વિશ્વના ૧૭૪ દેશો સાથે હિરાનો વેપાર કરતી ડાયમંડ બિઝનેશ લોબીએ પણ લોબીંગ શરૂ કર્યુ !
જે લોકો પ૦થી વધુ વય વટાવી ગયા હશે તેમણે બાળપણમાં એક વાર્તા સાંભળી હશે. જેમાં રાત્રે મા ઘરમાં વડા બનાવે છે. સંતાનો સુઇ ગયા હોય છે. પણ વડાની સુગંધથી જાગી જઇને એક પછી એક બાળક જાગીને છમ્મા મને વડુ. એમ કહી વડુ આપે છે. મા એક પછી એક સંતાનોને વડા ખવડાવતી જાય છે. ગુજરાતમાં ગીફટ સિટીમાં દારૂબંધીની છુટનો કિસ્સો તેની યાદ અપાવે છે. ગીફટી સિટી બાદ હવે સુરતના ડાયમંડ બુર્સમાં દારૂબંધીમા છુટ માટે હિલચાલ શરૂ થયાનું જાણમાં આવ્યુ છે. ભવિષ્યમાં કંડલા ફ્રિ ટ્રેડ ઝોન અને ગુજરાતના મહાબંદોરોમાંથી આવી માગણી ઉઠે તો નવાઇ નહિ.
૧૭મી ડિસેમ્બરે પી.એમ. મોદીએ સુરતના ઇન્ટરનેશનલ ડાયમંડ બુર્સનું ઉદઘાટન કર્યુ. આ ડાયમંડ બુર્સ થકી સુરતના હિરા ઉદ્યોગનો વેપાર વર્ષે બે લાખ કરોડ કરવાનો લક્ષ્યાંક છે.વડાપ્રધાને સાથે સાથે સુરતમાં ઇન્ટરનેશનલ એરપોર્ટનું પણ ઉદ્ઘાટન કરયુ હતું. સુરતના હિરા ઉદ્યોગપતિઓ ઓલરેડી વિશ્વના ૧૭૪ દેશો સાથે હિરા વેપાર કરે છે. સુરતમાં હિરા ઉદ્યોગ થકી પ્રત્યક્ષ રીતે પોણા બે લાખ લોકોને રોજગારી મળે છે. સુરતના હિરા ઉદ્યોગ વેપારમાં સૌરાષ્ટ્રના અનેક ઉદ્યોગ સાહસિકોનો હાથ છે. તમે લવજીભાઇ બાદશાહ જેવા અનેક નામી અનામીઓને યાદ કરી શકો. ધોળકિયા બંધુઓને અને અન્યોના કારણે સુરતના હિરા ઉદ્યોગનું એકસટેન્શન અમરેલી અને ભાવનગર સુધી નાના પાયે હિરા ઘસાઇ ક્ષેત્રમાં ખાસ થયુ છે. આ હિરા ઉદ્યોગને હવે વૈશ્વિક વ્યાપારમાં અવરોધરૂપ દારૂબંધીમાંથી મુકિત જોઇએ છે. આ માટે ઉદ્યોગ વર્તુળોમાંથી લોબીંગ શરૂ થયુ છે.
ખાસ કરીને ગાંધીનગરના ગીફટ સિટીને ગુજરાત સરકારે વાઇબ્રન્ટ પૂર્વે જ નશાબંધીમાંના કાયદામાંથી મુકિત આપી બરાબર એ જ તર્જ ઉપર સુરતના નવા ડાયમંડ બુર્સને મુકિત આપવાની માગણી થઇ રહી છે. ગુજરાતની હવામાં જ બિઝનેશ છે. હવે વેપાર ઉદ્યોગને આ હવામાં માત્ર વધુ સફળતાનો નશો જોઇએ છે. આપબળે આગળ આવેલા વેપાર ઉદ્યોગ વર્તુળમાંથી વિશ્વમાં હરેલા ફરેલાં સફળ બિઝનેશમેનોને ગુજરાતની દારૂબંધી સાંપ્રત વૈશ્વિક પ્રવાહોમાં ઇરરિલેવન્ટ લાગે છે. મતલબ કે અવ્યહવારૂ ,અપ્રસ્તુત લાગે છે. તેમની પાસે તેમના પોઇન્ટ છે. ગુજરાત પાસે હિરા ઉદ્યોગ છે. જે વૈશ્વિક છે. ક્રુડ અને પેટ્રોકેમિકલ છે જે વૈશ્વિક છે. ગુજરાત પાસે ઇજનેરી ઉદ્યોગ છે એ વૈશ્વિક છે. ગુજરાત પાસે ફાર્માસ્યુટિકલ બિઝનેશ છે જે વૈશ્વિક છે. ગુજરાત પાસે સિમેન્ટ બિઝનેશ છે જે વૈશ્વિક છે. સરેરાશ ગુજરાતી બિઝનેશનો થોડો વિકાસ થાય એટલે દેશ વિદેશની સફર શરૂ કરે છે. જેમાંથી કેટલાક ધાર્મિક રીતે અને વ્યહવારની રીતે ચુસ્ત રહે છે એ ધંધાર્થીઓ ચુસ્ત વેજ અને વ્યસનમુકત રહે છે. બહુમતી વર્ગ જૈસા દેશ વૈસા વેશની ફિલોસોફીમાં માને છે.
