- યશસ્વી જયસ્વાલ હાલમાં શાનદાર ફોર્મમાં જોવા મળી રહ્યો છે
- ICCએ તાજેતરમાં ટેસ્ટ રેન્કિંગ જાહેર કર્યું છે
- જયસ્વાલે ટેસ્ટ રેન્કિંગમાં 14 સ્થાનની જોરદાર છલાંગ લગાવી
ભારતીય ટીમનો સ્ટાર ઓપનિંગ બેટ્સમેન યશસ્વી જયસ્વાલ હાલમાં ટેસ્ટમાં ઈંગ્લેન્ડના બોલરોની ધોલાઇ કરી રહ્યો છે. પ્રથમ વિશાખાપટ્ટનમ ટેસ્ટમાં બેવડી સદી ફટકાર્યા બાદ તેણે રાજકોટ ટેસ્ટની બીજી ઇનિંગમાં પણ બેવડી સદી ફટકારી હતી. જે બાદ આ યુવા ઓપનિંગ બેટ્સમેને ICC ટેસ્ટ રેન્કિંગમાં જબરદસ્ત ફાયદો કર્યો છે. જયસ્વાલે ટેસ્ટ રેન્કિંગમાં 14 સ્થાનનો જોરદાર છલાંગ લગાવ્યો છે અને તે 15માં સ્થાને પહોંચી ગયો છે. હાલમાં તેના 699 પોઈન્ટ છે. જોકે, ઈંગ્લેન્ડ સામે હજુ બે ટેસ્ટ મેચ બાકી છે અને જે રીતે જયસ્વાલ બેટિંગ કરી રહ્યો છે. તેને જોઈને લાગે છે કે સિરીઝના અંત સુધીમાં તે ટોપ 10માં પોતાનું સ્થાન નિશ્ચિત કરી લેશે.
ટોપ 15માં ચાર ભારતીય
ICCએ તાજેતરમાં ટેસ્ટ રેન્કિંગ જાહેર કર્યું છે. જેમાં ચાર ભારતીયોએ ટોપ 15માં પોતાનું સ્થાન નિશ્ચિત કરી લીધું છે. આ યાદીમાં વિરાટ કોહલી ટોપ 10માં 7મા સ્થાને છે. જ્યારે કેપ્ટન રોહિત શર્મા 11માં સ્થાન પર છે. ત્યારબાદ ભારતીય ટીમનો સ્ટાર વિકેટકીપર બેટ્સમેન ઋષભ પંત 14માં સ્થાને છે અને હવે યશસ્વી જયસ્વાલ 15માં સ્થાને પહોંચી ગયો છે. આ પછી હવે ચાર ભારતીય બેટ્સમેન ટોપ 15માં પોતાનું સ્થાન બનાવવામાં સફળ થયા છે.
કેન વિલિયમસન ટોપ પર
ન્યુઝીલેન્ડનો પૂર્વ કેપ્ટન કેન વિલિયમસન શાનદાર ફોર્મમાં છે. હેમિલ્ટનમાં દક્ષિણ આફ્રિકા સામે રમાયેલી બીજી ટેસ્ટ મેચમાં તેણે વિજયી સદી ફટકારી હતી. સાઉથ આફ્રિકા સામેની બીજી ટેસ્ટની બીજી ઇનિંગમાં વિલિયમસન નંબર 3 પર બેટિંગ કરવા આવ્યો હતો. જે બાદ તેણે 133 રનની અણનમ ઇનિંગ રમી હતી. કેન વિલિયમસનની આ સદીની ઇનિંગની મદદથી ન્યૂઝીલેન્ડે દક્ષિણ આફ્રિકા સામે ટેસ્ટ ઈતિહાસની પ્રથમ સીરિઝ જીતી હતી.
શાનદાર ફોર્મમાં છે યશસ્વી જયસ્વાલ
ભારતીય ટીમનો ઓપનિંગ બેટ્સમેન યશસ્વી જયસ્વાલ ઈંગ્લેન્ડ સામેની ટેસ્ટ સીરિઝમાં શાનદાર પ્રદર્શન કરી રહ્યો છે. જયસ્વાલે આ સીરિઝમાં અત્યાર સુધીમાં 500થી વધુ રન બનાવ્યા છે. આ સિવાય તેણે આ સિરીઝમાં સૌથી વધુ બે બેવડી સદી પણ ફટકારી છે. દરેક દિગ્ગજ ખેલાડી આ યુવા બેટિંગના વખાણ કરતા જોવા મળે છે. જો 22 વર્ષીય યશસ્વી જયસ્વાલ આ જ રીતે સીરિઝમાં બેટિંગ કરવાનું ચાલુ રાખશે તો સીરિઝના અંત સુધીમાં તે ટોપ 10માં પોતાનું સ્થાન બનાવી લેશે. તમને જણાવી દઈએ કે યશસ્વી જયસ્વાલે અત્યાર સુધી માત્ર 7 ટેસ્ટ મેચ રમી છે.
