ગાઝા સાથે યુદ્ધ સ્થિતિ વચ્ચે ઇઝરાય અત્યારે રાજકીય સંકટનો સામનો કરી રહ્યું છે. આજે બુધવારના રોજ ઇઝરાયલમાં સંસદ ભંગ કરવા માટે એક બિલ રજૂ કર્યું. વડા પ્રધાન બેન્જામિન નેતાન્યાહૂની સરકાર ગઠબંધનની સરકાર છે. અને આ ગઠબંધન સરકારમાં કેટલાક અતિ-રૂઢિચુસ્ત સાથી પક્ષો છે. નેતાન્યાહૂના ગઠબંધનમાં જોડાયેલા અતિ-રૂઢિચુસ્ત પક્ષો વિપક્ષના પ્રસ્તાવનું સમર્થન કરી શકે છે. જો આમ થશે તો નેતાન્યાહૂ સરકાર પડી ભાગશે અને ઇઝરાયલમાં ફરી ચૂંટણી યોજવાની જરૂર પડી શકે છે.
વિપક્ષના પ્રસ્તાવના સમર્થનની આપી ચેતવણી
દુનિયામાં અત્યારે યુક્રેન અને રશિયા તેમજ ઇઝરાયલ અને ગાઝા વચ્ચે યુદ્ધ સ્થિતિનો તણાવ દૂર થયો નથી. દરમિયાન ઇઝરાયલ અત્યારે રાજકીય મોરચે પણ ઘેરાયું છે. ઇઝરાયલમાં વિપક્ષ દ્વારા સંસદ ભંગ કરવા બિલ રજૂ કરવામાં આવ્યું હતું. અને વડા પ્રધાન બેન્જામિન નેતન્યાહૂની ગઠબંધનમાં રહેલા સાથી અતિ-રૂઢિચુસ્ત પક્ષોએ પણ તેમને ચેતવણી આપી છે કે તેઓ વિપક્ષના પ્રસ્તાવનું સમર્થન કરી શકે છે. નેતાન્યાહૂ સરકાર પર સંકટના વાદળનો મામલો લશ્કરી સેવા સાથે સંકળાયેલો છે.
કેમ સંસદ ભગનું બિલ રજૂ કરાયું
ઇઝરાયલમાં વિપક્ષ દ્વારા સંસદ ભંગ કરવા બિલ રજૂ કરવાનું મૂળ કારણ લશ્કરી સેવામાંથી અતિ-રૂઢિચુસ્ત યુવાનોને મુક્તિ આપતો કાયદો છે. નેતાન્યાહૂ સરકાર અત્યાર સુધી બિલ પસાર કરી શકી નથી. ગાઝા યુદ્ધને કારણે લશ્કરી સેવામાંથી યુવાનોને મુક્ત કરવાનો મામલો વધુ સંવેદનશીલ બન્યો છે. વિપક્ષનું કહેવું છે કે અત્યારે જ્યારે યુદ્ધ સ્થિતિનો માહોલ છે અને મોટાભાગના યુવાનો લશ્કરમાં સેવા આપી રહ્યા છે ત્યારે ચોક્કસ સમુદાયના યુવાનોને મુક્તિ આપવી એ અયોગ્ય છે. અને આ મામલે નેતાન્યાહૂ સરકાર પર સંકટના વાદળ તોળાયા છે. જો વિપક્ષ દ્વારા રજૂ કરવામાં આવેલ બિલને નેતાન્યાહૂના સાથી દળોનો ટેકો મળશે તો નિશ્ચિતપણે ઇઝરાયલમાં ચૂંટણી આવશે.