આવા વર્ગને ગીફટ સિટીમાં ગુજરાત સરકારે દારૂબંધીમાંથી છુટ આપી એટલે ફયુચર સારૂ દેખાય છે. તેમને દારૂબંધી વધુ સોફટ થશે એવી આશા જાગી છે. કેબિનેટ મંત્રી રાઘવજી પટેલે પણ કેસ ટુ કેસ ગીફટ સિટી જેવી વિચારણા કરવા મમરો મૂકયો છે.
ગીફટ સિટીમાં દારૂબંધી દૂર થશે તો સરકાર દારૂબંધીની બાબતમાં સોફટ સ્ટેટ થશે એવો માહોલ બની રહયો છે. જો સુરત ડાયમંડ બુર્સ દારૂબંધીમાંથી સતાવાર મુકિત માંગશે અને તેને મળશે તો ભવિષ્યમાં કંડલા ફ્રિ ટ્રેડ ઝોન ,કંડલા પોર્ટ જે ઇન્ટરનેશનલ બિઝનેશ કલ્ચર ધરાવે છે ત્યાં પણ આવી માગણી થવાની શકયતા નકારી શકાય નહિ.
ગુજરાતની સ્થાપના બાદ ૬3 વર્ષે ગુજરાતમાં ફરી એક વખત ગુજરાતની દારૂબંધીનો મુદો ચર્ચાના એરણ ઉપર આવ્યો છે. પૂર્વ મુખ્યમંત્રી શંકરસિંહ તેમના સતાકાળમાં જ ગુજરાતમા દારૂબંધી હટાવવાની તરફેણમાં હતાં. તેમનો રાજપાટ ઝાઝો ચાલ્યો નહી. અન્યથા તેઓ આ દારૂબંધી હટાવી દેત. ગઇ કાલે તેમણે દારૂબંધી હટાવવાની વાત કરી તેમા એક બાબત મેરીટ વાળી છે. ગુજરાતમાં દારૂબંધી અંગે દંભ છે. હકિકતમાં ગુજરાતની શેરી અને ગલીએ દારૂ મળે છે. ભ્રષ્ટાચારનું ઘર દારૂબંધી છે. સરકાર દ્વિધામાં છે. આ બધી હિલચાલ ઉપરથી કહિ શકાય કે સ્ટેટ પાવરફુલ છે. પોલીટીકલ વીલ અને બિઝનેશમેન અને ઈન્ડ્રસ્ટ્રિયલ લોબીની વીલની જુગલબંધી આગળ વધશે તો ગુજરાત સંક્રાંતિકાળમાંથી પસાર થઇ રહયો છે. ગુજરાતનો ૧૬૦૦ કિલોમીટરનો દરિયો,ટુરિઝમ અને બિઝનેશ લોબી આગળ કરી દારૂબંધી મુકત કરવા ન કરે તો હળવી કરવા તો મુદા આગળ ધરશે જ. નયા ગુજરાત માટે આંતરપ્રવાહો તેજ થઇ રહયા છે. જેનો વિરોધ સ્વાભાવિક છે. પરંતુ બિટવીન ધ લાઇન્સ કહે છે કે ગુજરાતની જનતાએ અને સરકારોએ નૈતિકતાના ઓઠા હેઠળ જાજમ નીચે અત્યાર સુધી છુપાવી રાખેલો એક મુદો હવે નિર્ણાયક મોડ ઉપર આવ્યો છે.
