રોહિત શર્માની કેપ્ટનશીપ હેઠળ, ભારતીય ટીમે શાનદાર પ્રદર્શન કર્યું છે અને ICC ચેમ્પિયન્સ ટ્રોફી 2025 જીતી છે. દુબઈમાં યોજાયેલી ટુર્નામેન્ટની ફાઈનલમાં ભારતીય ટીમે ન્યુઝીલેન્ડને 4 વિકેટથી હરાવ્યું. આ સાથે ટીમ ઈન્ડિયાએ ત્રીજી વખત ચેમ્પિયન્સ ટ્રોફીનો ખિતાબ કબજે કર્યો છે.
ફેન્સ જાણવા માટે ઉત્સુક છે કે ચેમ્પિયન્સ ટ્રોફી પછી ભારતીય ટીમનું આગામી મિશન શું છે? તમને જણાવી દઈએ કે હવે ભારતીય ટીમને 3 મહિનાની લાંબી રજા મળી છે. આ સમયગાળા દરમિયાન તેને કોઈ આંતરરાષ્ટ્રીય ચેમ્પિયનશિપ કે સિરીઝ રમવાની જરૂર નથી.
9 મહિનામાં ભારતને બીજી ICC ટ્રોફી અપાવ્યા બાદ કેપ્ટન રોહિત શર્મા મુંબઈ પરત ફર્યો છે. ભારતીય ટીમના ખેલાડીઓને 22 માર્ચથી શરૂ થનારી IPL માટે તેમની ટીમમાં જોડાતા પહેલા એક અઠવાડિયાનો આરામ મળશે.
બે મહિના લાંબી IPLને કારણે ખેલાડીઓએ આરામને પ્રાથમિકતા આપી છે. BCCI પણ T20 વર્લ્ડકપ જીતીને ટીમ ઘરે પરત ફરતી વખતે જે રીતે સન્માન સેરેમની યોજી હતી તે રીતે કોઈપણ પ્રકારનો સન્માન સેરેમની યોજવાની યોજના ધરાવતું નથી.
IPL મહાકુંભમાં પ્રવેશ કરશે ખેલાડીઓ
આનો અર્થ એ થયો કે ખેલાડીઓ પાસે શ્વાસ લેવાનો પણ સમય નથી. હવે તેને ઈન્ડિયન પ્રીમિયર લીગની 2025 સીઝન માટે તૈયારી કરવાની છે, જેને T20 ક્રિકેટનો મહાકુંભ કહેવામાં આવે છે. આઈપીએલ 22 માર્ચથી શરૂ થશે, જ્યારે ફાઈનલ 25 મેના રોજ રમાશે.
ગયા વખતની જેમ આ સિઝનમાં પણ IPLમાં 10 ટીમો ભાગ લેશે. આ ટીમો વચ્ચે 65 દિવસમાં ફાઈનલ સહિત કુલ 74 મેચ રમાશે. આ બધી મેચો ભારતમાં ફક્ત 13 સ્થળોએ જ યોજાશે. આ રીતે, ભારતીય ટીમ 3 મહિનાની રજા પર હોવા છતાં, ખેલાડીઓને બિલકુલ આરામ મળશે નહીં.
ઈંગ્લેન્ડ પ્રવાસ સાથે બે વર્ષના પડકારજનક ચક્રની થશે શરૂઆત
જુલાઈમાં T20 વર્લ્ડકપ જીત સાથે રાહુલ દ્રવિડનો કાર્યકાળ સમાપ્ત થયા પછી ગૌતમ ગંભીરે રાષ્ટ્રીય ટીમની કમાન સંભાળ્યાને 8 મહિના થઈ ગયા છે. આગામી બે મહત્વપૂર્ણ વર્ષોમાં ભારતીય ક્રિકેટમાં મોટા ફેરફારોની અપેક્ષા છે. ગંભીર હવે એવા તબક્કામાં પહોંચશે જ્યાં તેને ત્રણ અલગ અલગ પડકારોનો સામનો કરવો પડશે, જેની શરૂઆત ઈંગ્લેન્ડના ટેસ્ટ પ્રવાસથી થશે. આ, હંમેશની જેમ, IPL પછી થશે, તેથી તૈયારી માટે બિલકુલ સમય રહેશે નહીં.
