રૈયાધારમાં બનાવટી ચલણી નોટો છાપવાના કારખાનાનો પર્દાફાશ
SOG એ દરોડો પાડી ઓરડીમાંથી રૂ.100 અને 200ની નકલી નોટો બનાવતા શખ્સને ઝડપી લીધો
યુટ્યુબના વીડિયો જોઈ શીખી નકલી નોટ છાપવાની કળા : 38 નોટ, પ્રિન્ટર અને સાધન સામગ્રીઓ કબજે કરી ક્રાઈમ બ્રાન્ચને તપાસ સોંપાઈ
અગ્ર ગુજરાત, રાજકોટ
રાજકોટ શહેરમાં બનાવટી ચલણી નોટો છાપવાના એક નાનકડા પરંતુ ચોંકાવનારા કૌભાંડનો પર્દાફાશ થયો છે. શહેરના રૈયાધાર મફતીયાપરા વિસ્તારમાં એક ઓરડીમાં બેસીને પ્રિન્ટર મારફતે રૂ.100 અને રૂ.200ની નકલી નોટો છાપવાનું કામ શરૂ કરનાર કુખ્યાત શખ્સને પોલીસની સ્પેશિયલ ઓપરેશન ગ્રુપ (એસઓજી) ટીમે ઝડપી પાડી સમગ્ર કારસ્તાન બહાર લાવ્યું છે. આરોપી પાસેમાંથી કુલ 38 બનાવટી નોટો, પ્રિન્ટર-કમ-સ્કેનર અને અન્ય સાધનો કબ્જે કરી વધુ તપાસ હાથ ધરવામાં આવી છે. પોલીસ તપાસમાં બહાર આવ્યું છે કે આર્થિક સંકટમાં ફસાયેલા આરોપીએ યુટ્યુબ પર વિડિઓ જોઈ નકલી નોટ બનાવવાની રીત શીખી હતી અને પછી તે કામ શરૂ કર્યું હતું.
મળતી માહિતી મુજબ એસઓજીના પીઆઈ એસ.એમ. જાડેજાની માર્ગદર્શનમાં ટીમ પેટ્રોલિંગમાં હતી. આ દરમિયાન ટીમના એએસઆઈ રાજેશભાઈ બાળા અને હેડ કોન્સ્ટેબલ સિદ્ધરાજસિંહ જાડેજાને ચોક્કસ બાતમી મળી હતી કે રૈયાધારના મફતીયાપરા વિસ્તારમાં ગૌશાળાની બાજુમાં આવેલી કાચી-પાકી ઓરડીમાં રહેતો નૈતિક મહેન્દ્રભાઈ અગ્રાવત નામનો શખ્સ ભારતીય ચલણી નોટોની નકલ છાપી રહ્યો છે. બાતમી વિશ્વસનીય હોવાનું જણાતા પોલીસ ટીમે તાત્કાલિક કાર્યવાહી હાથ ધરી સરકારી પંચોને સાથે રાખી સ્થળ પર દરોડો પાડવાનો નિર્ણય લીધો હતો.
પોલીસ ટીમ રૈયાધાર મફતીયાપરા વિસ્તારમાં શીતલ પાર્ક નજીક આવેલી ગૌશાળાની બાજુમાં આવેલી ઓરડી પર પહોંચી હતી. ત્યાં હાજર એક શખ્સને અટકાવી તેનું નામ પૂછતાં તેણે પોતાનું નામ નૈતિક મહેન્દ્ર અગ્રાવત (ઉંમર 29 વર્ષ, વ્યવસાય ડ્રાઈવિંગ) હોવાનું જણાવ્યું હતું. ત્યારબાદ પોલીસ ટીમે ઓરડીની અંદર તપાસ કરતાં ખાટલા ઉપર પ્રિન્ટર-કમ-સ્કેનર મશીન જોવા મળ્યું હતું. તેની આસપાસ ફૂટપટ્ટી, કટર, પેન્સીલ, સંચો તેમજ અ4 સાઇઝના કોરા કાગળના પેકેટ સહિતના સાધનો પડેલા હતા.
તપાસ દરમિયાન ત્યાંથી ભારતીય ચલણની રૂ.100ની ડબલ સાઈડ પ્રિન્ટ કરેલી 15 નોટો મળી આવી હતી. આ નોટો ગણી જોતા તમામ નોટોના સીરિયલ નંબર ‘663598’ સરખા હોવાનું સામે આવ્યું હતું. પોલીસ દ્વારા પૂછપરછ કરતા આરોપીએ સ્વીકાર્યું હતું કે આ નોટો તેણે જ પ્રિન્ટર મારફતે બનાવટી રીતે છાપી હતી. ઉપરાંત પોલીસને અ4 સાઇઝના 34 કાગળ એવા મળ્યા હતા જેમાં રૂ.100ની નોટનો એક સાઈડ પ્રિન્ટ કરવામાં આવ્યો હતો. આ તમામ કાગળોમાં પણ એકસરખો સીરિયલ નંબર જોવા મળ્યો હતો. એક કાગળમાં તો ડબલ સાઈડ પ્રિન્ટ કરેલી નોટ પણ મળી આવી હતી.
