ્યો જતાં ગરકાવ થઈ ગયો હતો. ઘટના બનતાં જ સાથે આવેલા લોકો દ્વારા તેને બચાવવાના પ્રયાસો હાથ ધરાયા હતા, પરંતુ પાણીની ઊંડાઈ અને પરિસ્થિતિને કારણે સમયસર બહાર કાઢી શકાયો નહોતો. પરિણામે લાલજીનું ઘટનાસ્થળે જ મોત નીપજ્યું હતું.
પરિવારજનોના જણાવ્યા મુજબ, લાલજી સેન્ટિંગ કામ કરી રોજગાર ચલાવતો હતો. તે પરિવારનો નાનો દીકરો હતો અને હજુ કુંવારો હતો. તેના લગ્ન માટે પણ વાતચીત ચાલી રહી હતી, પરંતુ તે પહેલાં જ આ દુર્ઘટનાએ પરિવારને ઘેરા આઘાતમાં મૂકી દીધો છે.
આ બનાવમાં તેની સાથે ગયેલા પાડોશીઓ હિરેનભાઈ રમેશભાઈ અને વાઘજીભાઈ દામજીભાઈ સહિતના લોકોએ બચાવ માટે પ્રયત્નો કર્યા હતા, છતાં યુવાનનો જીવ બચાવી શકાયો નહોતો. આકસ્મિક ઘટનાને પગલે ભોજવીયા પરિવાર પર દુઃખનો પહાડ તૂટી પડ્યો છે. આશાસ્પદ યુવાનના અકાળે અવસાનથી સમગ્ર વિસ્તારમાં શોકની લાગણી વ્યાપી ગઈ છે. સ્થાનિક સ્તરે પણ આ ઘટનાને લઈને દુઃખ વ્યક્ત કરવામાં આવી રહ્યું છે અને નદી જેવા સ્થળોએ સાવચેતી રાખવાની જરૂરિયાત ફરી એકવાર ઉજાગર થઈ છે.
