- ઓસ્ટ્રેલિયા અને ન્યુઝીલેન્ડ વચ્ચે પ્રથમ ટેસ્ટ રમાઈ રહી છે
- આ મેચમાં ઉસ્માન ખ્વાજા ફરીથી ICCના નિશાના પર
- ખ્વાજાના બેટના સ્ટીકર પર કબૂતર જેવા પક્ષીનું ચિત્ર હતું
ઓસ્ટ્રેલિયન ક્રિકેટ ટીમ હાલમાં ન્યુઝીલેન્ડના પ્રવાસે છે અને બંને ટીમોની પ્રથમ ટેસ્ટ મેચ વેલિંગ્ટનમાં રમાઈ રહી છે. આ મેચ સાથે જોડાયેલી એક મહત્વની બાબત સામે આવી છે, કારણ કે પ્રથમ ટેસ્ટ મેચના ત્રીજા દિવસે ઓસ્ટ્રેલિયાના ઓપનર ઉસ્માન ખ્વાજાને તેના બેટમાંથી એક સ્ટીકર હટાવવાનો આદેશ આપવામાં આવ્યો હતો.
ખ્વાજા ફરીથી ICCના નિશાના પર
ટેસ્ટ મેચના ત્રીજા દિવસે ઓસ્ટ્રેલિયન ટીમનો બીજો દાવ ચાલી રહ્યો હતો અને એક સમયે તેની લીડ 217 રનની હતી, પરંતુ ત્યાર બાદ ઉસ્માન ખ્વાજાનું બેટ તૂટવાને કારણે તેણે બેટ બદલ્યું હતું. તેણે ઘણા બેટનું પરીક્ષણ કર્યું અને અંતે એક પસંદ કર્યું જેમાં બેટના સ્ટીકર પર કબૂતર જેવા પક્ષીનું ચિત્ર હતું. આ તસવીરના ઉપયોગને કારણે ઉસ્માન ખ્વાજા ફરીથી ICCના નિશાના પર આવી ગયો છે.
અગાઉ, ડિસેમ્બર 2023 માં પાકિસ્તાન સામેની ટેસ્ટ સીરિઝ દરમિયાન, ખ્વાજાએ તેની ટી-શર્ટ પર સમાન ચિત્ર છાપવાની મંજૂરી માંગી હતી, જેને ICC દ્વારા નકારી કાઢવામાં આવી હતી. આ તસવીર ચાલી રહેલી કટોકટી દરમિયાન ગાઝાના લોકો પ્રત્યે સમર્થન વ્યક્ત કરે છે, પરંતુ ICC આંતરરાષ્ટ્રીય મેચો દરમિયાન આ તસવીરને રાજકીય દ્રષ્ટિકોણથી જોઈ રહ્યું છે.
ખ્વાજાએ ICCની ટીકા કરી
તે જ પ્રવાસમાં ઉસ્માન ખ્વાજાને જૂતાનો ઉપયોગ કરતા અટકાવવામાં આવ્યો હતો જેના પર માનવ અધિકારોને સમર્થન આપતા વાક્યો લખેલા હતા. તેણે પોતાના હાથ પર કાળી પટ્ટી પહેરવાની પરવાનગી પણ માંગી હતી. તાલીમ દરમિયાન તેણે એ જ બેટથી પ્રેક્ટિસ પણ કરી હતી જેના પર કબૂતર જેવું પક્ષી છપાયેલું હતું અને ખ્વાજાએ તેને હટાવવા બદલ ICCની ટીકા પણ કરી હતી.
ઓસ્ટ્રેલિયાના કેપ્ટન પેટ કમિન્સ અને ક્રિકેટ ઓસ્ટ્રેલિયાના ચીફ નિક હોલી પણ ઉસ્માન ખ્વાજાના સમર્થનમાં આવ્યા છે. ઓસ્ટ્રેલિયા અને ન્યુઝીલેન્ડ વચ્ચેની પ્રથમ ટેસ્ટ મેચની વાત કરીએ તો, ખ્વાજાએ પ્રથમ ઇનિંગમાં 33 રન અને બીજા દાવમાં 28 રન બનાવ્યા હતા.