પોલીસે સ્થળ પરથી કુલ 38 બનાવટી નોટો તથા પ્રિન્ટર-કમ-સ્કેનર, ફૂટપટ્ટી, કટર, પેન્સીલ, સંચો અને કોરા કાગળો સહિતનો મુદ્દામાલ કબ્જે કર્યો હતો. પોલીસે આરોપીને સ્થળ પરથી જ ઝડપી લઈ તેની સામે કાયદેસરની કાર્યવાહી શરૂ કરી છે. પ્રાથમિક તપાસમાં બહાર આવ્યું છે કે આરોપી છેલ્લા કેટલાક સમયથી આર્થિક તંગીમાં જીવતો હતો. દેવાનો બોજ વધતા તેણે ઝડપી પૈસા કમાવવાનો રસ્તો શોધવા માટે ઇન્ટરનેટ અને યુટ્યુબ પર વિવિધ વિડિઓ શોધ્યા હતા.
પોલીસ સૂત્રોના જણાવ્યા અનુસાર આરોપીએ અઠવાડિયા પહેલાં યુટ્યુબ પર બનાવટી ચલણી નોટો કેવી રીતે બનાવવી તે અંગેના વિડિઓ જોયા હતા. તેમાંથી પ્રેરાઈ તેણે પ્રિન્ટર દ્વારા નોટ છાપવાનો પ્રયોગ કર્યો હતો. ત્રણેક દિવસ પહેલા તેણે પ્રથમ બે નોટ છાપી હતી અને પછી તે નોટો બજારમાં ચલાવવાનો પ્રયાસ પણ કર્યો હતો. આ પ્રયોગ સફળ થતાં તેણે વધુ નોટો છાપવાનું શરૂ કર્યું હતું.
આરોપી દ્વારા બનાવેલી નોટો હજી મોટા પ્રમાણમાં બજારમાં ફરતી થાય તે પહેલાં જ એસઓજી ટીમે દરોડો પાડી સમગ્ર કૌભાંડનો પર્દાફાશ કરી દીધો હતો. પોલીસે સમયસર કાર્યવાહી કરતાં નકલી નોટો બજારમાં પહોંચે તે પહેલાં જ તેને કબ્જે કરી લીધી હતી. જો આ નોટો બજારમાં પ્રસરી હોત તો વેપારીઓ અને સામાન્ય લોકો માટે મુશ્કેલી ઉભી થઈ શકતી હતી.
આ કેસમાં વધુ તપાસ માટે મામલો ક્રાઇમ બ્રાન્ચને સોંપવામાં આવ્યો છે. ક્રાઇમ બ્રાન્ચના પીએસઆઈ આર.કે. ગોહિલ અને તેમની ટીમ આરોપીની વધુ પૂછપરછ કરી રહી છે. આરોપી આ નકલી નોટો કોને આપવાનો હતો, તેની પાછળ કોઈ મોટું નેટવર્ક કાર્યરત છે કે નહીં અને તે અત્યાર સુધીમાં કેટલા લોકો સુધી આવી નોટો પહોંચાડી ચૂક્યો છે તેની દિશામાં પણ તપાસ ચાલી રહી છે.
પોલીસ તપાસમાં એક મહત્વની વાત એ પણ સામે આવી છે કે પકડાયેલ આરોપી કોઈ સામાન્ય વ્યક્તિ નથી. તેના વિરુદ્ધ અગાઉ પણ ગંભીર પ્રકારના ગુનાઓ નોંધાયેલા છે. પોલીસ રેકોર્ડ મુજબ તેના સામે અપહરણ અને દુષ્કર્મ જેવી ગંભીર કલમો હેઠળના ગુનાઓ પણ નોંધાયેલા હોવાનું જાણવા મળ્યું છે. જેના કારણે પોલીસ હવે તેની ભૂતકાળની પ્રવૃત્તિઓ તેમજ તેના સંપર્કોમાં રહેલા અન્ય લોકો અંગે પણ માહિતી એકત્રિત કરી રહી છે.
શહેરમાં નકલી ચલણી નોટોના કૌભાંડને લઈને પોલીસ વધુ સતર્ક બની છે. આ ઘટના પછી પોલીસે લોકોને પણ સાવચેત રહેવાની અપીલ કરી છે. ખાસ કરીને વેપારીઓને મોટી રકમની નોટ લેતી વખતે તેની સાચી ઓળખ કરવાની સલાહ આપવામાં આવી છે. કારણ કે અત્યારે ટેકનોલોજીનો ઉપયોગ કરીને નકલી નોટો બનાવવાનો પ્રયાસ થતો રહે છે.
હાલ પોલીસ આરોપીને રિમાન્ડ પર લઈ વધુ પૂછપરછ કરવાની તૈયારી કરી રહી છે. તપાસ દરમિયાન આ બનાવ પાછળ કોઈ મોટું ગેંગ અથવા નેટવર્ક કાર્યરત છે કે કેમ તે દિશામાં પણ તપાસ આગળ વધારવામાં આવશે. જો આરોપી અન્ય કોઈ લોકો સાથે મળીને આ પ્રવૃત્તિ ચલાવતો હોય તો તેમની સામે પણ કડક કાર્યવાહી કરવામાં આવશે.
આ રીતે એસઓજીની સતર્કતા અને ઝડપી કાર્યવાહીથી રાજકોટ શહેરમાં ઉભું થતું એક નકલી ચલણી નોટોના કૌભાંડનો સમયસર પર્દાફાશ થયો છે અને મોટી આર્થિક ઠગાઈ થતી અટકાવવામાં પોલીસને સફળતા મળી છે.
