- EDએ આમ આદમી પાર્ટીના ઘણા મોટા નેતાઓના ઘરો પર દરોડા પાડ્યા
- દરોડા બાદ EDએ હવે જપ્ત અને રિકવર કરાયેલા પુરાવા અંગે માહિતી આપી
- આમ આદમી પાર્ટી EDના દાવાઓ ફગાવ્યાં, કહ્યું: કાયદેસર કાર્યવાહી કરશે
મની લોન્ડરિંગના કેસમાં ગત મંગળવારે એન્ફોર્સમેન્ટ ડિરેક્ટોરેટ (ED) એ આમ આદમી પાર્ટીના ઘણા મોટા નેતાઓના ઘરો પર દરોડા પાડ્યા હતા. EDની ટીમે દિલ્હીના મુખ્યમંત્રી અરવિંદ કેજરીવાલના ખાનગી સચિવના ઘરે પણ મુલાકાત લીધી હતી. દિલ્હી સહિત અનેક સ્થળોએ દરોડા પાડવામાં આવ્યા હતા. દરોડા બાદ EDએ હવે જપ્ત અને રિકવર કરાયેલા પુરાવા અંગે માહિતી આપી છે.
ED વિરુદ્ધ કાયદેસર કાર્યવાહી કરી શકે છે AAP
મીડિયા અહેવાલ અનુસાર, દિલ્હી જલ બોર્ડ કૌભાંડમાં કારવમાં આવેલ કાર્યવાહી બાદ, EDએ બુધવારે આરોપ લગાવ્યો હતો કે DJBમાં ભ્રષ્ટાચારના પૈસા આમ આદમી પાર્ટીને ચૂંટણી ફંડ તરીકે આપવામાં આવ્યા હતા. જો કે, મુખ્યમંત્રી અરવિંદ કેજરીવાલે આ આરોપને નકારી કાઢ્યા છે. પાર્ટીએ એક નિવેદન જાહેર કરીને કહ્યું છે કે અમને બદનામ કરવા બદલ એજન્સી સામે કાયદેસરની કાર્યવાહી કરવામાં આવશે.
તેમણે વધુમાં કહ્યું કે કોર્ટમાં એક પણ કેસ સાબિત થઈ શક્યો નથી. આ દર્શાવે છે કે તેમનો એકમાત્ર હેતુ મીડિયામાં સનસની પેદા કરવા અને સીએમ અરવિંદ કેજરીવાલ અને આમ આદમી પાર્ટીને બદનામ કરવાનો છે. કોઈપણ પુરાવા વગર આમ આદમી પાર્ટીનું નામ લઈને EDએ ફરી એકવાર સાબિત કરી દીધું છે કે તે BJPના મુખપત્ર સિવાય બીજું કંઈ નથી. અમે AAPને બદનામ કરવા બદલ ED સામે કાયદેસરની કાર્યવાહી કરીશું.
EDએ દરોડા બાદ આપી હતી માહિતી
દિલ્હી જલ બોર્ડ કૌભાંડ કેસમાં EDએ દિલ્હી-વારાણસી અને ચંદીગઢમાં ઘણી જગ્યાએ દરોડા પાડ્યા હતા. EDએ સર્ચ ઓપરેશન દરમિયાન ઘણી વસ્તુઓ જપ્ત કરી છે. માહિતી આપતા EDએ કહ્યું કે ઘણા દસ્તાવેજો, ડિજિટલ પુરાવા અને 1.97 કરોડ રૂપિયા રિકવર કરવામાં આવ્યા છે. 4 લાખનું વિદેશી ચલણ પણ જપ્ત કરવામાં આવ્યું છે.
આતિશીએ EDની તપાસ પર ઉઠાવ્યા સવાલ
મંગળવારે મુખ્યમંત્રીના પીએસ અને સાંસદ એનડી ગુપ્તાના ઘરે EDના દરોડાની કાર્યવાહીને લઈને આમ આદમી પાર્ટીએ સવાલો ઉઠાવ્યા છે. AAPના નેતા આતિશીએ કહ્યું કે EDનો અસલી ચહેરો હવે દેશની સામે ખુલ્લો પડી ગયો છે. EDએ 16 કલાક સુધી દરોડા પાડ્યા, પરંતુ છેલ્લે સુધી તેણે જણાવ્યું ન હતું કે કયા કેસમાં દરોડા પાડવામાં આવ્યા છે. EDએ ન તો તેમની પૂછપરછ કરી, ન તો તેમના ઘરની તપાસ કરી, ન તો તેમના પંચનામામાં કોઈ કેસનો ઉલ્લેખ કર્યો.
