2.80 લાખની સામે 18 લાખ વસૂલ્યા છતાં વ્યાજખોર શખ્સ કોન્ટ્રાક્ટરનું ટ્રેક્ટર પડાવી ગયો
પઠાણી ઉઘરાણી અને વારંવાર જાનની ધમકીથી ત્રસ્ત કોન્ટ્રાક્ટરે માલવિયાનગર પોલીસમાં નોંધાવી ફરિયાદ
અગ્ર ગુજરાત, રાજકોટ
રાજકોટ શહેરમાં વ્યાજખોરી અને દબાણ દ્વારા ઉઘરાણીનો વધુ એક ગંભીર બનાવ સામે આવ્યો છે. એક સરકારી કોન્ટ્રાક્ટરે મજૂરોના પગાર માટે લીધેલા થોડા રૂપિયાના લોન સામે ભારે વ્યાજ ચૂકવ્યા છતાં આરોપીએ વધુ રકમની માંગણી ચાલુ રાખી, સાથે જ ધમકી આપી મિલ્કત કબજે કરી લીધાનું ફરિયાદમાં બહાર આવ્યું છે.
માહિતી મુજબ, કાલાવડ રોડ પર ગુલાબ વાટિકા વિસ્તારમાં રહેતા 54 વર્ષીય મોહનભાઈ ધરમશીભાઈ હાપલિયાએ માલવિયાનગર પોલીસ મથકે ફરિયાદ નોંધાવી છે. તેમણે રેલનગર વિસ્તારમાં રહેતા પ્રતિપાલસિંહ સજુભા ગોહિલ સામે ગંભીર આક્ષેપો કર્યા છે. ફરિયાદ મુજબ, વર્ષ 2023 દરમિયાન મોહનભાઈને મજૂરોના પગાર માટે તાત્કાલિક નાણાંની જરૂર પડી હતી. તે સમયે તેમની ઓળખ આરોપી સાથે થઈ હતી, જેમણે પોતે ફાઇનાન્સનો ધંધો કરતા હોવાની વાત કરી સહાય કરવાની ખાતરી આપી હતી. ત્યારબાદ મોહનભાઈએ તબક્કાવાર કુલ રૂ.2.80 લાખ રૂપિયા માસિક 3 ટકા વ્યાજે લીધા હતા.
શરૂઆતમાં મોહનભાઈ નિયમિત રીતે વ્યાજ ચૂકવતા હતા, પરંતુ થોડા સમય બાદ આરોપીએ અતિશય વ્યાજની માંગણી શરૂ કરી હતી. ફરિયાદ મુજબ, એક સમયે આરોપીએ દરરોજ રૂ.3 હજાર પ્રમાણે મહિને લગભગ રૂ.2.40 લાખ વ્યાજ માગ્યું હતું, જે ડરના કારણે ચૂકવવું પડ્યું હતું. આ પછી પણ દબાણ યથાવત રાખીને દર મહિને રૂ.50 હજાર વ્યાજ તરીકે વસૂલવામાં આવતું રહ્યું હતું. મોહનભાઈએ જણાવ્યું છે કે અત્યાર સુધીમાં તેઓએ કુલ રૂ.18.50 લાખથી વધુ રકમ વ્યાજ પેટે ચૂકવી દીધી હોવા છતાં આરોપી વધુ પૈસા માંગતો રહ્યો હતો.
મામલો એટલો વધી ગયો કે આરોપીએ બળજબરીથી મોહનભાઈનું ટ્રેક્ટર પણ કબજે કરી લીધું હતું. કોઠારિયા રોડ પર આવેલી સાઇટ પરથી ટ્રેક્ટર ઉઠાવી લેતાં પીડિત પર વધુ દબાણ ઊભું થયું હતું. આ ઉપરાંત આરોપી દ્વારા સતત ફોન પર ગાળો આપી જાનથી મારી નાખવાની ધમકીઓ આપવામાં આવતી હતી. ફરિયાદમાં એવો પણ ઉલ્લેખ છે કે આરોપી પીડિતના ઘરે જઈને પણ ધમકી આપવાનો પ્રયાસ કરતો હતો.
આ ત્રાસથી કંટાળી મોહનભાઈએ પહેલા પોલીસ કમિશનરને અરજી કરી હતી અને ત્યારબાદ માલવિયાનગર પોલીસ મથકે સત્તાવાર ફરિયાદ નોંધાવી છે. પોલીસે ફરિયાદના આધારે આરોપી સામે ગુનો નોંધી વધુ તપાસ શરૂ કરી છે. અધિકારીઓનું કહેવું છે કે સમગ્ર મામલે પુરાવા એકત્રિત કરી કાયદેસરની કાર્યવાહી કરવામાં આવશે.
