- 11 બાંગ્લાદેશીનો ભારતમાં ઘૂસણખોરીનો પ્રયાસ
- બાંગ્લાદેશી નાગરિકોની BSFએ સરહદ પરથી ધરપકડ
- બાંગ્લાદેશીએ બોર્ડર પર BSF જવાનો પર હુમલો કર્યો હતો
ભારતમાં ઘૂસણખોરીનો પ્રયાસ કરતા 11 બાંગ્લાદેશી નાગરિકોની BSFએ સરહદ પરથી ધરપકડ કરી છે. BSFએ જણાવ્યું હતું કે, આ બાંગ્લાદેશી નાગરિકો પશ્ચિમ બંગાળ, ત્રિપુરા અને મેઘાલયમાં આંતરરાષ્ટ્રીય સરહદ દ્વારા ભારતમાં ઘૂસણખોરી કરવાનો પ્રયાસ કરતી વખતે પકડાયા હતા.
BSFના પ્રવક્તાએ કહ્યું કે ધરપકડ કરાયેલ લોકોની પૂછપરછ કરવામાં આવી રહી છે અને આગળની કાનૂની કાર્યવાહી માટે તેમને રાજ્ય પોલીસને સોંપવાની તૈયારી કરવામાં આવી રહી છે. પ્રવક્તાએ જણાવ્યું હતું કે BSF પરસ્પર મુદ્દાઓ, ખાસ કરીને ભારતીય નાગરિકો અને બાંગ્લાદેશમાં લઘુમતી સમુદાયોના લોકો પર થતા અત્યાચારને રોકવા માટે તેના સમકક્ષ BGB સાથે નિયમિત સંપર્કમાં છે.
સેન્ટ્રલ આર્મ્ડ પોલીસ ફોર્સ (CAPF) એ જણાવ્યું કે પશ્ચિમ બંગાળના માલદા જિલ્લામાં ભારત-બાંગ્લાદેશ સરહદ પર એક દાણચોર માર્યો ગયો. તસ્કરોના એક જૂથે BSF જવાનો પર હુમલો કર્યો હતો, જે બાદ તેમની સામે જવાબી કાર્યવાહી કરવામાં આવી હતી. આ ઘટના 11-12 ઓગસ્ટની વચ્ચેની રાત્રે બની હતી જ્યારે દાણચોરોના એક જૂથે દળની દક્ષિણ બંગાળ સરહદ હેઠળની 115મી બટાલિયનની ચાંદનીચક બોર્ડર ચોકીમાંથી બીએસએફના જવાનો પર હુમલો કર્યો હતો.
