BAPS સ્વામિનારાયણ મંદિરે ચોપડા પૂજન અને નૂતનવર્ષે ૧૫૦૦થી વધુ વાનગીઓનો અન્નકૂટ યોજાશે
આવતીકાલે સવારે ૯ થી ૧૧ દરમ્યાન વૈદિક ચોપડાપૂજન વિધિ નિમિતે રાજકોટના તમામ વ્યાપારી અને ઉદ્યોગ સાહસિકોને આમંત્રણ
અગ્ર ગુજરાત, રાજકોટ
ભારતીય સંસ્કૃતિને ઉજાગર કરતો દીપોત્સવી તેમજ નૂતનવર્ષનો ઉત્સવ બી.એ.પી.એસ. સ્વામિનારાયણ મંદિરે ખૂબજ ધામધૂમપૂર્વક ઉજવાનાર છે. જે અંતર્ગત આજે સાંજે ૭ કલાકે હનુમાન પૂજાનો કાર્યક્રમ યોજાશે. આવતીકાલે તા.૮ નવેમ્બર, રવિવારે દિવાળીના દિવસે સવારે ૯ થી ૧૧ દરમ્યાન પ્રમુખસ્વામી સભાગૃહમાં વૈદિક ચોપડાપૂજન-લક્ષ્મીપૂજન વિધિ યોજાશે જેમાં પૂજ્ય સંતો વ્યાપારીઓને વૈદિક પૂજનવિધિમાં જોડશે અને ધંધા વ્યવહારના ચોપડામાં ભગવાનનો આશીર્વાદપત્રક લગાવવામાં આવશે. બ્રહ્મસ્વરૂપ પ્રમુખસ્વામી મહારાજ અને પ્રગટ ગુરુહરિ મહંતસ્વામી મહારાજના વિડીઓ આશીર્વચનનો પણ લાભ પ્રાપ્ત થશે.
વિક્રમ સંવત ૨૦૮૨ ની અંતિમ દિવસે સાંજે ૫ થી ૭:૩૦ કલાકે દીપોત્સવ સભા અને મંદિર પર ઠાકોરજી સમક્ષ હજારો દીવડાઓની સમુહ આરતી તથા ભવ્ય કલાત્મક દિવડાઓની રંગોળી રચવામાં આવશે. ઉપસ્થિત તમામ ભાવિકો સાંજે ૭ વાગ્યે હજારો દીવડાઓના શણગાર રચિત ઠાકોરજીની સમુહ આરતી દ્વારા વર્ષની અંતિમ સંધ્યા આરતી કરી ધન્યતાની લાગણી અનુભવશે.
વિક્રમ સંવત ૨૦૮૩ એટલે કે નૂતન વર્ષના પ્રથમ દિન, તા.૧૦ નવેમ્બર, મંગળવારે ઠાકોરજીને નવા વાઘા પરિધારણ કરાવવામાં આવશે અને સવારે ૭ વાગ્યે શણગાર આરતી દ્વારા વર્ષના પ્રથમ દિને ભક્તો ભાવિકો ભગવાન સમક્ષ પ્રાર્થના કરી આજના દિનનો મંગલ પ્રારંભ કરશે. ભારતીય સંસ્કૃતિની આગવી વિશિષ્ટતા એ છે કે પ્રથમ ભગવાનને અર્પણ કર્યા બાદ જ સૌ કોઈ એ અન્નકૂટની વિવિધ વાનગીઓને પ્રસાદ સ્વરૂપે ગ્રહણ કરતા હોય છે.
પરમ પૂજ્ય મહંતસ્વામી મહારાજના આશીર્વાદથી રાજકોટ ખાતે ૧૫૦૦થી પણ અધિક શુધ્ધ, સાત્વિક અને શાકાહારી વાનગીઓનો ભવ્ય અન્નકૂટ રચાશે જેમાં વિવિધ મીઠાઈઓ, ફરસાણ, સુકોમેવો, જ્યુસીસ વગેરે અનેક સંતો અને હરિભક્તો દ્વારા પવિત્ર વાતાવરણમાં સંપૂર્ણ શુધ્ધતા દ્વારા બનાવવામાં આવી રહ્યા છે. રાજકોટના અગ્રણી મહાનુભાવોની હાજરીમાં અન્નકૂટની પ્રથમ આરતીનો ૧૦:૦૦ વાગ્યે લાભ પ્રાપ્ત થશે. ત્યારબાદ દર કલાકે સાંજે ૭ વાગ્યા સુધી આરતીનો લાભ પ્રાપ્ત થશે. દર્શનાર્થીઓને અન્નકૂટની મહાઆરતી બાદ ૧૦ વાગ્યેથી સાંજે ૭ વાગ્યા સુધી અન્નકૂટ દર્શનનો લાભ પ્રાપ્ત થશે.
