સિંગતેલના ભાવમાં દિવાળીના તહેવાર બાદ રૂ.૫૫૦નો થયો તોતિંગ વધારો
યુધ્ધની ઝંઝાળમાં ડબ્બો રૂ.3૦૦૦ની સપાટીએ પહોંચ્યો : ગૃહિણીઓના બજેટને અસર
અગ્ર ગુજરાત, રાજકોટ
રાજકોટમાં ખાદ્યતેલના ભાવમાં ભડકો થતાં સામાન્ય જનતાની મુશ્કેલીઓ વધી છે. ખાસ કરીને સિંગતેલના ડબ્બાનો ભાવ 3000 રૂપિયાની સપાટી વટાવી ગયો છે, જે મધ્યમ વર્ગ માટે મોટો ફટકો છે. દિવાળી પછીના ટૂંકા ગાળામાં જ ભાવમાં 550 રૂપિયાનો તોતિંગ વધારો ઝીંકાયો છે. વેપારીઓના મતે બજારમાં હજુ પણ તેજીનો માહોલ રહેવાની શક્યતા હોવાથી ગૃહિણીઓનું બજેટ ખોરવાયું છે.
સિંગતેલની સાથે હવે કપાસિયા અને પામોલીન જેવા અન્ય ખાદ્યતેલોના ભાવમાં પણ મોટો ઉછાળો જોવા મળ્યો છે. સિંગતેલના વિકલ્પ તરીકે વપરાતા આ તેલો મોંઘા થતા સામાન્ય પરિવારો પર આર્થિક બોજ વધ્યો છે. વેપારીઓના મતે, આંતરરાષ્ટ્રીય બજારની સ્થિતિ, વધતો જતો ઉત્પાદન ખર્ચ અને સ્થાનિક માંગમાં વધારો થવા જેવા પરિબળો આ ભાવવધારા પાછળના મુખ્ય કારણો છે.
સિંગતેલનો ડબ્બો 3000 રૂપિયાની સપાટીએ પહોંચ્યો છે. વેપારીઓના મતે, જ્યાં સુધી સરકાર દ્વારા મગફળીનું વેચાણ શરૂ કરવામાં નહીં આવે, ત્યાં સુધી સપ્લાયમાં કોઈ સુધારો થશે નહીં અને ભાવ સ્થિર થવાની શક્યતા ઓછી છે. મગફળીનું ઉત્પાદન અને તેનો સંગ્રહ હાલ બજારની દિશા નક્કી કરી રહ્યા હોવાથી, સરકારી હસ્તક્ષેપ વગર ગ્રાહકોએ આ મોંઘવારીનો બોજ હજુ પણ સહન કરવો પડશે.
ખાદ્યતેલના ભાવવધારાની સીધી અસર મધ્યમવર્ગીય પરિવારોના બજેટ પર પડી રહી છે, જેના કારણે રસોઈ ખર્ચમાં મોટો ઉછાળો આવ્યો છે. લોકો હવે તેલનો વપરાશ ઘટાડી રહ્યા છે અથવા સસ્તા વિકલ્પો શોધી રહ્યા છે, પરંતુ તમામ તેલો મોંઘા થતા કોઈ ખાસ રાહત મળી રહી નથી. બજાર નિષ્ણાતોના મતે, વૈશ્વિક અસ્થિરતા અને સ્થાનિક સ્તરે માંગ-પુરવઠાનું સંતુલન બગડતા, આગામી દિવસોમાં ભાવમાં હજુ પણ વધારો થવાની પૂરેપૂરી સંભાવના છે.
