- વિટામિન એ-ઈ-સી, ઓમેગા 3 ફેટી એસિડ્સ, લ્યુટીન આંખો માટે જરૂરી
- સ્ક્રીન કે ફોન યૂઝ કરવાના સમયમાં થોડો ઘટાડો કરવાનું જરૂરી છે
- લગભગ છ મહિનાના અંતરે આંખનું ચેકઅપ કરાવવું જોઈએ
ચહેરાની સાથે સાથે આંખનું પણ વ્યક્તિના જીવનમાં અનેકગણું મહત્ત્વ છે. જેમ તમને શરીરના કોઈ ભાગમાં દર્દ રહે છે તો તમે તેનાથી પરેશાન થઈ જાવ છો તે જ રીતે તમે આંખની તકલીફોથી પણ પરેશાન થઈ શકો છો. જો તમે તેની યોગ્ય કેર નહીં કરો તો તમારી મુશ્કેલીઓમાં વધારો થઈ શકે છે. આંખો દરેક વ્યક્તિ માટે કેટલી મહત્વની છે તે કહેવાની જરૂર નથી. દુનિયા કેટલી સુંદર છે તે ફક્ત આપણી આંખો જ આપણને અહેસાસ કરાવે છે. આંખો શરીરના સૌથી મહત્વપૂર્ણ, નાજુક અને સંવેદનશીલ અંગોમાંનું એક છે. વિચિત્ર જીવનશૈલી, આહાર પર ધ્યાન ન આપવું અને ડાયાબિટીસ અને હાઈ બ્લડ પ્રેશર જેવી કેટલીક બીમારીઓ આંખને લગતી સમસ્યાઓનું જોખમ વધારે છે. જેના કારણે કેટલીકવાર આંખોની રોશની ઓછી થઈ શકે છે અથવા કોઈ કારણસર દ્રષ્ટિ પણ ગુમાવી શકે છે.
સ્ક્રીન ટાઇમિંગ પર ધ્યાન આપો
આધુનિક જીવનશૈલીમાં નબળી દૃષ્ટિના મોટાભાગના કિસ્સાઓ વધુ પડતા સ્ક્રીન સમયને કારણે થાય છે. બાળકો હોય કે પુખ્ત વયના તેઓ કમ્પ્યુટર અથવા ફોનનો ઉપયોગ કરીને લાંબો સમય પસાર કરે છે. આવી સ્થિતિમાં તેની આંખો પર ખરાબ અસર પડે છે. તેથી તમારા સ્ક્રીન ટાઈમિંગને થોડો ઓછો કરવાનો પ્રયાસ કરો. આ સાથે સ્ક્રીનથી ચોક્કસ અંતર જાળવીને જ કામ કરો. જો તમે કલાકો સુધી સ્ક્રીનની સામે બેસીને કામ કરો છો, તો અડધા કલાકના અંતરે 10 થી 20 સેકન્ડ માટે તમારી આંખો બંધ કરો અને આરામ કરો.
કેવો ખોરાક લેવો
જો તમે તમારી આંખોને સ્વસ્થ રાખવા માંગો છો, તો તમારા આહારમાં કેળા, બદામ, લીલા પાંદડાવાળા શાકભાજી, કઠોળ જેવી આરોગ્યપ્રદ વસ્તુઓનો સમાવેશ કરો, કારણ કે વિટામિન એ, ઓમેગા 3 ફેટી એસિડ્સ, લ્યુટીન, વિટામિન સી, વિટામિન ઇ આંખો માટે જરૂરી છે. પૌષ્ટિક ખોરાક ખૂબ જ ફાયદાકારક છે. ખાવાની સારી ટેવો તમને ઉંમર સંબંધિત આંખના રોગો જેવા કે મોતિયાથી બચાવે છે.
આંખની તપાસ મહત્વપૂર્ણ છે
આંખો એ સૌથી નાજુક અંગ છે અને મોટાભાગે આપણે આંખની તપાસમાં બેદરકારી દાખવીએ છીએ, જ્યારે અમુક સમયે જેમ કે લગભગ છ મહિનાના અંતરે આંખનું ચેકઅપ કરાવવું જોઈએ. જેથી આંખોને લગતી સમસ્યાઓ સમયસર જાણી શકાય. આ સિવાય જો તમને કોઈ બીમારી છે તો તમારે તાત્કાલિક ડૉક્ટરનો સંપર્ક કરવો જોઈએ. આ સાથે ડાયાબિટીસ અને બ્લડપ્રેશર વગેરેનું નિયમિત ચેકઅપ કરાવવું જોઈએ, કારણ કે આ સ્વાસ્થ્ય સમસ્યાઓથી આંખોની રોશની ઓછી થઈ શકે છે.
ધૂમ્રપાનથી દૂર રહો
ધૂમ્રપાન ફક્ત તમારા ફેફસાં માટે જ હાનિકારક નથી, પરંતુ તેનાથી આંખોની રોશની પણ ઘટી શકે છે. ધૂમ્રપાનથી આંખ સંબંધિત રોગો જેમ કે ગ્લુકોમા અને મોતિયાનું જોખમ વધે છે.
